Хэнтий аймгийг түүхэн аялал жуулчлалын бүс нутаг хэмээн зарласантай холбогдуулан Азийн хөгжлийн банкны болон бусад санхүүжилтээр шинээр хийж буй бүтээн байгуулалт сумдад ч өрнөж байна.

Үүнээс дурьдвал, Хэнтий аймгийн Батноров, Норовлин, Биндэр, Дадал суманд түүхийн танилцуулга цогцолбор байгууламжууд баригдаж буй гэнэ. Тодруулбал, 1206 онд одоогийн Биндэр сумын нутагт эзэн Чингис хаан их хуралдайг хуралдуулж, Монгол Улсаа тунхагласныг бэлгэдэн "Монгол төрийн их хуралдай орд" цогболборыг тус газарт нь байгуулж байна. Тус газарт Эзэнт гүрний тулгын чулуу тавигдсан түүхэн газрыг эрдэмтэд сурвалжлан олсноор 1994 онд хөшөө босгосон байдаг юм.

Аялал жуулчлалын бүс нутгийг хөгжилд хөтлөх 250 км хатуу хучилттай авто замын барилгын ажлыг эхлүүлж, Биндэр суманд Онон гол дээр дотоодын аж ахуйн нэгж бие даан гүүр барьж байна. Харин Баян-Адарга Дадал сумыг холбосон Онон голын 150 метр төмөр бетон гүүрийг улсын төсвийн хөрөнгө оруулалтаар хийж, ашиглалтад оруулжээ.

Баян-Адарга сумын иргэдийн 40 гаруй хувь нь Онон голын хойд талд амьдардаг бөгөөд голын урсцаас хамаарч зорчих хөдөлгөөн хийдэг байсан хүндрэл энэхүү гүүр баригдсанаар арилсан байна.

Түүнчлэн Монгол Улс, ОХУ-ын худалдаа, эдийн засгийн шинэ бүс бий болох төдийгүй Хэнтий аймагт Засгийн газраас хэрэгжүүлэх түүхэн аялал жуулчлалын бүс, томоохон цогцолборууд, түүнийг холбох авто замын трассын нэвтрэлт гүүр ашиглалтад орсноор нэмэгдэнэ хэмээн тооцоолж буй аж.