Хуралд 21 аймгийн сүм хийд, бусад түүхэн уламжлалт хийдийн нийт 34 тэргүүн хамба лам нар оролцож байна. Хурлаар коронавируст халдварын цар тахлын үе дэх сүм хийдийн дотоод зохион байгуулалт, үйл ажиллагааны талаар ярилцаж, өнгөрсөн хугацааны хүмүүнлэгийн үйл ажиллагаа, бурхны шашныг түгээн дэлгэрүүлэх талаар олон нийтэд хандсан нийгэмд үр өгөөжтэй ямар ажил хийснээ тус бүр танилцуулж байна.

Мөн цаашдаа бурханы шашин соёлыг төрийн бодлоготой уялуудан нийтэд түгээн дэлгэрүүлж байх, ингэхдээ соёлын өв, боловсролыг түгээх байгаль орчноо хамгаалах талаар төрийн хууль дүрэм, шашны өв уламжлалыг даган уялдуулж хэрэгжүүлэх, төр, засаг, иргэдтэй хэрхэн хамтран ажиллах талаар хэлэлцэж буйг Монголын Бурхан шашинтны төв Гандантэгчэнлин хийдийн Хэвлэл мэдээлэл, олон нийттэй харилцах албаны дарга н.Одгарьд мэдээллээ.

Тэргүүн лам нар жилд, хавар, намар 2 удаа цуглаж хуралддаг байна. 2017 оноос зөвлөлийн хурлаар ойрын жилүүдэд хийх ажлын төлөвлөгөөг 3 жилээр баталж, хаврын улирлын хуралд тайлагнаж байхаар тогтжээ.

Байгаль хамгаалах, иргэдийн тав тухтай амьдрах орчныг бүрдүүлэх талаар хамгийн сүүлд Гандантэгчэнлин хийдээс нийслэлийн захиргаатай хамтын ажиллагааны санамж бичиг байгуулаад байна. Тодруулбал, Гандангийн дэнжийн хөрсний бохирдлыг бууруулах, иргэдийн эрүүл, аюулгүй амьдрах орчныг бүрдүүлэх, экологийн тэнцвэрт байдлыг хангах чиглэлээр хамтран ажиллахаар болсон юм. Гандангийн дэнжийн гэр хорооллын айл өрхийн нүхэн жорлонд ариутгал халдваргүйтгэл, ашигтай бактери хийх ажлыг хамтран зохион байгууллаа. Мөн Гандангийн дэнжид амьдарч буй Баянгол дүүргийн 16 дугаар хорооны 800 гаруй өрхөд хашаандаа мод тарих, цэвэр агаартай, эрүүл орчин бүрдүүлэхэд дэмжлэг үзүүлэх зорилгоор 5500 шинэс модны суулгац өгчээ.