2018 оны IV улирлын тайлан хүлээж авах сүүлчийн хугацаа хоёрдугаар сарын 10-ны өдөр. Гэвч аж ахуй нэгж, албан байгууллагуудын нягтлангууд сүүлийн 4-5 хоногт цахим тайлангийн систем буюу www.e-тах.mn сайт руу татварын тайлангаа явуулахаар алдаа заагаад хүлээж авдаггүй. Мөн албан газруудын эцсийн үлдэгдэл нь харагдахгүй эсвэл үнийн дүн нь зөрүүтэй харагддаг байна. Тиймээс IV улирлын тайланг хүлээн авах хугацааг Татварын ерөнхий газраас сунгахгүй бол олон байгууллага хохирно гэдгийг нягтлан бодогч нар хэлж байсан юм.

Жил бүрийн яг өдийд албан газруудын нягтлангууд хамгийн их ачаалалтай ажиллаж байгууллагынхаа тайлан тооцоог гаргадаг энэ үеэр www.e-тах.mn сайтад шинэчлэл хийж байгаа аж. 2018 оны байдлаар Татварын ерөнхий газрын мэдээллийн баазад 186 мянган ААН, байгууллага, 1.1 сая иргэн бүртгэлтэй байдаг юм байна.

Уг асуудлыг Татварын ерөнхий газраас асуухад “Системийн шинэчлэл хийгдэж илүү боловсронгуй болж буй учраас тун удахгүй www.e-тах.mn сайтын үйл ажиллагаа хэвийн болно. Нягтлангуудын тайланг огт хүлээж авахгүй байгаа юм биш. Зарим үед гацах тохиолдол гарч байгаа. Хэзээ хэвийн үйл ажиллагаандаа хэзээ орох эсэхийг Гааль, татвар, санхүүгийн мэдээллийн технологийн төв улсын үйлдвэрийн газраас тодруулаарай” гэсэн юм. Тухайн газраас www.e-тах.mn хэзээ хэвийн үйл ажиллагаандаа орох эсэхийг тодруулах гэсэн боловч “Мэддэг ганц хүн нь хуралд орсон байна. Мэдээлэл өгөх ямар ч боломжгүй” хэмээн мэдээлэл өгөхөөс татгалзсан юм.

Татварын Ерөнхий Газар (ТЕГ) 2014 оны нэгдүгээр сараас эхлэн татварын цахим тайлангийн E-Tax системийг үндэсний хэмжээнд нэвтрүүлсэн. Тухайн жилдээ татвар төлөгч аж ахуйн нэгж, байгууллагуудад 7.6 тэрбум төгрөгийн зардлын хэмнэлт үүссэн тухай тооцоо судалгааг АНУ-н Олон Улсын Хөгжлийн Агентлагаас (USAID) гаргасан байдаг. Цахим тайлангийн системд шилжихээс өмнө компани, ААН-үүдийн нягтлангууд цаасаар санхүүгийн тайлангаа тушаах гэж татварын албанд биеэр очиж оочирлоход дунджаар ажлын таван цаг зарцуулдаг байсныг халсан байна. Татвар төлөгч зөвхөн ажлын цагаар хязгаарлагдахгүй, хуулийн хугацаанд хоногийн 24 цагийн турш интернет орчинд аль ч газраас тайлангаа тушааж, тоон гарын үсгээр баталгаажуулан илгээдэг болж тайлан тушаахад үүсдэг ажлын ачаалал, стресс бухимдлаас ч салсан юм.