Галаа багш, улс төрч болох шийдвэр гаргажээ. Ийм шийдвэр гаргах амар байгаагүй байх аа. Хувиа бодсон бол хэзээ ч ийм шийдвэр гаргахгүй л байсан болов уу? Ухамсарт амьдралаа боловсролын төлөө зориулсан хүн шүү дээ... Боловсрол гэж юу вэ? гэсэн асуултад минь “Амьдрах чадвар юм даа. Малчдад зуд зурхан, ган гачиг юу л тулгарна даваад гарчихдаг шүү дээ. Сурсан мэдсэнээ амьдралдаа хэрэгжүүлж чаддаг хүнийг л боловсролтой хүн гэж хэлнэ” хэмээн товчхон хариулсан юм. Японд суралцаж байхдаа хөгжлийнх нь нууц ерөөсөө л “хүчтэй” ахлах сургууль юм байна гэдгийг олж мэджээ. Доктрантурт суралцаж байсан хоёр дахь жилдээ буюу 2000 онд “Шинэ монгол” ахлах сургуулиа байгуулсан байна.

Японы хөгжлийг хүүхдүүддээ үзүүлэхийг хүссэн аав хүний хүсэл мөрөөдлөө биелүүлээд зогсохгүй тэр боловсролыг монгол улсынхаа хөрсөнд соёолуулж чадсаныг нь та бид сайн мэднэ. “Шинэ Монгол” сургуульд л хүүхдээ оруулчихвал гэдэг яриа үүнийг нотолдог. Үзэл санаагаа зөвхөн өөрийн сургуулиар хязгаарлалгүй төрийн сургуулиудыг ч ижилхэн болгоё хэмээн зориг шулуудсан байна. Хувь хувьсгал хамаарахгүй, төсөв мөнгөний айхтар шаардлагагүйгээр дотроосоо өөрийн хүчээр өөрчлөгдөж болох зүйлийг үзүүлжээ. Тэгээд хамтарч ажиллахыг хүссэн 180-аад сургуулиас 60-ыг нь сонгосон.

Тэр дунд 31 сумын сургууль, аймгийн төвийн 27 сургууль, нийслэлээс харин 2 сургууль сонгогдсон байна. Галаа багш төрийн сургуулиуд дээр хэрэгжүүлж буй энэ төслийнхөө үр дүнг хараад яалт ч үгүй улс төрийн дэмжлэг, төрийн дорвитой шийдвэрүүд хэрэгтэйг олж харжээ.

Түүнд Монголын боловсролд хийсэн инновац, шинэчлэл, 20 гаруй жил сургууль удирдсан туршлага ч байна. Энэхүү туршлага дээрээ үндэслэн Монгол улсынхаа боловсролыг хөгжүүлэхэд парламентын түвшинд бодлого боловсруулж, хууль санаачлахын төлөө зүтгээд үзэхээр зориг шулууджээ. Амжилт хүсье