Гудмаар хөлхөлдөн бөөгнөрөх идэр, залуу насны эрчүүд нүд нь гөлөөнтөж нүүр зэврүүтээд амьдралын галгүй болцгоожээ. Өнөө маргаашийн шар тайлах юм л тэдний зорилго болсон мэт. Нийтийн тээврийн зогсоол бүр дээр нэг хоёроороо аль нэг төв, худалдааны газрын үүд хаягаар сүрэглэн харагдах. Арваад эрэгтэйн дунд ганц хоёр эмэгтэй хүн харагдах. Энэ бол амьдралд халтирч архинд дөнгөлүүлсэн хэсгийн ерөнхий дүр зураг. Харин энэ зам руу хөл алдар хэчнээн мянган залуус итгэл найдвараа алдан бүдэрч яваа бол?

Агуа түүхтэй Монголын ачит үрс архинд живж айл гэр эзгүйрч, үр хүүхэд өнчрөхийн цаад учир юу вэ?

Монгол залуус архинд тэгтлээ дурлаж, ажил амьдралын мөр хаалгүй шилэн лонх хүзүүдэн л тавилантай, тийм л хүсэл эрмэлзэлтэй юм гэж үү? Тэднийг юу ийм болгов? “1990 онд манай улсын хүн амын 2.36 хувь нь архинаас хамааралтай буюу архинд донтох эмгэгтэй гэсэн судалгаа гарч байжээ. Харин 2019 онд энэ тоо 4.44 хувь болж өссөн нь дэлхийн бусад оронтой харьцуулахад хамгийн өндөр хувиар нэмэгдсэн үзүүлэлт болж байна”

Архидалтын гол шалтгаан юу вэ? Архины үйлдвэрийн бизнес ашигтай, авлигалжсан хар нийгэмд хулгайн тогтолцоонд шантарсан ард түмний сэтгэл зүй мухардах гэх мэт суурь шалтгаан байна.

Саяхны жишээгээр арван нэгэн халуун амь бөөнөөрөө угаартаж нас баржээ. Тэд архи уудаг байсан учраас “үхэж цэвэрлэгдлээ” гэх ойлголтыг нийгэмд хүчээр төрүүлж байна. Үүнийг л архидалтын гол шалтгаан гэж үзэхээр. Өөрөөр хэлбэл хүнээ анхаардаггүй харгис нийгэмд хүн шиг явж, мөс чанараа гээгээгүй нь хамгийн түрүүнд архинаас хамааралтай болж байна. Гэтэл Монголчууд дэлхийд хүнлэг чанарын үзүүлэлтээрээ тэргүүлэгч. Үндэстнээрээ архичин болох ёстой юу?

Д.ЭНХБАТ