Улсын Их Хурлын 2020 оны 10 дугаар сарын 2-ны өдрийн хуралдаанд хуулийн дагуу Ерөнхий сайд У.Хүрэлсүх “Өвөлжилтийн бэлтгэл хангах ажлын явцын талаар” мэдээлэл хийх байсан бөгөөд энэхүү мэдээлэлтэй холбоотойгоор УИХ-ын чуулганы хуралдааны Дэгийн тухай хуулийн хэд хэдэн заалтыг зөрчжээ. Тиймээс энэ асуудлаар Ардчилсан намын бүлгээс УИХ-ын дарга Г.Занданшатарт анхааруулга хүргүүлсэн байна.

Ерөнхий сайдын мэдээлэл хийх цагт зөвхөн УИХ дахь сөрөг хүчин санал дүгнэлтээ гаргаж, цөөнхийн гишүүд асуулт асуух хуулийн заалттай. Гэтэл сөрөг хүчний хуулиар олгогдсон хяналтын үүргээ гүйцэтгэх эрхэд ноцтой халдаж эрх баригчид ийнхүү дураар авирласан үйлдэлд харамсаж байгаагаа илэрхийлэн, цаашид энэ мэт ноцтой зөрчил гаргахгүй байхыг анхааруулжээ.

Мөн эрх баригчид Монгол Улсын Их Хурлын чуулганы хуралдааны Дэгийн тухай хуульд сөрөг хүчний хяналт тавих эрхэд халдсан, Ерөнхий сайдын дураар авирлах эрхийг баталгаажуулах заалт бүхий хуулийн төслийг өргөн барьсныг дэмжихгүй байгаагаа илэрхийлсэн байна.