Зурагтаа цахилгаанд холбохгүйгээр асааж, хүссэн сувгаа үзэх боломжийг Монгол инженерүүд олгож байна. Нартай өдөр нарны хавтангаар цэнэглэж зурагтаа үзээд, шөнийн цагт долоо хүртэлх цаг үзэх боломжийг энэ технологи олгож буй. Тун удахгүй худалдаанд гарах гэж буй уг технологийн талаар үйлдвэрлэгч компани “ODEL” электрониксын Ерөнхий захирал Д.Ган-Одтой ярилцлаа.

-ХАР ХАЙРЦАГНЫ ЭД АНГИУДЫГ МОНГОЛДОО ҮЙЛДВЭРЛЭХЭЭР
ЗОРЬЖ БАЙНА-

-Энэ зурагт цахилгаанд холбогдохгүй хэрхэн ажиллаж буйг та манай уншигчдад энгийн үгээр тайлбарлаж өгөхгүй юу?

-Энэ технологи гурван хэсгээс бүрдэж байгаа юм. Нэгдүгээрт 32 инч бүхий лед телевиз, мөн баттерей бокс, нарны панел гэсэн гурван хэсэгтэй. Гэхдээ гол юм нь баттерей бокс гэж буй энэ хайрцаг дотор байгаа юм л даа. Энэ нарны хавтангаар баттерей боксоо цэнэглээд, үүнд ДДИШ болон зурагтаа залгахад л ажиллачихаж байгаа юм. Өдөртөө нарны хавтангаа ашиглаад хэдэн цагаар ч зурагтаа асаалттай байлгаж болох бол шөнийн цагт долоо цаг ажиллуулах боломжтой.

-Тэгэхэр нарны хавтанг өдрийн цагаар ашиглахын зэрэгцээ эрчим хүч хуримтлуулж л байна гэсэн үг үү?

-Тийм.

-Нарны хавтангийн хэмжээ энд харагдаж буйгаас том байх боломжтой юу? Том байх тусам илүү их зай хуримтлуулна гэсэн ойлголт бий юу?

-Яг энэ хэмжээ нь манай технологид таарч байгаа юм. Нөгөөтэйгүүр, сүүлийн үед том хэмжээтэй нарны хавтан ашиглахаас татгалзаж, илүү авсаархан байлгах тал дээр анхаарч байна. Бидний хувьд ч үүнээс том байлгах шаардлагагүй гэж үзэж байгаа.

-Энэ технологийг тэгэхээр хаана хаана ашиглах боломжтой вэ? Тухайлбал, эрчим хүчинд холбогдоогүй малчид ч хэрэглэх боломжтой гэж харж байна.

-Тиймээ. Малчид болон жуулчны баазууд ашиглах боломжтой. Мөн хөдөө гадаа аялалаар явдаг улс ч энэ технологийг ашиглах боломжтой. Гэхдээ аяллаар явж байхад энэ телевиз томдоно шүү дээ, тиймээс бид тэдэнд зориулж овор багатай телевиз гаргахаар ажиллаж байна. Гуравдугаарт, реклам сурталчилгаагаа үзэсгэлэн, арга хэмжээн дээр тавихдаа олон утас татаад л, залгаж болох эрчим хүчний эх үүсвэр хайгаад байдаг. Одоо харин энэ зурагтыг нарны хавтангүйгээр нь аваачаад шууд асаахад л гарна гэсэн үг юм.

-Хар хайрцаг дотор ямар ямар эд анги байгаа вэ?

-Үүн дотор баттерей байгаа. Мөн контроллер буюу удирдлагын хэсэг байна. Энэ нь баттерейнаас ирсэн тэжээл, цэнэгийг телевиз рүү гаргах, ДДИШ-ээ ажиллуулахад, нарны хавтангаас ирж буй энергиэр баттерейгаа цэнэглэх зохицуулалт бүхий технологийн юмнууд бий.

-ИРЭХ ГУРАВДУГААР САРЫН 1-НИЙ ӨДРӨӨС ХУДАЛДААНД ГАРНА-

-Энэ технологийг та хэр удаан хугацаанд боловсруулж байж ажил хэрэг болгов оо?

-Бид жил гаруй хугацаанд ажилласан. Телевиз бол угаасаа зах зээл дээр бэлэн худалдаалагдаж байгаа шүү дээ. Харин үүнд зориулаад авсаархан, технологи нь их сүүлийн үеийн, хүмүүс зөөж хэрэглэхэд амар хөнгөхөн байх систем хийхийн тулд жил гаруй хугацаанд ажиллаж байж энэ хар хайрцгийг хийлээ. Одоо хөдөөний малчид том аккумлятор тавьчихаад л телевиз болон гэрлээ асааж байгаа харагддаг. Энэ нь эрүүл мэндэд ч их хортой шүү дээ. Тиймээс бид түүнээс зайлсхийж, дэлхий дахинд хөгжиж буй баттерейны технологийг хөгжүүлж аль болох жижиг байлгах гэж хичээлээ. Сүүлийн гурван сарын турш туршилтаа хийсний эцэст одоо худалдаанд гарахад бэлэн болоод байна. Худалдаанд гарахад харин лого байршуулах гэх мэт дизайны ажлууд үлдчихээд, хүлээлтэнд байгаа.

-Хар төхөөрөмжийн эд ангийг хаана хийж байгаа вэ?

-Одоогоор бүх зүйлийг нь Хятадад захиалж хийлгэж байгаа. Харин саяхнаас Монголд ийм төхөөрөмжийн гадна хайрцгийг хийдэг болсон. Үүнийг ашиглаж хийдэг болохоор илүү авсаархан болно гэсэн.

-Бусад түүхий эдээ яах вэ?

-Мэдээж электроникын бусад деталиудаа гаднаас авна. Гэхдээ цаашид Монголдоо хийх бүрэн боломжтой болж байгаа.

-Хэзээнээс худалдаанд гаргана гэсэн төлөвлөгөөтэй байгаа вэ?

-Гуравдугаар сарын 1-ний өдрөөс эхлэн гаргана гэсэн төлөвлөгөөтэй байна. Телевиз асахад манай лого гардаг байхаар хийж байгаа тул үүний ажлыг гүйцэтгэх богино хугацаа шаардлагатай байгаа юм.

-Хар төхөөрөмжийг тусад нь худалдан авах боломжтой юу?

-Малчин айлуудад 12 вольтын телевиз мэдээж байдаг байх. Тийм тохиолдолд шууд л хар төхөөрөмжөө аваад ДДИШ-ээ залгаад үзэх боломжтой.

-Үнэ өртгөө тодорхойлсон болов уу?

-Одоохондоо эцсийн үнээ гаргаагүй байгаа. Логогоо хийж дуусах, монголд үйлдвэрлэж буй хайрцаг зэргийн өртгийг тооцож байж эцсийн үнээ зарлана.

-Худалдаанд гарвал хаагуур зарагдах бол?

-Манайх тун удахгүй “Showroom” байгуулна. Түүн дээр ирээд үзэх, авах боломжтой. Үүнээс гадна томоохон дэлгүүрүүдтэй хамтран ажиллаж борлуулна. Хаана зарах, хэзээ зарах зэрэг мэдээллүүд тун удахгүй тодорхой болж, та бүхэндээ мэдээллээ бүрэн өгөх болно оо.

-Цаг гарган мэдээлэл өгсөн танд баярлалаа.

-Та бүхэнд мөн баярлалаа.

ГЭРЭЛ ЗУРГИЙГ: Г.БАЗАРРАГЧАА