-Х.БАТ-ЯЛАЛТЫГ БУЛГАН АЙМГИЙН ЦАГДААГААС ШАЛГАЖ ЭХЭЛСЭН-

Өнгөрөгч 2018 оны аравдугаар сард Булган аймгийн Гурванбулаг сумын хэсгийн төлөөлөгч Э.Мөнхтулга албан үүргээ гүйцэтгэж байгаад амиа алдсан харамсалтай хэрэг гарсан. Талийгаачийг нас барсанаас хойш эхнэр гурван хүүхэд нь айлын хажуу өрөө түрээслэн хэцүүхэн амьдарч байгаа аж. Ажил үүргээ гүйцэтгэж явсан хэсгийн төлөөлөгч амиа алдсан хэрэгт Х.Бат-Ялалтыг ар гэрийнхнийх нь хүсэлтээр шалгаж эхэлсэн байна.

Учир нь талийгаач Э.Мөнхтулга нь нас барахаасаа өмнө малын хулгайн хэрэг шалгаж байсан бөгөөд Иргэний нийгмийн байгууллагын төлөөлөгч, хуульч Х.Бат-Ялалт очиж, хэрэгтний өмгөөлөгчөөр ажиллаж байгаа хэмээн талийгаачтай маргалдаж улмаар бичлэг хийн нийтийн сүлжээнд тавьсан байдаг. Бичлэг хийхдээ хүний эрх зөрчдөг цагдаа, хүн зодсон гэх мэтээр буруутган цоллосон байдаг. Уг хэрэг явдлын дараа талийгаач сэтгэл зүйн хямралд хэд хоног байж байгаад авто ослоор амь насаа алдсан юм.

Х.Бат-Ялалтыг талийгаачийн сэтгэл санаанд нь нөлөөлж, хуульчийн мэргэжлийн нэрийг хууль бусаар хэрэглэх, Мөрдөн шалгах ажиллагаанд нөлөөлсөн хэмээн үзэж буй. Энэ талаар талийгаач талийгаач Э.Мөнхтулгын эхнэр Н.Энхдолгортой ярилцсан юм.

-Сайн байна уу. Танай гэрийнхэн талийгаачийн үхэлд Х.Бат-Ялалтыг буруутган шалгах тухай хүсэлт гаргасан гэсэн. Хэзээнээс шалгаж эхэлсэн бэ. Энэ талаар бидэнд мэдээлэл өгөхгүй юу?

-Талийгаачийг нас барах үеэр бага хүүхэд хүнд өвдөөд би эмнэлгээр яваад маш завгүй байсан. Хэргийн талаар яг юу болсон талаар би нарийн хэлж мэдэхгүй байна. Ямар ч байсан зохих газруудад нь өргөдөл өгсөн. Тэр гаргасан гомдлуудад ямар хариу ирсэн талаар мэдээгүй л байна.

-Цагдаагийнхан нас барсан шалтгааныг шалгаж байсан. Ослоор нас барсан гэж байсан?

-Тийм. Ямар ч байсан урьдчилсан дүгнэлтээр ажил үүргээ гүйцэтгэж яваад ослоор нас барсан гэж гарсан. Нас барсан өдрөө албан бичиг авч явж байгаад машин нь онхолдож нас барсан.

-ТӨРӨӨД САР ГАРАНТАЙ НЯЛХ ХҮҮХЭДТЭЙ БАЙХАД Х.БАТ-ЯЛАЛТ
ШУУД ГЭРТ ОРООД ИРСЭН-

-Нас барахынхаа өмнө малын хулгайн хэрэг шалгаж байсан. Энэ хэрэгтэй нь холбогдуулан Х.Бат-Ялалт очиж уулзаж байсан. Тэр үед яг юу болсон юм бэ?

-Хамгийн анх манай гэр орж ирсэн. Тэгэхдээ өөрийгөө “Би хуульч, өмгөөлөгч хүн байна ганц нэг зүйл тодруулах гэсэн юм” гэж хэлээд манайд шууд ороод ирсэн. Би тэгэхэд бага хүүхдээ төрүүлээд удаагүй дөнгөж сар гарантай нялх хүүхэдтэй байсан.

