13 настай охиныг цагдаагийн албан хаагчид хүчирхийлсэн гэх хэрэг, СУИС-ын курс хоорондын ялгаа буюу дээрэлхэлт, дарамт хүчирхийллийн, олон жил хүчирхийлэлд өртсөнөө дөнгөж өчигдөрхөн мэдэгдэж нийгэмд сенсац үүсгээд буй дуучин Мишээлийн мэдэгдэл гэх мэтчилэн олон нийтийн дунд шуугиан тариад буй олон эрүүгийн шинжтэй гэмээр хэргүүд ойрын хоёр гурван өдөр хэлэлцэгдэж байна. Хууль шүүхийн байгууллагын хүрээнд бус нийгэмд ил гарч, нийтийн сүлжээ, хэвлэл мэдээллийн байгууллагуудаар уг асуудал хөөргөдөв.

Хүчирхийлэлд өртөгсөд тэр даруй асуудлыг зохих байгууллагуудад хандан хохирлоо барагдуулалгүй нэлээд хожуу зарим нь шүгэл үлээх хэлбэрээр асуудал сөхөгдөж байгаа нь олон хүчин зүйлийн шалтгаантай байж болох юм. Хүчирхийлэгч этгээд нийгэмд нөлөөтэй байгууллагын төлөөлөл эсвэл олны танил байгаа эдгээр гурван тохиолдол нь далд хүчирхийллийн тэр дороо ил болдоггүй нэг учир шалтгааныг өгүүлэх шиг.

Өрнөж буй асуудлыг хөөвөл дуучин И. Мишээл өөрийн фейсбүүк хуудсандаа “…Ц.Сарнай( Sweetymotion хамтлагийн дуучин) Б.Чинбат( МУГЗ) гэх хүмүүстэй 7,8 жилийн амьдралаа үрээд, сэтгэл санаа, мөнгө төгрөгөөрөө хохироод эцэст нь хамтран ажиллахаа больсон…” тухайгаа тодорхой бичиж үлдээсэн ба 9 цагийн өмнөх уг мэдэгдэлд Сарнай, Чинбат нарын зүгээс одоо болтол хариу тайлбар гаргаагүй байна. СУИС-ын оюутан байсан гэх Khandma Khandma гэх хаягаас Б.Мишээл, Жүжигчин Б.Мишээл, Б.Номин, Т.Бадамжав нар СУИС-ийн оюутан байх үедээ доод дамжааны дүү нараа дээрэлхэж, сургуулийн хүчирхийлэл үйлддэг байсан талаар “... хамрыг нь хугартал цохисон, 100 төгрөг өгч архинд гүйлгэдэг байсан, сургуулиас өөрийн хүсэлтээр гар гэж дарамталсан байсан” гэх зэргээр бичжээ.

Жүжигчин Б.Мишээл: СУИС-ийн бүх оюутан тэр дэгийг үзэх үедээ үздэг. Би бол энийг ямар нэгэн сенсац дарах гэж гаргасан зохион байгуулалттай худал мэдээлэл гэж бодож байна гэх тайлбарыг гаргаад байгаа нь олон нийтийн дунд “хүчирхийлэл үйлддэг байснаа баталлаа” гэх хардлагыг лавшрууллаа.

Харин цагдаагийн албан хаагчид бэлгийн хүчирхийлэл үйлдсэн талаарх мэдээлэлд ЦЕГ-ын мөрдөн байцаах албаны дарга Н.Мишигдорж: Хэрэв алба хаагчид гэм буруутай нь тогтоогдвол өмгөөлж, хамгаалах ёс зүй цагдаагийн байгууллагад байхгүй. гэж мэдэгдэв. Улмаар гэмт этгээдүүдийг баривчлахаар бүрэлдэхүүн гарчээ. Эдгээр асуудлуудаас харвал нийгмийн түүчээ бүлгийн төлөөлөл гэж хэлж болох хүмүүсээс ийнхүү балмад үйлдлүүдийн үнэн бодит байдал тогтоогдох н цаг хугацааны асуудал. Харин нийгмийн зэрлэгшилд хүргэж буй суурь шалтгаануудтай хэрхэн тэмцэхийг харьяа байгууллагууд анхаарч ажиллаасай.