-АРТЕРИЙН ДАРАЛТ БУУРУУЛАХ ЗОРИУЛАЛТТАЙ ЭМИЙГ ГУРВАН НАСТАЙ ХҮҮХДЭД ИХ ТУНГААР ӨГЧЭЭ-

Эм, тариа андуурч өгөх, тун хэтрүүлэх, багадуулах, хугацаа нь дууссан, хаяг шошгын зөрчилтэй, норж, гэмтсэн эмээр үйлчлэх төрлийн зөрчил буурдаггүй. Үүний улмаас амь насаа алдсан харамсалтай тохиолдол ч цөөнгүй байдаг. Хамгийн сүүлд, өнгөрөгч долоо хоногийн баасан гарагт буюу нэгдүгээр сарын 25-ний өдөр Баян-Өлгий аймгийн Сагсай сумын Эрүүл мэндийн төвийн эх баригч эмэгтэй гурван настай хүүхдэд эм андуурч өгсөн ажил мэргэжлийн ноцтой зөрчил гаргажээ.

Тодруулбал, эх баригч эмч нь тухайн хүүхдэд каптоприл 25мг N10 ширхгийг Бромгексинтэй андуурч, Ампициллин 0,5мг N10 ширхгийг, Парацетамол 0,5мг N10 ширхгийг өгснөөс тухайн хүүхдийн биед эмийн гаж нөлөө үүсч, улмаар хордлогод орсон байна.

Энэ тухай Сагсай сумын иргэн Д Баян-Өлгий аймгийн Мэргэжлийн хяналтын газарт утсаар дуудлага өгч, гомдол гаргажээ. Тус гомдол, дуудлагын дагуу газар дээр нь очиж төлөвлөгөөт бус хяналт шалгалт хийснээр дээрх зөрчлийг илрүүлсэн аж. Улмаар зөрчил гаргасан албан тушаалтанд буюу эх баригч эмэгтэйд “Зөрчлийн тухай хууль”-ийн дагуу 300 нэгж буюу 300000 төгрөгөөр шийтгэлийн арга хэмжээ авсан тухай мэдээллийг холбогдох албаныхан өгсөн юм. Мөн тухайн сумын Эрүүл мэндийн төвийн удирдах албан тушаалтанд гаргасан зөрчлийг таслан зогсоох үүрэг даалгаврыг өгч, газрын даргын албан тоотоор буруутай албан тушаалтанд сахилгын арга хэмжээ тооцуулах санал хүргүүлсэн байна.

Эх баригч эмчийн андуурч өгсөн каптоприл эм нь: Янз бүрийн шалтгаант артерийн даралт ихсэлт, ялангуяа бөөрний гаралтай гипертони, зогсонгишилт бүхий зүрхний дутмагшил, Рейно-ийн хам шинжийн үед, цусны даралт бууруулах зорилгоор, настайчууд ба бөөрний эмгэгтэй өвчтөнд эхлээд бага тунгаар хэрэглэх заалттай байжээ. Харин хүүхдэд 0.3мг/кг тунгаар хэрэглэгдэх заалттай аж. Ард иргэд хувь хүнээс эм тариа худалдан авахгүй байх, эмийг эмчийн бичсэн жорын дагуу зөвшөөрөлтэй газраас авч зааврын дагуу хэрэглэхийг сэрэмжлүүлж байна.