Ерөнхийлөгчийн Тамгын газрын дарга З.Энхболд ажлаа хүлээлгэж өгч байгаагаа мэдэгдэж, мэдээлэл хийлээ. Энэ нь гэнэтийн шийдвэр биш бөгөөд 2019 оны наймдугаар сарын 13-нд “Өдрийн сонин”-д өгсөн ярилцлагадаа “Үндсэн хуулийн нэмэлт, өөрчлөлтийг батлагдтал ажлаа хийнэ ээ. Ерөнхийлөгч В. Путины манайд хийх айлчлал, Ерөнхийлөгч Х. Баттулгын Энэтхэгт хийх айлчлал бий. Иймэрхүү чухал ажлуудаа дуусгана л даа. Сонгуульдаа бэлдэнэ шүү дээ” гэж хэлж байсан баримт байна. Тэгэхээр төлөвлөсөн ажлуудаа хийж гүйцэтгээд одоо харин бэлтгэл хангагдсан гэж үзээд ажлаа өгч байгаа ажээ. Мэдээллийнхээ үеэр “Түрүүчийнхээ алдааг давтахгүйн тулд сонгуульдаа бэлдэнэ” гэдгээ хэлсэн юм.

ЕТГ-ын дарга З.Энхболд: “Би одоо өргөдлөө өгөөд, ажлаа өгөх гэж байна. Гурван сарын дараа сонгуулийн компанит ажил эхэлнэ. Түүндээ төвлөрөх шаардлагатай байгаа учраас ажлаа өгнө. Ерөнхийлөгч хүлээж авна гэж амласан учраас өнөөдөртөө ажлаа өгчихнө гэж бодож байна. Янз бүрийн цуурхал гараад байгаа учраас албан ёсны мэдээлэл хийж байна” гэдгээ мэдэгдээд сэтгүүлчдийн асуултад хариулсан юм.

Тэрбээр “Би Ардчилсан нам дээр ямар нэг албан тушаалд очихгүй ээ. Энэ оны нэгдүгээр сарын 1-нээс эхлээд С.Эрдэнэ даргын орон тооны бус ахлах зөвлөх болсон байгаа. Тэр ажлаа хийнэ. Өөрийнхөө тойргоос гадуур нийт сонгуулийн ажилд ямар нэг байдлаар оролцоно. Ерөнхийлөгчтэй эв түнжинтэй сайн байгаа. Ерөнхийлөгч “Сонгууль дөхөж байна. Сонгуулийн ажлаа хийхийг надад зөвшөөрсөн. ” гэсэн.

Сэтгүүлч түүнээс “АН-ын дарга С.Эрдэнийг өмөөрч Ерөнхийлөгчтэй муудалцсан гэх шум яваад байна” гэхэд “Тийм зүйл байхгүй” гэдгийг батлан хэллээ. Мөн “С-1 телевизээр гарсан “Цензургүй сурвалжлага нэвтрүүлгийн автор нь Таныг гэх яриа яваад байна” гэхэд “Өвөрхангайн нэвтрүүлгийг би С-1-ээр гарахад нь үзэгчийн хувиар үзсэн. Тус нэвтрүүлгийг би шейрлэсэн. Найман жил Өвөрхангайг төлөөлж, УИХ-д суусныг Та бүхэн мэдэж байгаа. Та бүхэн одоо санаж байгаа бол миний үеийн гишүүд УИХ-ын гишүүн асан талийгаач Г.Батхүү, гишүүн Д.Лүндээжанцан, Д.Зоригт, Х.Бадамдамдин ч юм уу, энэ хэд Өвөрхангайд очоод Я.Содбаатар гишүүн шиг тендер авчихсан тухай огт сонсоогүй байх аа. Бид тэгж тендерт оролцдог тийм ёс зүйгүй гишүүд байгаагүй юм. Аль ч намынх бай, тендерт оролцдоггүй байсан. Одоо сүүлийн дөрвөн жил замбараагаа алдсан байна. Арай хэтэрчээ. Өвөрхангайн Иргэдийн Хурлын гишүүн болохгүй бол тендер олддоггүй ийм бусармаг систем бий болгосон байна шүү дээ. Энэ нэвтрүүлгийг би зөв гэж үзэж байгаа. Цаашид бусад аймгуудад ч гэсэн ийм нэвтрүүлгүүд гарах ёстой. Ялангуяа сэтгүүлчид ийм зүйлийг соргогоор олж илрүүлж хийгээсэй гэж бодож байна. Тэгэхгүй бол Өвөрхангай аймагт 1921 оноос хойш АН Иргэдийн Хуралд нь олонх болж үзээгүй учраас сөрөг хүчингүй байгаа юм.