Анх манай нөхөртэй уулзахаар ирэхэд нь байхгүй өмнөх өдөр нь шөнөөр дуудлаганд яваад нойргүй хоноод дөнгөж гэртээ орж ирээд байж байсан юм. Тэгсэн тэр хүн гэрийн гадна хүлээж байгаад ороод ирсэнийх нь дараа араас нь ороод ирсэн. Манайд орж ирэхэд ямар ч телевизийн камер зурагчин байгаагүй. Орж ирээд манай нөхөртэй уулзах гэсэн юм гэхээр нь талийгаач “Манайд уулзах боломжгүй. Манайх нярай хүүхэдтэй байна. Хоёулаа манай ажлын өрөөнд ороод ярилцъя” гээд аваад гарсан юм.

-Бичлэг хийгээд нийтэд цацсан байсан. Ажлын өрөөнд нь ороод бичлэг хийсэн юм уу?

-Тэгсэн. Удалгүй манай нөхөр орж ирэхдээ царай нь их баргар болсон байсан. Тэгэхэд нь би юу болсон талаар асуухад: “Энэ Х.Бат-Ялалт гэдэг хүнтэй ажлынхаа өрөөнд ороод удаагүй байтал гэнэтхэн гаднаас хэдэн хүмүүс камер бариад бичлэг хийгээд ороод ирсэн. Хүн гэнэт бичлэг хийгээд ороод ирэхээр их сандардаг юм байна” гэж байсан.

-Х.Бат-Ялалт малын хулгайн хэргээр хоригдож байсан сэжигтэнг өмгөөлөхөөр ирсэн гэсэн байсан. Энэ талаар?

-Тэр малын хулгайн хэрэгт холбогдуулан нэг сэжигтэнг хорьж байсан. Тэр хүний талаар ирсэн. Тэр хүнийг байнга дарамтанд, хоол ундгүй олон хоног хорьсон гэж байсан. Тэр нь шал худал. Яагаад гэхээр тэр хүнд бид хоёр байнга хоол хийж өгдөг байсан. Бид хоёр ч өөрсдөө хүний нутагт байсан шүү дээ.

Анх тэр сэжигтэнг малаа алдсан гэх хохирогч болон түүний хүүтэй манай хүн хамтдаа хоёр хоног тасралтгүй араас нь явж байж барьж ирсэн. Гэртээ дөнгөж орж ирээд байж байтал аймгаас дуудсан. Аймаг дээр очоод прокуророос зөвшөөрөл авч хэргээ нээлгэнэ гэж явсаар байгаад тав хоносон. Тэр сэжигтэнг манай нөхөр байхгүй байх хойгуураа цагдаадаа даатгаад эхнэр нь хүртэл өдөр бүр тасралтгүй хоол хийж өгдөг байсан шүү дээ. Мөн бид хоёр явахдаа байх газрыг нь хүртэл бэлдэж өгөөд явсан юм. Тэр хүнийг зодож нүдээд хоолгүй байлгасан юм огт байхгүй. Ер нь хоригдож байгаа хүн тийм даварсан байдаг ч юм уу би мэдэхгүй юм.

-Х.Бат-Ялалтаас тодруулахад хэрэг нээгээгүй хорьж байсан гэж байсан?

-Намайг ингээд ярихаар нас барсан нөхрөө өмөөрч байна л гэж бодох байх. Ойр хавьд байсан хүмүүс бүгд мэднэ. Өглөө ирэнгүүт нь хэсэг байлгаж байгаад айлд жоохон амарчихаад ир гээд л явуулдаг байсан. Угаасаа ямар ч байцаалт авах боломжгүй байсан. Дөнгөж прокуророос хэргээ нээлгээд ирэхэд нь л Х.Бат-Ялалт ирсэн.

-Осол болсоны дараа Х.Бат-Ялалт өөртэй чинь холбогдож байсан уу?

