ЗГХЭГ-ын дарга Л.Оюун-Эрдэнэ өнөөдөр мэдээлэл хийлээ. Тэрээр “Монгол Улсын урт хугацааны хөтөлбөр “Алсын хараа-2050” УИХ-д Засгийн газраас өргөн баригдаж байна. Улс орон бүхэн урт хугацааны алсын хараатай байдаг. Бид дэлхийн хорь орчим орны урт хугацааны алсын хараа, урт хугацааны төлөвлөлтийг нягталж үзсэн.

Сүүлийн найман сарын хугацаанд 1500 орчим эрдэмтэн судлаачид хамтарч ажилласан. Өнгөрсөн 30 жилийн хугацаанд гаргасан нийт 517 бодлогын баримт бичгийг түүхэндээ анх удаа нэгтгэн энэ баримт бичигт тусгасан. Монгол Улсыг 30 жилийн хугацаанд хөгжүүлэх алсын хараатай болж байна гэсэн үг. Цахим хуудсанд байршуулснаас хойш одоогийн байдлаар хорь орчим мянган иргэд бидэнд хандсан байна. Энэ хөтөлбөр албан ёсоор УИХ-ын бүх байнгын хороодын хурлаар орно гэж ойлгож болно.

уул уурхай дээр нэмэх нь таван салбарыг тэргүүлэх чиглэл хэмээн зарлаж байна. Одоо байгаа ДНБ-ийг 15 мянган ам.долларт хүргэх зорилт дэвшүүлж, экспорт, гадаадын хөрөнгө оруулалтыг нэмэгдүүлэх томоохон ажлуудыг хийнэ. Мөн дэд бүтцийн асуудлуудыг томоор тавихаар тусгасан. Эдийн засгийн өсөлт уул уурхайн мөчлөгөөс хамааралтай байгаа асуудлыг баялгийн сан дээр тулгуурлан хэрхэн бусад салбарт төрөлжүүлэн зохион байгуулах зэрэг гол асуудлуудыг тусгасан.

Хүн ам, Улаанбаатар хотын төвлөрөл нэлээд өсөхөөр байна. Тухайлбал хүн ам 5.5-6 саяд хүрэхээр тооцоо гарсан. Манай улс 2025 оноос эхлэн ажиллах хүчний тооцоолол гарсан тул одоо байгаа боловсон хүчинээ хэрхэн бэлтгэх тал дээр боловсролын салбар хэрхэн зохион байгуулах асуудлыг ярьж байна. Тэтгэврийн хуримтлалын сан, э-засаглалтай холбоотой ажлуудыг тусгаж, чинээлэг дундаж давхаргатай холбоотой ойлголтыг Дэлхийн банкны аргачлалаар тооцон гаргасан. Өнөөдөр 16.2 хувьтай байгаа үзүүлэлтийг 80 хувьд хүргэх маш том амбицтай зорилгыг дэвшүүлж байна. Өмнөх бодлогын бичиг баримтын давхцлыг тооцсон бөгөөд Үндэсний хөгжлийн яамтай болох гэх мэт асуудлуудыг тусгасан.

Хилийг хэсэгчлэн зохион байгуулалттай, өндөржүүлсэн бэлэн байдлаар тодорхой хэмжээгээр хязгаарлах шаардлага гарч байна. Ингэхдээ иргэдийн зорчих, орох, гарах эсэхийг хязгаарлах асуудлыг хэлэлцэнэ. Харин хүнсний импорт тасрахгүй. Мөн БНХАУ-ын Ухань хотод байгаа оюутнуудаа маргааш авчрахаар болсон бөгөөд ХӨСҮТ-д хэсэг хугацаанд хяналт тавихаар бэлтгэл ажлаа базаасан. Засгийн газрын зүгээс нэг сувгаар бодит мэдээллийг өгөх бөгөөд үүнийг хэвлэл мэдээллийнхэн бас хамтарч ажиллаасай гэж хүсч байна” гэлээ.