-Т.АЮУРСАЙХАН: ЕРӨНХИЙЛӨГЧИЙН СОНГУУЛИАС ГУРАВ ХОНОГИЙН ӨМНӨ ШИНЖИАН ШИНФА КОМПАНИД ТӨРИЙН БАНК 20 ТЭРБУМ ТӨГРӨГИЙГ ЗУЗААТГАЛ ХИЙЖ ӨГСӨН-

БНХАУ-ын хөрөнгө оруулалттай “Шинжиан шинфа” гэх ХХК-ийн Төрийн банкнаас 20 тэрбумын зээл авсан асуудалд хуулийн байгууллага тус банкны захирлаар ажиллаж байсан Д.Баярсайханд эрүүгийн хэрэг үүсгэн шалгаж буй. Тодруулбал, 2017 оны Ерөнхийлөгчийн сонгуулийн өмнө компанид олгогдсон 20 тэрбум төгрөгийг улс төрийн зорилгоор гаргасан байж магадгүй гэж тухайн үед зарим хэвлэлүүдээр мэдээлж байв. Мөн “Шинжиан шинфа” ХХК нь 20 тэрбум төгрөгийн зээл авахдаа ямар нэг барьцаа тавиагүйгээр үл барам зээлийн эргэн төлөлт хийгдэхгүй чанаргүй зээлийн ангилалд шилжиж магадгүй тухай асуудал яригдаж буй юм.

Ямартаа энэхүү мэдээлэл хоёр жил гаруй хугацааны турш хэвлэл мэдээлийн “бай” болсоор ирсэн. Гэтэл одоогоос дөрөв хоногийн өмнө буюу хоёрдугаар сарын 15-ны өдөр УИХ-ын гишүүн Т.Аюурсайхан өөрийн цахим хуудаснаа “2017.06.23-нд буюу Ерөнхийлөгчийн сонгуулиас гурав хоногийн өмнө ажлын цаг дууссаны дараа Монголбанкнаас Төрийн банкныхныг тарж болохгүйг үүрэгдэж, 20 тэрбумын зузаатгалыг Монголбанкнаас хийж өгнө, нэн даруй "Шинжиан Шинфа" ХХК-д олгохыг чиглэл болгож, Төрийн банк ёсоор болгожээ” хэмээн жиргэснээс тус асуудлыг дахин олон нийтийн анхаарлын төвд оруулж ирлээ.

Одоогийн байдлаар “Шинжиан шинфа” ХХК-д 20 тэрбумын зээл өгөх зөвшөөрлийг Б.Чойжилсүрэн Сангийн сайд байхдаа Д.Баярсайханд өгсөн гэдэг мэдээллийг зарим хэвлэлүүд онцолж байгаа. Тодруулбал, 2017 оны зургадугаар сарын 23-ны өдөр Сангийн сайд Б.Чойжилсүрэнгээс Төрийн банкны ерөнхий захирал Д.Баярсайханд “Эдийн засгийг идэвхжүүлэх, бүтээн байгуулалтыг нэмэгдүүлэх, төр, хувийн хэвшлийн түншлэлийг өргөжүүлэх зорилгоор Монгол Улсын Засгийн газартай гэрээ байгуулсан хуулийн этгээдийн санхүүгийн үр ашигтай концессын төслийн 20 тэрбум төгрөг хүртэлх санхүүжилтийн хүсэлтийг Сангийн сайдаас Төрийн банкинд хүргүүлсэн 2016 оны арваннэгдүгээр сарын 3-ны өдрийн 7-1/6647 дугаар албан бичгээр тогтоосон зээлийн хязгаарлалтад хамааруулахгүйгээр холбогдох дүрэм, журамд нийцүүлэн судлан үзэхийг зөвшөөрч байна” гэсэн баримтыг дэлгэсэн байдаг.

Энэ мөнгийг гаргахдаа Сангийн сайд 2016 оны арваннэгдүгээр сарын 3-нд Төрийн банкны ТУЗ-ийн дарга Б.Нямаагийн нэр дээр Чиглэл өгөх тухай албан бичиг явуулж дээрх 20 тэрбумыг “5.0 тэрбумаас дээш санхүүжилтийг Төрийн банкнаас гаргахгүй байхыг үүрэгдсэн өмнөх үүрэгтээ хамааруулахгүйгээр 20 тэрбум төгрөгийг гаргахыг зөвшөөрсөн” гэсэн үг болж таарч байв.

