Тодорхой тооны цагдаагийн албан хаагч насанд хүрээгүй охиныг хүчирхийлсэн, СУИС төгссөн олны танилууд оюутан ахуйдаа хүчирхийлэл үйлддэг байсан гэх хоёр ч дуулиантай асуудал сошиал орчинд яригдаж байна. Эдгээр асуудлуудын аль нь ч хууль хяналтын байгууллага чимээгүйхэн нийгмийн сэтгэл зүйд нөлөөлөхгүйгээр бодит асуудалд үнэн зөв шударгаар хуулийн дагуу шийдвэрлэх хууль эрх зүйн орчин манайд хангалттай. Гэтэл яагаад заавал хэн нэгэн этгээд шүгэл үлээж, заавал яагаад нийгмийн анхааралд өртүүлэхгүй л бол асуудал хав дарагдаад өнгөрөх болзошгүй нөхцөл байгаа вэ?

Хүчирхийллийн асуудал нийгмийн эмзэг сэдэв хэдий ч аймшигт хэрэг гарангуут л нийгмээрээ асуудлыг авч хэлэлцэж бөөн шуугиан болох нь аль ч талаараа эрүүл үзэгдэл бус. Ардчилал, эрх чөлөөний ойлголт явцуурвал эмх замбараагүй байдал үүсэхэд ойрхон байдаг.

Авлигалын асуудалд дөжирсөн байдалтай ханддаг мөртлөө аливаа хүчирхийллийг сенсацилж чаддаг энэ байдал нь зориудын турхиралтын зарим шинжийг агуулж байгааг анзаарахгүй орхиж болохгүй. Өөрөөр хэлбэл хуулийн дагуу шалгагдаад зохих хариуцлага яригдаж болохуйц. Сошиал орчинд аливаа шуугиан тарьж олонхын сэтгэл санааг жижиг асуудлаар урхидан араар нь томоохон авлигалын асуудал чимээгүй өнгөрдөг байдал үргэлжилсээр.

Хүчирхийлэл байж болзошгүй нийтээрээ жигших ёстой, хуулийн хариуцлага чангарах шаардлагатай бодит асуудал мөн. Гэхдээ нийгмийг доройтуулагч суурь хүчин зүйлийн нөлөөг багасгаж, улс төрд ноёлсон “хүчирхийлэгч, хулгайчдыг” хариуцлага хүлээлгэх нөхцөлийг бүрдүүлмээр.

Д.ЭНХБАТ