“За, маскаа зүүгээрэй. Маск бий юү. Бүгдэд нь амралтын өдрийн мэнд хүргэе. Та нар бүгдээрээ дасгал хийгээд явж байна уу. Сайн байна. Гэхдээ өнөөдрөөс эхлээд олуулаа нэг газраа цуглаж болохгүй шүү. Байдал ямар байгааг мэдэж байгаа биз дээ. Гараа ариутгаж байна уу, гар ариутгагч бий юү” гэж Үндэсний Соёл амралтын хүрээлэнд байгаа залууст шаардлага тавьж, гудамжинд шүлсэээ хаясан иргэнд “Та яагаад шүлсээ газар хаяж байна. Шүлсээ ил задгай хаяж болохгүй шүү. Тэр тусмаа шүдээ авхуулсан шүлсээ ил задгай хаяж болохгүй” хэмээн зөвлөж, байрныхаа гадаа хүүхдээ тоглуулж суугаа ээжид “Хүүдэдээ амны хаалт зүүлгэхийг” сануулж яваа хүн хол Улаанбаатар хотын дарга С.Амарсайхан. Залуус түүнийг тойрон “Та хэн бэ?” гэж асуух нэгэн ч байна. Мөн хаа хүрч байгааг нь сонирхох нөгөө ч байв. Хотын дарга хариуд нь “Би зүгээр салхилаад л явж байна” гэхэд “Аан,Та чинь хотын дарга С.Амарсайхан уу” гэж байх жишээтэй. Тэгж явах зууртаа тааралдсан хүмүүст амны хаалт өгч байлаа.

Энэ бүхний эцэст Улаанбаатар хотын дарга С.Амарсайхан: “Та бүхэндээ амралтын өдрийын мэнд хүргэе. Өнөөдөр Улаанбаатар хотынхоо Үндэсний цэцэрлэгт хүрээлэн болон хотын гудамжаар алхлаа. Хотынхоо иргэдтэй уулзлаа. Санал бодлоо солилцлоо. Нөхцөл байдал ямар байгааг та бүхэн маш сайн мэдэж байгаа. Тэгэхдээ иргэд маань назгай байна, задгай байна. Зарим иргэд хариуцлагатай байна. Гэхдээ дийлэнх олонх нь хэт назгайрсан, хариуцлагаа ухамсарлаагүй байгаа нь асар их ажиглагдаж байна. Бид ингэж санаа амарч боломгүй байна. Яагаад гэвэл өнгөрсөн хоёр сар хагасын хугацаанд бид нэгдсэн, бас чадсан. Өнөөдөр эрсдлийг хамтдаа бууруулж чадаж байгаа. Цаашдаа ч магадгүй, хоёр гурван сар тэвчиж чадах юм бол ирээдүйн олон арван жилийн сайн сайхан амьдралынхаа орчин нөхцлийг баталгаажуулах боломж бүрдэнэ гэж үзэж байгаа. Олон мянган албан хаагчид тухайлбал, эрүүл мэнд, цагдаа, онцгойгийхон, мэргэжлийн хяналт, зам тээвэр, хил гааль гээд маш олон салбарын олон мянган албан хаагчид улс орон, ард иргэдийнхээ аюулгүй байдлын төлөө өдөр шөнөгүй зүтгэж байгааг та бүхэн мэдэж байгаа. Зарим нь гэртээ долоо хоногоор, сараар очиж чадахгүй, хайртай үр хүүхдүүдтэйгээ уулзаж чадахгүй та бидний төлөө ажиллаж байгаа. Тэгвэл нөгөө талд нь бид энэ ажил, зүтгэлд нь хүндэтгэлтэй хандах, зайлшгүй шаардлага үүсч байгаа. Үндэсний аюулгүй байдлын зөвлөл, Засгийн газар, ЭМЯ, нийслэл болон бусад мэргэжлийн байгууллагууд бүгд шаардлагатай арга хэмжээг авч ажиллаж байгаа. Ялангуяа Засгийн газрыг зүгээс улс орны аюулгүй байдалтай холбоотой томоохон шийдвэр, шийдлүүдээ гаргаж ажиллаж байна. Улсын ажил төлөвлөсөн ёсоороо явдагаараа явах ёстой. Гэхдээ үүний хажуугаар бид өөр өөрсдийнхөө хариуцлагаа, иргэнийхээ үүрэг ухамсараар, зөв хандлагаар, хотын соёлоор харилцан хүндэтгэл, хамтын ажиллагаагаараа энэ халдварт коронавирусын эрсдлийг даван туулах ёстой. Та бүхэн маань бүгд хичээж байгаа. Гэхдээ өнөөдрийн энэ нөхцөл байдалд бид улам хичээх зайлшгүй шаардлага байна. Бид заавал хууль дүрэм, хатуу чанга дэглэм журам, хорио цээрээр бие биенээ цагдах хянах биш, бие биедээ үл итгэх нөхцөл байдлыг үүсгэх биш, харин бие биенээ гэсэн, хайртай дотны хүмүүсээ гэсэн, халамжит хань, үр хүүхдээ гэсэн, эх орноо гэсэн жинхэнэ иргэний сэтгэлээр, хотын соёлоор, хувь хүний хандлагаар энэ бүхнийг даван туулна” гэсэн юм.