“Boeing 737 МAX-8” маркийн “Толуй хаан” агаарын хөлөг өнөөдөр 12:50 минутад “Чингис хаан” олон улсын нисэх буудалд газардаж, хүлээн авах ёслолын үйл ажиллагаа боллоо. “МИАТ” ТӨХК нь агаарын хөлгийнхөө тоог энэ оноос эхлэн үе шаттай нэмэгдүүлэх аж. Түүний дагуу “Боинг”, “Аволон” компанитай гурван талт хэлцэл хийж, дөрвөн ширхэг “Вoeing 737 МАХ-8” агаарын хөлөг хүлээн авахаар болоод байгаа юм. Дараагийн онгоц ирэх тавдугаар сард бууна. Эдгээр онгоцыг манай улс 12 жилээр түрээслэх юм байна.

Хамгийн сүүлийн үеийн технологиор тоноглогдсон эхний онгоц “Boeing 737 МAX-8” АНУ-ын Сиатл хотоос ОХУ-аар дамжин ийнхүү эх нутагтаа ирлээ. Ингэснээр “МИАТ” ТӨХК нийт долоон агаарын хөлөгтэй болж байгаа гэдгийг албаныхан нээлтийн ажиллагааны үеэр онцлон хэлж байв. “Boeing 737 МAX-8” нь ижил төрлийн агаарын хөлгөөс түлшний зарцуулалт бага, найдвартай байдал, зорчигчдод илүү тав тухтай, байгаль орчинд ээлтэй байдлаараа давуу талтай аж. “МИАТ” ТӨХК парк шат дараатайгаар шинэчлэлт хийсээр 2020 он гэхэд Азидаа хамгийн залуу парктай улс болох зорилго тавьжээ.

“Вoeing 737-8МАХ” шинэ онгоцны давуу талууд:

• В737NG загвартай харьцуулахад түлшний зарцуулалт 14 хувиар багассан.
• Дуу чимээ 40 хувиар багассан.
• Агаарт ялгаруулах нүүрс хүчлийн хий харьцангуй бага тул байгальд ээлтэй тээврийн хэрэгсэлд тооцогддог.
• Бизнес 12, энгийн 150 суудалтай. Бизнес ангиллын суудал бүр дэлгэцтэйгээс гадна бүх зорчигч өөрийн гар утас, таблетаа ашиглан агаарын хөлгийн үзвэрийн системтэй WiFi сүлжээгээр холбогдсон. Суудал бүр USB цэнэглэгчтэй.

Их биеийн онцлох өөрчлөлт шинэчлэлтүүд:

• ​Хөдөлгүүрийг шинэчлэн CMF LEAP-1B хөдөлгүүртэй болсон ба хөдөлгүүрийн хэмжээ томорсноор хүчин чадал сайжирсан.
• Сүүл болон далавчны дизайн шинэчлэн сайжирснаар аеродинамик үзүүлэлт нэмэгдсэн.
• Нисэгчийн бүхээг доторх хянах самбар дэлгэцүүд дэвшилтэт технологийн дэлгэцээр солигдсон.
• Дээрх өөрчлөлтүүдийн тусламжтайгаар нислэгийн алслалт тодорхой хэмжээгээр нэмэгдсэн.
• Зорчигчдын тав тухыг хангах үүднээс бүхээгний гэрэлтүүлэг Sky Interier дизайнтай хийгдсэн байна.

Бид “Толуй хаан” агаарын хөлгийг АНУ-ын Сиатл хотоос онгоцны дарга, багш нисгэгч Ч.Нямсайхан, Ч.Хуяг, II нисгэгч З.Ганзориг, Г.Баатарцогт нар жолоодож иржээ.

