УИХ-ын гишүүн Б.Бат-Эрдэнэ: Өглөө чуулган эхлэхэд би тодорхой асуулт тавьсан. Зэргэлдээ хөрш орнууд хилээ хаачихсан байна. ДЭМБ-аас онцгой нөхцөл байдал гээд зарлачихлаа. Монгол Улс шийдвэр гаргадаг бол яаралтай Хилээ хаах арга хэмжээ аваач гэдэг шаардлагыг хэлсэн. Энэ халдварт өвчин тархаж дэгдээд байгаа өмнөд хөршдөө “Тэмээ тэнгийхээ хэрээр” гэдэг шиг дэмжлэг тусламж үзүүлэх хэрэгтэй байна гэдгийг хэлсэн. Засгийн газар ээлжит бус хуралдаан хийгээд шуурхай арга хэмжээнүүдийг авчээ. Энэ бол зөв зүйтэй байна. Энд би хоёр зүйл хэлэх гээд байгаа юм. Эрүүл мэндийн яам, тус салбарынхан сайн ажиллаж байгаа гэдэгтэй санал нэг байгаа. Гэхдээ илүү хариуцлагатай баймаар байна. Гаргаж байгаа мэдээллээ эх үүсвэрийг нь сайн шалгаж байж өгмөөр байна. Би ганцхан жишээ хэлье. Тэр Австралийн Мёлбурн явсан хүний тухай асуудал ярихад Австралид нэг хүн титэм вирусээр өвджээ. Тэр нь монгол хүн байна гэж зарлаад байсан. Тэгснээ байчихаад тэр маань биш байна. Гуанжоугаас явсан хүн байна гэсэн. Бүр болиод Монголоос Гуанжоугаар дамжаад Мёлбурн орсон юм байна. Тэнд онгоцонд явсан хүмүүс нь ийм халдвартай байсан байж. Тэгээд тэр хүн маань эргээд ирчихэж гэж яриад байгаа. Энэ мэт зүйлийг та бүхэн яагаад нягтладаггүй юм бэ.

Цаашилбал, ариутгал урьдчилан сэргийлэхтэй холбоотой зүйл байна. Маск байнга заавал зүүх ёстой гээд байсан. Одоо маск шиг хэрэггүй юм байхгүй болчихсон явж байна. Энд албан ёсны юм байна уу, үгүй юу?

ЭМ-ийн сайд Д.Сарангэрэл: Ер нь аль рейсээр, ямар хүн нисч байгаа талаар Эрүүл мэндийн салбар мэдэхгүй л дээ. Тэр тусмаа ийм асуудлаар эрүүл мэндийн ажилтнууд, эмч мэргэжилтнүүд хариуцлага хүлээхгүй.

Австралийн тохиолдол ийм юм аа. Манай ХӨСҮТ Австралийн олон улсын Эрүүл мэндийн дүрмийн байгууллагатай холбоотой ажилладаг. Эндээс Монголын иргэнд ийм халдвар илэрсэн тухай мэдээллийг өгсөн. Бид маш шуурхай ажилласан. Улсын бүртгэл, Хил хамгаалах, МИАТ компани гээд. Энэ хүн Гуанжоугаас Мёлбурн ниссэн. Гэхдээ Монголоос явсан уу, Хятадаас явсан уу, Австралид амьдардаг иргэн үү гэж судалсан. Тэр ч бүү хэл, хажууд нь өөр монгол хүн байсан уу гэдгийг ч судалсан. Бид энэ мэдээллээ лавшруулж байтал бидэнд эргээд мэдээлэл өгсөн. Эргээд мэдээлэл өгөхдөө “Монгол Улсын иргэн коронавирус илэрсэн Хятадын иргэнтэй нэгдүгээр хавьтлынх байсан байна” гэдэг залруулгаа хийж өгсөн. ХӨСҮТ-өөр энэ мэдээлэл ирсэн учраас бид шуурхай ард түмэндээ мэдээлсэн. Яагаад гэвэл янз бүрийн шалтгаанаар мэдээлэл нууж байна гэсэн асуудал яваад байгаа учраас нэгэнт ХӨСҮТ-өөр мэдээлэл ирсэн болохоор шуурхай мэдээлсэн. Тэнд олон хүн мэдэж байсан. Хэрвээ энэ мэдээллийн араас бид ингэж хариуцлагатай, мөшгиж ажиллалаагүй бол, түргэн шуурхай арга хэмжээ аваагүй бол бас ойлгомжгүй асуудал үүсэх л байсан байх. Тэгж байж бид хүнээ олж авсан. Монголд ирсэн хүнээ олж аваад тусгаарлаад, оношийг нь үгүйсгээд одоо тэр хүн амар амгалан ажлаа хийж байгаа.”

Ер нь ДЭМБ-аас ямар зөвлөмж өгч байна гэхээр “Монгол Улс голомтын төв биш байна. Мөн Коронавирусын халдвар илрээгүй байна. Тийм учраас хүн бүрийг дараалан маск зүүхийг зөвлөхгүй” гэсэн.

Гэхдээ бид нөхцөл байдлыг хамгийн муугаар бодож, урьдчилан сэргийлэх зорилгоор ажиллаж байгаа учраас ард иргэддээ амны хаалт зүүхийг уриалж байгаа. Цаашид ч уриална.