Эрүүл мэндийн яамнаас COVID-19 халдварын цаг үеийн асуудлаар мэдээлэл хийлээ.

ГУАНЖОУ-УБ, БЭЭЖИН-УБ ЧИГЛЭЛИЙН ХОЁР ОНГОЦОНД НИЙТ 5 ТОНН АЧААГ АРИУТГАЛД ОРУУЛСАН

ЭМЯ-ны хэлтсийн дарга Д.Нарангэрэл "Коронавируст халдвараар 4,250,000 хүн өвчилж, 286,000 хүн нас барсан байна. Мөн 1.5 сая хүн эдгэрч эмнэлгээс гарсан бол 2.4 сая хүн эмнэлэгт хэвтэн эмчлүүлж байгаа.

Сүүлийн 24 цагт дэлхий дахинд 72,000 хүн шинээр халдвар авч, 3,000 гаруй хүн нас барсан байна.

Манай улсын хувьд өнөөдрийн байдлаар 27 хүн ХӨСҮТ-д хэвтэн эмчлүүлж байгаа. Өчигдөр ЗӨСҮТ-ийн баг ачааны хоёр онгоцыг тээвэрлэн ирсэн ачаатай нь ариутгасан. 24 цагийн хугацаанд 119 дугаарт 241 дуудлага ирж, зөвлөгөө мэдээлэл авсан. Гадаадын 6 улсаас 37 дуудлага ирлээ. Тухайлбал, АНУ, ОХУ, Франц, БНТУ, БНСУ, БНЭУ-аас 10 хүн холбогдож мэдээлэл зөвлөгөө авсан байна.

Дэлхий дахины мэдээллийг харвал өвчлөлийн 43-50 хувь нь шинж тэмдэггүй хэлбэрээр явж байна. Шинж тэмдэггүй хэлбэрээр өвчлөх явцдаа олон хүнд халдвар тараах, өвчлөөд эдгэрсэн ч гэсэн коронавирусийн дархлал тогтох нь бага байгаа учраас хүн болгон би өртөмтгий гэж үзэн анхаарал болгоомжтой байх хэрэгтэй сануулж байна.

Хөл хорионы дэглэмээ сулруулах цаг болоогүйг Ухань хотын жишээ харуулж, тус хотод дахин халдвар гарлаа. Мөн халдварын тархалтыг хяналтандаа авсан гэж байсан БНСУ-д дахин халдвар гарч 70 хүн өвчлөн 2 хүн нас барсан байна. ХБНГУ-д хөл хорио суларсны дараа өвчлөл нэмэгдэж байгаа. Иймээс анхаарлаа сулруулж болохгүй гэж ЭМЯ-наас анхааруулж байна. Манай улсын хувьд нийт 42 тохиолдол бүртгэгдсэнээс 14 хүн эдгэж, дараагийн хяналтад орсон. 28 хүн ХӨСҮТ-д эмчлүүлж байна. Тэдний биеийн байдал хэвийн.

Өчигдөр Зоонозийн үндэсний төвөөс Гуанжоу-УБ, Бээжин-УБ чиглэлийн хоёр онгоцонд нийт 5 тонн ачааг ариутгалд оруулсан. Одоо 982 хүн ажиглалтад байна. 450 иргэн гэртээ тусгаарлагдаж байгаа. 119 утсанд нийт 241 дуудлага ирсэн” гэлээ.

80 ХҮНД ШИНЖИЛГЭЭ ХИЙХЭД КОРОНАВИРУС ИЛРЭЭГҮЙ

ХӨСҮТ-ийн ерөнхий захирал Д.Нямхүү: Өнөөдөр ХӨСҮТ-өөс нэг хүн эдгэрч гарч дараагийн шатны ажиглалт руу шилжиж байна. Ингээд эдгэрсэн хүний тоо 15 болж байгаа. Мөн ойрын хугацаанд хоёр хүн эмнэлгээс дараагийн шатны ажиглалт руу шилжих дөхсөн. Тухайн иргэдээс таван төрлийн сорьц авч 2-3 хоног давтан шинжлээд халдвар илрэхгүй бол дараагийн шатны хяналт руу шилжүүлж байгаа.

Эмчийн найдвартай туслагч, хамтран ажилладаг алтан гартай, зөөлөн цагаан сэтгэлтэй бүх сувилагч, бага эмч нартаа Дэлхийн сувилагч, бага эмч нарын баярын мэнд хүргэе. Та бүхэндээ эрүүл энх, сайн сайхан бүхнийг хүсье.Тавдугаар сарын 11-ний өдөр 80 хүнд шинжилгээ хийхэд коронавирус илрээгүй.