Ковидын тохиолдол хоногт 30 бүртгэгдэж эхлэхтэй зэрэгцээд дөнгөж төрсөн нэгэн эмэгтэйг нимгэн хувцастай зөөвөрлөснөөсөө болж Ухнаагийн Хүрэлсүхийн Засгийн газар бүрэн бүрэлдэхүүнээрээ огцорсныг санаж байна. Ер нь нийгэмд ингэж л ойлгуулсан. Нэг хоногт 30 гаруй тохиолдол бүртгэгдэх нь тухайн Засгийн газрын хувьд байж боломгүй үйл явдал болж, тохиолдлыг хумьж чадахгүй учраас чаддаг хүмүүст нь ажлаа хүлээлгэж өгсөн байх. Мөн дунд, доод түвшинд завхрал гарч төрөөд 2 хонож байгаа эмэгтэйг зөөвөрлөхдөө дааруулсан гэдэг үндэслэлийг өмнөө барьж тэд хариуцлагаа үүрсэн. Яг л ингэж ойлгуулж, ойлгож Засгийн газар огцорч Л.Оюун-Эрдэнэ, С.Амарсайханаар толгойлуулсан баг Монголын улс төрийн цээжинд тодорсон.

Шинээр бүрдсэн Л.Оюу-Эрдэнийн Засгийн газар энэ бүх алдаа завхралыг нэн тэргүүнд засах үүрэгтэй. Туйлдсан олноо тэнхрүүлж, нимгэрсэн хэтэвчийг зузаатгаж, халдсан Ковидыг хөөн зайлуулах нь тэдний хийх ажил.

Чиг үүргээрээ бол Л.Оюун-Эрдэнэ болоод Б.Жавхлан нар иргэдийнхээ идэх хоолонд анхаарч С.Амарсайхан, С.Энхболд нар эрүүл мэндийг тэтгэн тойглох хамгийн чухал хариуцлагатай албанд тохоон томилогдсон. Оук, Жавхлан хоёрын хэрэгжүүлж байгаа 10 их наядын хөтөлбөрт дүн тавих хугацаа арай болоогүй байна. Гэхдээ ерөнхий дүнгээрээ 10 их наяд төгрөгийн зээлийн систем нь АНУ-ын моргейжийн хөтөлбөрөөс ч эмзэг, хэврэг, жинхэнэ зорилтот бүлэгтээ хүрэх системгүй учраас нурах, дампуурах хамгийн өндөр магадлалтай хөтөлбөр болон ажиглагдаж байна. Энэ зээлд хамрагдахын тулд банкнаас зээл авахааргүй хэмжээний материал, хөрөнгө бүрдүүлж байж хамрагдах боломжтойг хүн бүр ярьж байна. Гэхдээ алдаа завхралууд хаана байна, тэднийг зөв оношилж засч, сайжруулж, зорилтот бүлэгт хүргэж чадвал хамгийн хэрэгтэй хөтөлбөр мөн.

Тэгвэл Ковидоос ард түмнээ хамгаалах даалгаварыг авсан С.Амарсайхан, С.Энхболд нарын ажилд ахиц дэвшил гэж алга. Хүмүүс эсвэл нэр нүүрээ нуусан ботууд сайн ажиллаж байгаа гээд шаагилдаад эхлэх байх. Үнэндээ 24 цагт 575 иргэн ковид тусна гэдэг нь тэдэнд дүн тавьчихаж байгаа хэрэг. 575 тохиолдлын ард ойролцоогоор 5 хавьтагч гэж тооцоод түүний 50 хувь нь өвчин тээгч болсон гэдэг магадлалаар авч үзвэл маргааш тохиолдлын тоо 1000 давна. Муу ёрлож байгаа юм биш. Нөхцөл байдал яг ийм байна. Монгол Улс тэр аяараа голомт болчихлоо. Эдийн засгийн бүс буюу Өмнөговьд хүртэл дэлгэрчихлээ. Энэ бүхэн бол уруудан доройтол, уналт. Хятадууд манайхаас татан авах уул уурхайн бүтээгдэхүүний импортдоо хязгаарлалт хийж, хяналтаа чангатгасан. Ажлаа хийж чадаагүй С.Амарсайханы балаг энэ. Л.Оюун-Эрдэнийн эдийн засгаа аврах мөрөөдлийг С.Амарсайхан нөгөө талаас нь хүчтэй дэлсээд өглөө гэсэн үг.

Эдийн засгаа сэргээх хөтөлбөртэй хоршоод эрүүл мэндээ хамгаалах ажил сайн хийгдсэн бол энэ Засгийн газарт алга таших нь ойлгомжтой. Гэвч 10 их наядын зээлийг тарааж байгаатай зэрэгцээд орон даяар Ковидыг ч цацаж хаясан С.Амарсайхан Монголыг жинхэнэ аллаа. Хаврын сүүл сараас эхлээд өвөлжин, хаваржин хоригдсон. Хоригдох тусам дэлгэрээд байна.

Одоо гурван арга зам байна. Ажлаа хийж чадахгүй байгаа хүмүүстээ хариуцлага тооцоод асуудлыг шинээр төлөвлө. Эсвэл ард түмэн, эдийн засгаасаа айгаад байлгүй богино хугацааны хатуу хөл хорио тогтоогоод ковидын тархалтыг бүрэн тасалж бүх иргэнээ вакцинжуул. Чадахгүй юм бол зөнд нь орхи, сул тавь. Угаасаа С витамин уулгахаас өөр эмчилгээг Монголын эрүүл мэндийн салбар хийж чадаж байгаа ч биш. Нарийн дээрээ тулвал айгаад байх өвчин мөн ч юм уу биш ч юм уу. Хэт их сүржигнэж өвчин зовлонг улс төртэй хутгасны чинь шанд ард түмэн чинь үнэхээр цөхөрлөө. Ковидын үеийн санхүүгийн зарцуулалтдаа хөндлөнгийн эсвэл гадны аудит оруулаад шуурхай штабаа татан буулга. Яагаад гэвэл та нар ажиллаж чадахгүй гэдэг чинь тодорхой болчихлоо. С.Амарсайхан дарга бүх эрх мэдлийг өөртөө төвлөрүүлээд эхэлсэн сураг байгаа. Тэндээс шалгалтыг эхэл.