Малчдаас ноолуурыг 100 мянган төгрөгөөр авна гэж ХХААХҮ-ийн Ч.Улаан сайд мэдэгдсэн. Тодруулбал, Монгол Улсын Засгийн газраас энэ онд ноолуурын түүний эд бэлтгэх, нөөц бүрдүүлэх, үнийг тогтвортой байлгах зорилгоор ноолуурын салбарт авч хэрэгжүүлэх зарим арга хэмжээний тухай тогтоол баталсан. Ингэхдээ ноолуурын үнийг 100 мянган төгрөгөөр тооцож, 5000 орчим тонн ноолуурыг үйлдвэрлэгчдэд нийлүүлэхээр тооцоолж байгаа. Улмаар малчдыг ноолуураа ченжүүдэд зарахгүйгээр, үндэсний үйлдвэрлэгчдэдээ өгөөрэй гэж анхааруулсан.

Гэтэл ноолуураа самнасан иргэд зарж борлуулж чадахгүй, борлууллаа гэхэд хямд үнээр өгөх эрсдэл гараад байгаа юм.

Уг нь ноолуур зөвхөн малчдын биш Монголын асуудал. Эмээлт захад ноолуурын үнэ 40-45 мянган төгрөг байна. Гэтэл Ерөнхий сайд, ХХАА-н сайд, ЗГХЭГ-ын дарга нар дэвших зүүн аймгуудад 105 мянгаар авч байна. Чуулганы хурал дээр Ч.Улаан сайд “Архангай аймгийн ноолуур 100 мянгад хүрэхгүй. Хэзээ Архангай аймгийн ноолуур 100 мянга хүрч байсан юм бэ” гэж хэлсэн.

ДУНДЖААР 100 МЯНГАН ТӨГРӨГ АВАХ ГЭСЭН. ҮҮНИЙГЭЭ ХЭРЭГЖҮҮЛЭХ ХЭРЭГТЭЙ

УИХ-ын гишүүн Санжмятав: Энэ шийдвэр харалган шийдвэр. Асуулга асууж, Ч.Улаан сайд руу дайраад өнгөрөгч болохгүй зүйл. Монгол Улсын Засгийн газар хариуцлагаа хүлээх ёстой. Ч.Улаан сайд улайхгүй асуултад хариулж, Засгийн газраа хамгаалж байна. Малчид амлаж, мал аж ахуйн үйлдвэр ажиллаж байгаа малчин түмний сүргийн бүтцээр хавартаа хэдэн ямаагаа самнаж, өвс тэжээлийн мөнгө өгч зунтайгаа золгодог. Намар махаа зарж эргэлтээ зохицуулж явдаг ард түмэн. Дунджаар 100 мянган төгрөг авах гэсэн. Үүнийгээ хэрэгжүүлэх хэрэгтэй. Одоо манайд хамгийн дээд тал нь 105 мянган төгрөгөөр эхэлж байна. Хэзээ бусад аймгуудад 105 авч эхлэх вэ. Засгийн газар энэ асуудлаа одоо шийдвэрлэх хэрэгтэй. Малчдын 50 хувийн 100 мянга тооцож өгөх шаардлагатай” гэлээ.

ОДОО 40-45 МЯНГААР ӨГӨХГҮЙ БАЙГАА ХҮМҮҮС ХҮЛЭЭЖ БАЙТАЛ ХАНШ ҮҮНЭЭС УНАВАЛ ХЭН ХАРИУЦАХ ВЭ

Одоо 40-45 мянгаар өгөхгүй байгаа хүмүүс хүлээж байтал ханш үүнээс унавал хэн хариуцах вэ? Ноолуур үнэгүйдвэл малчдын амьжиргаа муудна. Дагаад тэдэнд хүнс бараа нийлүүлдэг худалдаачид, зээл өгдөг дэлгүүрүүд, гурил, хүнс үйлдвэрлэгчид, шатахуун нийлүүлэгчдийн орлого буурна. Бараг малчин бүр ХААН эсхүл Төрийн банкны зээлтэй. Тэр зээлүүдийн чанар муудвал банкны асуудал гарч ирнэ.

Бүтэн жил хүлээсэн ноолуурын орлого нь санаанд хүрэхгүй бол малчин хүн мал махаа үнэд хүргэхийг хичээнэ. Махны үнэ нэмэгдвэл хот суурингийнхан хэцүүднэ гэх мэт олон асуудал байгаа эрхэм түшээд мэдэж байгаа болов уу. Ер нь бол ноолуурын үнэ бол зөвхөн малчдын бус Монголын асуудал шүү дээ. Төр засаг амласандаа хүрч 100, ядаж л 95 мянгаар авах хэрэгтэй.