Би хэн нэгэнтэй санал зөрж ажлаасаа гарч байгаа зүйл байхгүй. Би чинь одоо амиа бодмоор байна шүү дээ. Сонгууль болох гээд байдаг. Гуравхан сар үлдчихсэн байна. Түрүүчийн сонгуулиар би онгоцоор улс тойрсоор байгаад өөрөө унасан. Одоо би гурван сар аль нэг тойргийг сонгож очоод түүн дээрээ бэлдэх гэж байна. Түрүүчийнхээ алдааг давтахгүйн тулд. Улс төрийн албан тушаал учраас би огцрохгүйгээр ажиллаж болох байлаа. Гэтэл Өвөрхангайн нэвтрүүлэг энэ тэр гараад надад хамаагүй юмыг надад наах гээд байгаа учраас Ерөнхийлөгч “Сонгуулиа бод доо. Таныг энд байхаар элдвээр хэлээд байна ” гэсэн яриа бидний дунд өрнөсөн. Бодвол МАН-ынхан гомдсон юм байлгүй.

Мөн сэтгүүлч түүнээс “АН УИХ-д нэр дэвшигчээсээ 100 сая төгрөгийн хандив авч байгаа” талаар асуухад “Харин ч АН-ыг сэтгүүлчид сайшаах ёстой. Сонгуулийнхаа мөнгийг ил тод болгоод хэнээс хэдэн төгрөг аваад хандивынхөө мөнгийг босгож байгаа нь ил тод болсон. АН-аас бусад намын санхүү хаалттай байгаа. Одоо АН-ын санхүүд ороод үзэх юм бол хэн гэдэг нэр дэвшигчийн нэр дээр хэн хэн гэдэг хувь хүн болон компаниуд хэдэн төгрөг өгсөн нь бүгд нээлттэй байгаа. Дэлхий даяар улс төрийн намууд хандиваа ингэж л цуглуулдаг. Түүнчлэн сэтгүүлч түүнээс “2016 оны ялагдлын тухай” асуухад “2012-2016 оны АН-ын сонгуулийн ялагдлын хариуцлагыг би хүлээгээд ажлаа өгсөн. Ер нь сонгуулийн өмнөх саруудад рейтинг сайн байсан. Аль нэг нам нь 65 суудал авчих хэмжээнд байгаагүй. Бүх төрлийн судалгааг харж болно. Сонгуулийн эцсийн өдөр Ч.Сайханбилэг, Ц.Элбэгдорж хоёр Эрдэнэтийн 49 хувийг ХХБ-нд өгснөөс болоод бид ялагдсан. Ц.Элбэгдорж зорилготойгоор 49 хувийг ХХБ-нд өгч, түүнийгээ олон нийтэд зарлаж, АН-ыг ялагдуулсан. Тухйн үед Ерөнхий сайд байсан Ч.Сайханбилэг үүнд гар бие оролцсон.

Ямар зорилготойг нь Та нар өөрсдөөс нь асуу. Эрдэнэс Тавантолгойг Ц.Элбэгдоржийн найз Ж.Оджаргалд өгөөгүйн хонзонгоо авсан. Үүнээс болж АН-ын 180 мянган гишүүн хохирсон. Дөрвөн жил сайн сайхан явна гээд МАН-д саналаа өгсөн Монголын ард түмэн бас хохирсон. Бид улсаараа хохирсон.

Тэрбээр мөн хэвлэлийн хурлын үеэр “Ч.Сайханбилэг гадны орноос иргэншил хүсээд гадаадын хуулийн байгууллагаар өмгөөлүүлэх хүсэлт тавьсан. Энэ тухайгаа Монголд байгаа Элчин сайдын яаманд мэдэгдсэн байна лээ. Ч.Сайханбилэг уг нь Монголд ирээд хуулийн байгууллагадаа байцаагдаад үнэн зөвөө олчих хэрэгтэй. Зугтаж явах хэрэггүй. Ерөнхий сайд Ч.Сайханбилэг бол ямар ч намын бодлогогүйгээр хувиараа ажилласан хүн. Тэрээр 49 хувийг ХХБ-нд найр тавин өгч, Монгол улсын эдлэх ёстой эрхийг эдлүүлээгүйнхээ төлөө хариуцлага хүлээх ёстой. Энэ бол Ч.Сайханбилэг хувь хүнийхээ хувьд хийсэн үйл ажиллагаа, АН-тай ямар ч холбоогүй.

Ц.Элбэдорж, Ч.Сайханбилэг нар сонгуулийн өмнөх өдөр Эрдэнэтийн 49 хувийг зорилготойгоор, зохион байгуулалттайгаар хийгээгүй бол сонгуульд үнэмлэхүй ялагдал хүлээхгүй байсан.

Эрдэнэс Тавантолгойг би зогсоож чадсан. Харин Эрдэнэтийн 49 хувийг Их хурлаар оруулж ирэлгүйгээр шийдсэн” болохыг Ерөнхийлөгчийн Тамгын газрын дарга З.Энхболд хариуцлагатайгаар мэдэгдлээ. Тэрээр хэвлэлийн бага хурлынхаа төгсгөлд Ерөнхийлөгчийн Тамгын газрын даргын албан тушаалд шинээр томилогдож байгаа Ө.Шижирийг дэмжиж ажиллахыг хэвлэл мэдээллийхнээс хүссэн юм.