Үерийн улмаас хоёр хүн амиа алджээ

Н.Алтанцэцэг / Орон нутаг

2020 оны 6 дугаар сарын 21-ний өдөр баруун аймгуудын нутгийн хойд хэсэг, төв, зүүн аймгуудын нутгийн зарим, говийн аймгуудын нутгийн зүүн хэсгээр 0.0-69.0 мм бороо орсны улмаас Төв аймгийн Зуунмод, Сэргэлэн, Говьсүмбэр аймгийн Сүмбэр суманд үер бууж, үерийн улмаас айлууд болон автозам усанд автаж, иргэд усанд боогдсон дуудлагаар дээрх аймгуудын Онцгой байдлын газрын алба хаагчид ажиллалаа. Үерийн улмаас 2 хүн амь насаа алдаж, 4400 орчим мал хорогдож, 381 айл үерт автаж, 19 гэр үерт урсаж, 83 хашаа нурсан байна.

Тухайлбал,

Төв аймгийн Сэргэлэн сумын Эрдэнэ-Уул багийн “Жаргалантын булаг” гэдэг газар /сумын төвөөс баруун хойд зүгт 12 км-т/ нийслэлийн Хан-Уул дүүргийн 12 дугаар хорооны харьяат иргэн У /13 настай, эрэгтэй/, Хайрхан багийн “Тэрвий” гэдэг газар /сумын төвөөс баруун урд зүгт 77 км-т/ Дундговь аймгийн харьяат иргэн С /23 настай, эрэгтэй/ үерийн усанд осолдож нас барсан тухай дуудлагаар тус аймгийн Онцгой байдлын газрын алба хаагчид ажиллаж цогцсыг гаргаж Цагдаагийн байгууллагад шилжүүлэн өгсөн.

Төв аймгийн Сэргэлэн сумын Хайрхан багийн “Довын хайрхан”, “Ширээгийн булаг”, Баян сумын “Их-Элгэн” гэдэг газар нутаглаж байсан малчин М-ын 900 бог, 4 бод, Б-ийн 700 бог, Б-ийн 800 бог, М-ийн 1000 орчим бог мал үерт өртөж хорогдсон.

Төв аймгийн Зуунмод суманд 181 айлын гэр, 4 орон сууцны барилгын зоорийн давхар усанд автаж, 6 гэр урсаж, 53 хашаа нурсан, мөн аймгийн Алтанбулаг суманд 200 өрх айл усанд автаж 30 хашаа нурж, 10 гэр урссан тухай дуудлагаар тус аймгийн Онцгой байдлын газрын алба хаагчид ажиллаж, 7 хүүхэд, 17 том хүнийг үерийн уснаас эсэн мэнд аварч, 4 орон сууцны барилгын зоорийн давхарын усыг соруулж, 57 автомашин уснаас татан гаргасан.

Говьсүмбэр аймгийн Сүмбэр сумын Малх багийн “Мухар” гэдэг газар уруйн үерийн улмаас тус сумын иргэн А-ын 4 ханатай гэр, 1000 орчим бог мал, бага оврын ачааны автомашин, мөн багийн “Банзарын хоолой” гэдэг газар иргэн Д-ийн 6 ханатай гэр, 2 мотоцикл, мөн багийн Баянбулаг гэдэг газар иргэн Г-ийн 5 ханатай гэр үерт урссан.

Мөн Говьсүмбэр аймгийн төвөөс хойд зүгт 75 км-т “Ланд крузейр” загварын суудлын автомашинтай БНХАУ-ын харьяат 2 иргэн, Малх багийн “Банзарын хоолой” гэдэг газар 3 зорчигчтой суудлын автомашин усанд суусан тухай дуудлагаар тус аймгийн Онцгой байдлын газрын алба хаагчид ажиллаж, иргэдэд тусламж үйлчилгээ үзүүлсэн гэж Онцгой байдлын ерөнхий газраас мэдээллээ.


Сэтгэгдэл

Зочин [66.181.169.162] 2020-06-22 03:57:49

Жил болгон бороо ороход энэ айлууд усанд автдаг. Энэ жил бүр ширүүн устай бороо орсон. Зуунмод сумын засаг дарга ИТХ болон багийн засаг дарга гэж байдаг бол эдгээр айлуудад айх аюулгүй амьдрах орчинг бүрдүүлж өгмөөр юм.

Зочин [66.181.169.162] 2020-06-22 03:49:43

Төв аймгийн Зуунмод сумын засаг дарга 3-р багийн үерийн ус урсдаг газар айл өрхөд газар өгч суурьшуулсаныг залруулах хэрэгтэй. Тэдгээр хүмүүс 1 хашааг 3н сая төгрөгөөр худалдан авсан. Бороо орох болгонд айдас хүйдэс дунд тэдгээр айлуудыг амьдруулах уу. Аль эсвэл нүүлгэн штлжүүлэлт хийж ямар ч цаг үед тайван амар амгалан амьдрах эрх нөхцөл бололцоог нь хангаж өгөх хэрэгтэй.

Зочин [66.181.169.162] 2020-06-22 03:46:52

Төв аймгийн Зуунмод сумын 3-р багийн нутаг дэвсгэрт үерийн аман дээр газар өгч маш олон айл өрхийг хохироож бна. Энэхүү газраар үерийн ус урсдаг гэдгийг мэдсээр байж газар өгсөн мөн тэр газрын доод талаас намаг гардаг. Ийм газар ямар ч судалгаагүйгээр газар өгсөн хүмүүст хариуцлага тооцож тэдгээр айлуудыг нүүлгэн суурьшуулах хэрэгтэй. Маш олон айл өрх тэнд байшин барьж төвхөнөсөн бгаа. Бүгдийг нүүлгэн шилжүүлэх хэрэгтэй.


3 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
3 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.