Дулааны улирал болж барилгын ажлууд эхэлсэн. Гэвч энэ хаврын барилгын салбарын ажил үндсэн түүхий эд болох цементгүй байна. Өнгөрөгч долоо хоногоос эхлэн барилгын гол түүхий эд цементийн нийлүүлэлт багассаар тасрах хэмжээнд хүрээд буй нь энэ юм. Цементийн эрэлд гарсан иргэд зах худалдааны төвүүдээс нь хайгаад олоогүй цементээ нийгмийн сүлжээнд дэх барилгын холбогдолтой зар, нэгдсэн группээс хайн бухимдацгааж байна. Иргэдийн санал бодлоос ажиглахад цемент олдохгүй байгаа хоёр шалтгаан байгаа гэнэ. Нэг хэсэг нь Хятадын цементэд өндөр татвар тавиулж өөрсөддөө давуу байдал үүсгэсэн “МАК”, “МОНЦЕМЕНТ” эзэдтэй Монгол үйлдвэрүүд цементээ худалдаанд гаргах хэмжээгээ багасгаж санаатай хомсдол үүсгэж буй. Тийм учраас хувийн эрх ашгаа тэргүүнд тавьж хэрэглэгчийг хохироож байгаа бол үнэ бага, нийлүүлэлт тасалддаггүй Хятад цементээ оруулах хэрэгтэй гэж байна. Тэгвэл нөгөө хэсэг нь дундын зуучлагч буюу ченжүүдээс болж үнийн хөөрөгдөл, хомсдол үүсч байна гэцгээж буй юм. Хомсдолоос багахан зэргийн ашиг олоод өнгөрөх аль ч уеийн ченжүүдийн түрхэн зуурын түгээмэл шуналаар халхавчилсан голын нөгөө эргээс шидсэн чулуу байж ч мэднэ гэлцэнэ.

Хомсдол үүсгээгүй...

Мак үйлдвэрээс ийм мэдээллийг тавьсан. Мэдээллийн дагуу гэрээт борлуулагчдын зарим дугаараар холбогдлоо. Нэрээ нууцалсан эх сурвалжийн мэдээлснээр МАК-ийн үйлдвэрээс гэрээт салбарууддаа нийлүүлэлт хийгдэж байгаа боловч бага хэмжээтэй байгаа гэнэ. Хэд хоногийн өмнөөс Улаанбаатар хот руу цемент ирээгүй. Өчигдрөөс бага хэмжээгээр ирж буйг борлуулж байна. Нэг тонн цементийг 185 мянган төгрөгөөр худалдаалж байна. Хэсэг ачилт удсан нь үнэн. Өнөөдрөөс гайгүй болчих байх гэж бодож байна гэлээ. Иргэдийн худалдан авалтанд тогтоосон хязгаар байхгүй. Тогтоох хэмжээний цемент ч одоогийн байдлаар алга гэсэн юм. Үүний дараа бид МАК албаны хүнээс тодруулга авахаар холбогдсон боловч эргээд холбогдоно гээд хариу өгсөнгүй.

Цементийн тасалдалдлын мэдээлэлтэй холбогтойгоор Монцемент компани үйлдвэрийн байрнаасаа мэдээлэл өгсөн байв. Тус үйлдвэр савлагаатай 1 тонн цементийг 175 мянга, задгай цементээ 168 мянган төгрөгөөр худалдаалж байгаа тухайгаа мэдээлээд үйлдвэрлэл хэвийн тасралтгүй явагдаж байна гэж мэдээлсэн боловч албаны утсандаа хариу мөн өгсөнгүй.

АВААЧ ЭЭ ГЭЖ ГУЙДАГ ЦЕМЕНТ ЭНЭ ЖИЛ АЛГА

Гурвалжин худалдааны төвд цементийн худалдаа эрхлэгч иргэн Н.Өсөхбаяр “Өнөөдөр л гурвалжин дээр цемент гэдэг юм харагдаж байна гэсээр гурвалжингийн худалдаа эрхлэгчид биднийг угтлаа. Тус худалдааны төв дээр өнөөдөр 20 орчим вагон цемент буусан гэж байв. Энэ нь өдрийн эрэлтийнхээ 40 орчим л хувь гэнэ. Үнийн хувьд 270-280 мянга гэж байгаа ч зарах юм байхгүй гээд зарахгүй байна. Энэ цементээ цааш нь үнэтэй зарна гэсэн үг гэж тайлбарлалаа. Цементийн хомсдол болон үнэ өссөн тухай тэрээр цааш ярихдаа хомсдол, үнийн хөөрөгдөлд үйлдвэрлэгч ченжүүдийн оролцоо 50:50 тай байгаа гэж харж байна. Үйлдвэрлэгчийн зүгээс нийлүүлэлт багассан. Бага хэмжээгээр орж ирсэн цементийг ченжүүд дундаас нь аваад өндөр үнээр зарах зорилгоор худалдахгүй байгаа юм. Жижиглэн худалдаачдын хувьд тонн цементээс 5-10 мянган төгрөгийн ашиг хардаг. Цемент худалдан авагчдын эрэлт их. Олдохгүй байгаа учраас зарим нь худалдаа хийхээ больж ажил нь шахагдсан яаралтай цементийн хэрэгцээтэй цөөн улсууд худалдаачдын хэлсэн үнээр худалдан авахаас өөр аргагүйд хүрч байгааг хэллээ. Өнөөдөр тус худалдааны төв дээр Хятад цемент ачсан таван вагон орж ирсэн. Сүүлийн дөрөв таван жил Хятад цемент байгаагүй. Үнийн хувьд 270 мянга төгрөгөөр зарагдаж байх шиг байна” гэсэн юм.