-ТҮЛШНИЙ ЗАРЦУУЛАЛТ 10-15 ХУВИЙН ХЭМНЭЛТТЭЙ, АЧАА ДААЦ 3 ТОННООР НЭМЭГДСЭН-

“МИАТ” компанийн Ерөнхий нисгэгч Ч.Нямсайханы сэтгэгдлийг сонслоо “Манай хамт олон 9.100 км замыг 12 цаг 20 минут туулж эх орондоо газардлаа. Замдаа ОХУ-д техникийн буулт хийж түлшээ сумлаад наашаа ирлээ. Удирдлагын жолоодлого хуучин онгоцтойгоо нэлээд төстэй. Харин түлшний зарцуулалт 10-15 хувийн хэмнэлттэй болсон. Мөн алслалт арай их болж ачаа даац гурван тонноор нэмэгдсэн. “Вoeing 737 МАХ-8” агаарын хөлгийг шинэ онгоц учраас засвар үйлчилгээ нь хол, санхүүгийн хувьд нэлээд хэмнэлт гарна. Эх орондоо ирэхэд ямар нэгэн хүндрэл бэрхшээл тулгарсангүй. ОХУ-аас нисэх үед жаахан салхитай байсныг эс тооцвол агаар их сайхан байлаа. “Boeing 737 MAX-8” онгоц нь бизнес 12, энгийн 150 суудалтай. Урт удаан шууд нислэг үйлдэхэд зориулагдсан, зорчигчдод илүү тав тухтай байхаар бүтээгдсэн. Манай онгоцонд ашиглагдаж буй технологийн шийдлүүд нь шинэлэг, хүчирхэг LEAP-1B хөдөлгүүр нь бусад онгоцнуудаас илүү үр ашигтай ажиллаж, байгаль орчинд ээлтэй агаарын аяллыг гүйцэтгэнэ” гэсэн юм.

-“ВOEING 737 МАХ-8” АГААРЫН ХӨЛГИЙН САРЫН ТҮРЭЭСЭНД 430 МЯНГАН АМ.ДОЛЛАР ТӨЛНӨ-

“МИАТ” ТӨХК-ийн гүйцэтгэх захирал Д.Баттөмөр: “Boeing 737 MAX-8” агаарын хөлөг нь дэлхий дахинд хамгийн хурдацтай борлуулагддаг. Дэлхийн өнцөг булан бүрт 330 ширхэг ийм төрлийн агаарын хөлөг нисэж байна. Манай компани парк шинэчлэлийн хүрээнд энэ ондоо багтан дөрвөн ширхэг “Вoeing 737 МАХ-8” агаарын хөлгийг санхүүгийн түрээсээр авсан, дараагийн гурван онгоцыг ч гэсэн ингэж авна. Санхүүгийн түрээс гэдэг нь үндсэндээ лизинг гэсэн үг л дээ. Манайх энэ онгоцыг 12 жилийн гэрээгээр авсан. Сардаа 430 мянган ам.долларыг төлөх юм. Шинэ онгоц авахад тест нислэг заавал хийдэг. Маргааш Хонконг руу ниснэ. Дараа нь ойрын зай буюу Бээжин рүү нислэг үйлдсэний дараа хоёрдугаар сарын 5-наас худалдааны нислэгт гарч эхэлнэ. “Вoeing 737 МАХ-8” агаарын хөлгийн хамгийн тохиромжтой нислэгүүд нь ОХУ-ын Москва. Манайх энэ чиглэл рүү нисэхдээ хоосон суудалтай нисдэг. Яагаад гэхээр түлш их зарцуулдаг учраас жингийн хязгаарлалтад орж цөөхөн суудалтай явахаас өөр аргагүй байдаг. Шинээр авч буй агаарын хөлгийн онцлог нь бүтэн 162 суудалтайгаа Москва хот руу ямар ч асуудалгүй нислэг үйлдэж болно. Энэ агаарын хөлгийн стратекийн чиглэл нь Европын улсууд. Өглөө эрт Берлин-Москва хотоос Улаанбаатарт буулаа, шууд үргэлжлүүлээд Хонконг руу нислэг үйлдэх боломжтой болж байгаа юм. “Вoeing 737 МАХ-8” агаарын хөлгөнд Onboard WiFi систем буюу дотоод сүлжээтэй. Зорчигчид өөрийнхөө гар утас, таблетаар өөрийнхөө хүссэн зүйлээ үзэх боломжтой болсон. Онгоцны суудал өмнөх хуучин онгоцноосоо илүү тав тухай, гэрэлтүүлэг нь сүүлийн үеийн технологитой учраас олон цагийн нислэгийн үед зорчигчдод тааламжтай байдлыг мэдрүүлнэ. Сүүл болон далавчны дизайн шинэчлэн сайжирснаар аеродинамикийн үзүүлэлт нэмэгдсэн, нисэгчийн бүхээг доторх хянах самбар дэлгэцүүд дэвшилтэт технологийн дэлгэцээр солигдсон” гэлээ.

Гэрэл зургийг Г.БАЗАРРАГЧАА