Т.Аюурсайхан гишүүний жиргээгээс үүдэж зарим хэвлэл мэдээллийн байгууллага Сангийн сайд асан, УИХ-ын гишүүн Б.Чойжилсүрэнгээс өчигдөр эл асуудалтай холбогдуулан хэд хэдэн асуулт асуусан юм. Энэ үеэр тэрээр хэлэхдээ, “Улс төрийн зорилготой хэвлэл мэдээллийн хэрэгслүүдэд янз бүрийн мэдээлэл тарааж байгаа. Эдийн засаг хүнд байсан учраас нэг хүнд олгох зээлийн болон батлан даалтын дүн 5.0 тэрбумаас хэтрэхгүй байх албан бичгийг Төрийн банкинд хүргүүлсэн хүн шүү дээ. Хөгжлийн банкны тайлангаас гаргасан мэдээгээр Төрийн банкнаас нэг хүнд олгох зээлийн хэмжээ 36 тэрбум байх боломжтой болсон байсан. Гэвч бид эрсдэлээ тооцон нэг хүнд олгох зээл болон батлан даалтын хэмжээг 20 тэрбумаас хэтрүүлэхгүй байхаар тооцсон. 20 тэрбумаар зээл гаргахаар ажлын байрыг олноор бий болгох салбарт олгох чиглэл өгсөн” гэх утга бүхий зүйл хэлсэн юм.

-“ШИНЖИАН ШИНФА” ХХК 2008 ОНД УЛСЫН БҮРТГЭЛД
БҮРТГҮҮЛЖ БАЙЖЭЭ-

Сангийн сайдын зөвшөөрлөөр 20 тэрбумын зээл авч чадсан “Шинжиан Шинфа” нь ямар компани бэ гэх асуултын хариу олон хүний анхаарлыг татаж байна. Зарим хэвлэлд тус компанийг БНХАУ-ын хөрөнгө оруулалттай Баян-Өлгий аймгийн нэгэн иргэний нэр дээр байдаг замын компани хэмээн тодотгожээ. Гэвч Улсын бүртгэлд хэзээ хэрхэн бүртгүүлснийг нь үзвэл,

Хамгийн анх 2008 онд Улсын бүртгэлд Сун ГуангЧен (Sun GuangChen) гэх гүйцэтгэх захиралтай “барилгын засвар, засал чимэглэлийн чиглэл”-ээр үйл ажиллагаа явуулах чиглэлтэйгээр бүртгүүлж байжээ. Улмаар 2017 оны аравдугаар сарын 23-нд “Си Вай Си Кэй” гэх ХХК Сан ГуанЧенийн хамтаар хувьцаа эзэмшигчээр бүртгүүлжээ.

Тус “Си Вай Си Кэй” гэх ХХК нь Хуулийн этгээдийн улсын бүртгэлийн мэдээлэлд 2014 оны аравдугаар сарын 13-ны өдөр Ву ЗенЖун (Wu ZhenJun) гүйцэтгэх захиралтайгаар бүртгүүлсэн байна. Тус компанийн хувьцаа эзэмшигч ӨМӨЗО-ны Чи Ян Чунь, Барилгын материал, тоног, төхөөрөмжийн компани хэмээн бүртгүүлжээ. Ингэхдээ 2014 оны аравдугаар сарын 13-нд үйл ажиллагааныхаа чиглэлээ

-Уул уурхай, тоног төхөөрөмж, сэлбэгний худалдаа

-Барилгын материалын худалдаа

-Гадаад худалдаа хэмээн тус тус бүртгүүлсэн бол

2017 оны наймдугаар сарын 01-нд Барилгын материалын үйлдвэрлэл 3.4.7-д заасан заалтын дагуу \2017.07.16-2022.07.16\ хэмээн бүртгэгджээ.

Тус компани

-2012-2015 оны хооронд Улаангом-Хяргас нуур /100 км/ чиглэлийн авто замын барилгын ажлыг хийж гүйцэтгэснийг улсын комисс хүлээн авсан байдаг.

-2016 он гэхэд 5,572 км авто замыг шинээр барьж авто замын сүлжээг нэмэгдүүлэх зорилтын хүрээнд Шинжиан шинфа компани Алтай-Баянхонгор /128 км/,

-Улаангом-Наранбулаг /90 км/,

-Баянхонгор-Алтай чиглэлийн авто зам 128 км

-Гадаадаас авах ажиллах хүч, мэргэжилтэнд Монгол Улсад 2018 онд хөдөмөр эрхлэх зөвшөөрөл олгох аж ахуй нэгж байгууллагын жагсаалтад багтсанаар- Засгийн газартай байгуулсан концессын гэрээний дагуу Дашинчилэн-Орхоны гүүр чиглэлийн замаас Өлзийт сум, Өлзийт сумаас Мөрөн-Тариалан чиглэлийн замын төгсгөлийг холбох 120 км хатуу хучилттай зам

-2015 оны гуравдугаар сарын 13-ны өдөр Сонгино сум-Хяргас нуурын зүүн хаяа чиглэлийн 135.5 км хатуу хучилттай автозам барих, шилжүүлэх

Одоогийн байдлаар тус хэргийг АТГ-аас шалгаж эхлээгүй байгаа юм байна. Энэ тухай тодруулахад, манайх энэ хэргийг шалгахгүй байгаа тул тодорхой мэдээлэл байхгүй гэсэн хариултыг өгсөн юм. Ямартаа ч тус 20 тэрбум төгрөгийг хэн, яах гэж сонгуулийн үеэр авсан бэ, тэрийг юунд зарцуулсан бэ гэдэг асуулт цаашид ч олны анхаарал татсан асуудлын нэг байсаар байх биз ээ.