Коронавирусийн дэгдэлтийн улмаас түр хугацаагаар зогсоод байсан Монголын нүүрсний экспорт өнөөдөр дахин эхэлж байна. Нүүрсний экспортыг энэ сарын 15-наас эхлүүлэхээр төлөвлөөд байсан ч халдваргүйжүүлэлт, хамгаалалтын бэлтгэлээ хангаад дууссан тул өнөөдрөөс экспортыг эхлүүлэхээр болсон байна. Нүүрс экспортолж байгаа жолооч нар хамгаалалтын хувцас хэрэглэл өмсөх бөгөөд машинаасаа буухгүйгээр цонхоороо бичиг баримтаа шалгуулахаар БНХАУ-ын талтай тохиролцжээ.

Монгол Улс он гарснаар 2.7 сая тонн нүүрс экспортолсон гэдгийг Гаалийн ерөнхий газраас мэдээлсэн. Өнгөрсөн жилийн өдийд дөрвөн сая тонныг борлуулаад байсан юм. Өнгөрсөн онд Монгол Улс 36.5 сая тонн нүүрс экспортолсон юм. Энэ онд 42 сая тонн нүүрс экспортолж 1.3 их наяд төгрөгийг төсөвт төвлөрүүлэхээр тооцоод байсан юм. Харамсалтай нь аюулт өвчний улмаас экспорт зогсоод байсан. Үүнээс шалтгаалж, төсвийн төлөвлөгөө тасрах нь гэдэг байр суурийг судлаачид илэрхийлсэн ч албаныхны зүгээс оны эцсээс тасалдсан экспортоо нөхөх боломж ийнхүү нээгдэж буй юм.