-Үгүй. "Аваар" гарсан өглөө нь манай нөхрийн бичлэг фэйсбүүкээр яваад байсан. Тэр бичлэгний доор нь Х.Бат-Ялалт руу хандаж би коммент бичсэн юм. Чи манай нөхрийг амийг авлаа. Нөхрийнхөө нэрийг сэргээлгэнэ гэсэн утгатай юм бичсэн. Тэгсэн мандаттугай.мн сайтын сэтгүүлч нь “Бид нар буруу юм гаргаагүй. Хэрэв та гомдолтой байвал шалгуул гэж бичсэн л дээ. Тэгсэн Х.Бат-Ялалт одоо энэ хэргийг ингээд орхих хэрэгтэй гэсэн байсан. Миний тэгэж бичсэнээс үүдэж хүмүүс Х.Бат-Ялалт руу их дайрч эхэлсэн юм.

-Энэ үйл явдлын дараа Х.Бат-Ялалт хэвлэлийн бага хурал хийсэн байсан шүү дээ?

-Тэгсэн. Тэр хэвлэлийн бага хурал дээр нэг сэтгүүлч "Үхэлд нөлөөлсөн үү? гэсэн утгатай асуулт асуухад хариулж чадахгүй гараад явж байсан. Өөрөө буруутай болохоор юу гэж ч хариулах вэ дээ. Нөхөр минь өөд болсны дараа тэр хүнтэй ярих боломж ч байгаагүй. Хүүхэд өвдсөн эмнэлгээр явж байсан болохоор их завгүй байсан.

-Талийгаачийн үхэлд Х.Бат-Ялалтыг буруутай хэмээн үзэж байгаа. Тиймүү?

-Тэр хүн буруутай. Яагаад гэхээр манай нөхрийг хүний эрхэнд халдаж, ажлаа муу химйсэн мэтээр буруутган бичлэг хийж нийтэд дэлгэсэн өдрөөс хойш манай нөхөр нэг ч шөнө унтаагүй. Би төрөөд удаагүй сар ч болоогүй байсан болохоор хүүхдээ хурайлах гээд шөнө босохоор сэрүүн сууж байдаг байсан. Мөн манай нөхрийн танил хүмүүс залгаад “Чи Монгол комментоор гараад байна. Чиний зураг фэйсбүүкд тавигдсан байна" гэж их ярьсан. Энэ байдал нь манай хүнд маш хүнд туссан. Би тэр хүнийг шууд сэтгэлзүйд нь нөлөөлсөн гэж үзэж байна. Би хажууд нь байсан болохоор хажуунаас нь харахад хүртэл их хүнд байсан.

-БИЧЛЭГ ЦАЦАГДСНААС ХОЙШ ДОЛОО ХОНОГ УНТААГҮЙ
ХЯМРАЛТАЙ БАЙСАН-

-Бичлэг цацагдсанаас хойш хэд хоногийн дараа осол болсон юм бэ?

-Долоо хоногийн дараа. Бичлэг нь аравдугаар сарын 5-нд цацагдсан. Харин би хүүхдээ аваад эмнэлэгт аравдугаар сарын 7-ны өдөр хэвтсэн. Манай хүн аравдугаар сарын 13-14 нд шилжих шөнө ослоор өнгөрсөн юм. Хэсгийн төлөөлөгч нар чинь шөнө орой хэдэн цагт ч байсан хамаагүй дуудлаганд гараад яваад өгнө. Бүтэн долоо хоног ихэнх цагаа ажлынхаа байран дээр өнгөрүүлнэ. Шөнө орж ирээд тамхи татаад гэр дотроо алхаад л байдаг байлаа. Надад одоо би яасан дээр вэ?. Яах вэ? гээд л их асууна. Сүүлдээ утсаа ч барьж чадахгүй болтлоо сэтгэлээр унасан. Булган аймгийн цагдаагийн газрынхан ч гэсэн мэдэж байгаа. Нас барахынх нь өмнөх хэдэн өдөр би утсыг нь бариад манай хүн утасгүй байсан. Хүмүүс их муухай сайн юманд дугарахгүй байж муу юманд их сайн дугарах юм.

-Бидэнтэй ярилцсан таньд маш их баярлалаа.

-За баярлалаа.