УИХ-ын ээлжит сонгуулийн сурталчилгаа эхлээд 3 хонолоо. Бүсчилсэн сонгуулийн сурталчилгааны нээлт аймгийн төвүүдэд эхлэхэд төв талбайд мэргэжлийн дуу оруулагч, хөтлөгчдийн хоолойгоор МАН-ын коммунизмыг сурталчилсан өнгө аястай ухуулгыг хүнгэнүүлж, араас нь рекламын хоолойгоор авлигачдад хариуцлага тооцож ард түмэн ялна гэх утгатай зүйл сурталдана. Гэтэл “ард түмэн ялна” гэх уриатай энэ удаагийн сонгуульд орж буй эрх баригч нам хүчээ нэгтгээд үнэмлэхүй олонхоор сүүлийн 8 жил засаглалаа Үндсэн хуулийг зөрчиж ард түмний эрхэнд халдсан хэд хэдэн үйлдлийг хийжээ.

Монголд хүний эрх эрх чөлөө боомилогдож хэвлэл мэдээллийн хэрэгслийг ч чөлөөтэй мэдээ мэдээллүүд бэлтгэн нийтлэхэд төрийн зүгээс хааж хязгаарлаж байгааг дотоодод бус гаднын байгууллагууд ч дүгнэлт өгч анхааруулжээ. Монгол Улс энэ оны дэлхийн хэвлэлийн эрх чөлөөний индексээр 59.17 оноогоор 90 дүгээрт бичигдсэн байна. 2020 онд 73 дугаар байрт эрэмбэлэгдэж байсан шүү дээ.

Тэгэхээр энэ бол асар том ухралт. Хэвлэлийн хагас эрх чөлөөтэй хэвээрээ байгаа гэсэн үг. Өнгөрсөн хоёр жил гаруйн хугацаанд ковид цар тахалтай холбоотойгоор хэвлэлийн эрх чөлөөг хаан боогдуулах, олон нийтийн мэдэх эрхийг хязгаарлах хандлага, бодитой зөрчлүүд олон гарсан.

Гэтэл ийнхүү эрх чөлөөний үзэл санаанд хориг тавьж авлигачдад хариуцлага тооцож чадаагүй мөөртлөө ард түмэн хэнийг ялах ёстой болов? Сүүлийн гуравхан өдрийн уулзалтуудын дүр зургаас харвал Ардчилсан намынхан ард түмэнтэй илүү ойр элгэмсэг, эрх баригчид хүйтэн хөндий ихэмсэг дүртэй уулзаж байна. Олон үйлдвэр барьж татвар нэмэхгүй, хөгжлийн үсрэлт авч ирэхээр мөрийн хөтөлбөр дэвшүүлэн 8 жил засагласан эрх баригчид одоо тайлангаа тавьж иргэдтэй уулзах л үлдээд байна.