Өнөөдөр нийслэлийн захирагч, Улаанбаатар хотын дарга С.Амарсайхан Хавдар судлалын эмнэлэг дээр ажиллалаа. Тэр үеэрээ тэрбээр “Жилдээ 4000 хүн хавдраар өвчилж, нас барж байгаа. 6000 хүн шинээр оношлогдож байгаа. Түүний ард өчнөөн мянган хүний амьдрал яригдаж байна. Тэгэхэд цаг, минут, секундтэй холбоотой түргэн тусламжийн машины орох гарах гарцын асуудлыг ямар ч иргэн, аж ахуйн нэгж хүссэн хүсээгүй гаргаж өгөх ёстой. Тэгэхэд таван гарцаас дөнгөж нэг нь л нээлттэй байна” гэж эмзэглэсэн. Тийм ээ, Та ажил хийвэл хийдэг л юм байна. Тэгвэл Таны дараачийн ажил чинь энд байна. Энэ бол Чингэлтэй дүүрэг гэсэн хаягийн яг дэргэд байх бохирын цооног. Өдөртөө хэдэн ч машин ирж энэ цооног руу бохироо шахдагийг мэдэхгүй. Асуусан ч хариулахгүй байна лээ.

Энэ асуудлыг одоо хөндөж байгаа юм биш. Одоогоос 10 сарын өмнө НИТХ дээр ярьж л байж. Тэргүүлэгч Ш.Үнэнбатын зүгээс “Чингэлтэй дүүрэгт байрлах Баянбүрдийн тойргийг тохижуулах зайлшгүй шаардлага байгаа. Баянбүрдийн орчим бохирын цооногтой бөгөөд тус цооногт зуслан болон ойр орчмоос бохир авч ирж хийдэг гэнэ. Хотын төвд бохирын цооногтой байж болохгүй учраас цооногийг нь битүүлээд тохижилт, ногоон байгууламж хийгээд зуслангийн зам хүртэл тохижуулах шаардлагатай байгаа” гэсэн байх юм. Тэр үед Төв цэвэрлэх байгууламжид осол гарч хүний амь нас эрсдсэн осол гарч байлаа. Тэр үед С.Амарсайхан дарга ингэж хэлж байж.

ТӨВ ЦЭВЭРЛЭХЭД 8.1 ТЭРБУМААР ХИЙСЭН ЗАСВАР НЬ ЧАНАРГҮЙ БАЙСНААС ОСОЛ ГАРСАН

Төв цэвэрлэх байгууламжид үйлдвэрлэлийн осол гарч дөрвөн сайхан залуу амиа алдсан. 2016-2017 онд яг осол болсон газарт 8.1 тэрбум төгрөгөөр засвар хийсэн ч чанаргүй хийснээс болж энэ удаагийн осол гарсан. Үүнийг нуун дарагдуулахын тулд хүмүүс асуудал гаргаж ирж байна. Шүд эрүү нүүрний төвийг 4.8 тэрбум төгрөгөөр худалдан авсан. 1000 метр квадрат газрыг ийм үнийн дүнгээр авснаас 3000 метр квадрат байрыг авсан нь дээр гэж би НИТХ-ын тэргүүлэгчдийн дарга байхдаа буцааж байсан ч худалдан авсан. Үлдэгдэл мөнгийг нь өгөхгүй гэдгийг би хотын дарга болсноосоо хойш хэлсэн" гэсэн юм. Мөн ажил үүргээ гүйцэтгэж байгаад амиа алдсан ажилтнуудын ар гэрт хоёр өрөө байр, 36 сарын цалингийн нөхөн олговор олгох шийдвэр гарсан талаар мэдээлж байжээ.

Тэгвэл одоо эргэн тойрондоо бохирын үнэр тарааж байгаа энэ газрынхаа асуудлыг шийдээд өгөөч, Хотын даргаа. Хажуугаар нь гарах хооронд огиудас хүрэхээр энэ байгууламжийг яаралтай шийд. Хаврын улирал эхэлж, газар гэсч байгаа энэ цаг үед нийслэлчүүдийн ялгадсаар амьсгалж амьдармааргүй байна. Сүхбаатарын талбайн урд талын цэцэрлэгийг буулгахаас илүүтэй өнөөдөр цаг алдахгүй шийдвэл зохих асуудал чинь энэ байна.

Н.Саранчимэг