Биеийн арьсаар дамжуулан мэдээлэл авах "дэлгэц” бүтээжээ
Японд хүний биеийн арьсан дээр нааж, эрүүл мэндийн үзүүлэлтүүдийнх нь мэдээллийг авч болох ультра дэлгэц зохион бүтээсэн талаар “The Japan Times” мэдээлсэн байна. Энэхүү төхөөрөмж нь ердөө нэг мм-ийн зузаантай бөгөөд хүний эрүүл мэндийн чухал үзүүлэлтүүдийг хянах, мөн эможи бүхий мессэжүүд илгээх, хүлээн авах боломжтой ажээ.
Тус төхөөрөмжийг Токиогийн их сургуулийн профессор Такао Сомея зохион бүтээсэн байна. Тэрбээр “Энэхүү төхөөрөмжийг хэвтрийн болон төрөл төрөгсдөөсөө хол байгаа өвчтөн болон гэр бүлийнхэн нь хэрэглэж болно” гэжээ. Такао Сомея “AFP"-д өгсөн ярилцлагадаа "Төхөөрөмжийг гэрийн нөхцөлд ч ашиглаж болно. Та түүнийг ашиглан эмчтэйгээ эрүүл мэндийн мэдээллээ хуваалцах боломжтой" гэжээ.
Сомея “Түүнийг арьсан дээрээ наахад ямар нэгэн өөрчлөлт мэдрэгдэхгүй. Мөн мессэж илгээснээр тухайн харилцагчийнхаа сэтгэлийн байдлыг мэдрэх боломжтой” гэж хэлсэн байна. Тусгай нано материал ашиглан хийсэн, микро LED гэрэл бүхий энэхүү төхөөрөмж нь сунамтгай чанартай ажээ.
Д.ТУЯА
Сэтгэгдэл