Засгийн газрын өнөөдрийн ээлжит хуралдаанаас гаргасан шийдвэрүүдийн талаар Сангийн сайд Ч.Хүрэлбаатар мэдээлэл хийлээ.

Тэрээр хэлэхдээ “Өнөөдрийн Засгийн газрын хуралдаанаар Сангийн яам хоёр асуудал оруулж, хэлэлцүүлсэн. Эхнийх нь "Блокчейн технологи дээр суурилан платформыг ашиглан Засгийн газар үнэт цаас гаргах" тухай асуудлыг хэлэлцэн баталлаа. Өмнө нь Засгийн газар үнэт цаасыг голчлон арилжааны банкуудад санал болгодог. Арилжааны банкууд хүү тогтоож, цааш нь хоёр дах зах зээл дээр гаргадаг зарчмаар явагддаг. Хөрөнгийн бирж дээр зарж ашиглах оролцоо багатай байсан. Хэрэв Засгийн газар үнэт цаас гаргасан тохиолдолд блокчейн технологи дээр суурилан платформыг ашигласан технологи дээр үндэслэж бүх иргэн, аж ахуй нэгжүүдэд Засгийн газар үнэт цаасыг санал болгох боломжийг бүрдүүлэх юм. Энэ нь зээлийн хүүг буулгах, банкнаас бусад санхүүгийн зах зээлийг хөгжүүлэхэд чухал үүрэгтэй” гэлээ.

Мөн тэрээр Засгийн газрын зарим тусгай сангуудад хийсэн шалгалтын дүнг танилцууллаа. "Тусгай сангуудад хийсэн шалгалтын дүн болон авах арга хэмжээний төслийн талаар танилцууллаа. Цаашлаад засгийн газрын тогтоол болгож ирэх долоо хоногт гаргахаар яригдсан.

ТЭДС-г нилээдгүй урт хугацааны турш шалгалаа. Олон зөрчил илэрсэн. Тариалан эрхлэлтийг дэмжих сан байгуулагдсанаас хойш гэхэд 16,000 гаруй ААН хоёр ба түүнээс дээш удаа зээл авч байсан байна. Энд нэг сангаас зээл авч нөгөө сангийн зээлийг төлдөг байдал ч илэрсэн. Мал хамгаалах сан, Боловсролын зээлийн сан, Автозамын сан гэх мэт олон сан дээр хийгдсэн шалгалтын дүнг мөн танилцууллаа.

Мөн шалгалтын явцад нэг ААН гурван сангаас зэрэг зээл авсан тохиолдол хүртэл гарлаа. Хоёр сангаас зээл авсан 319 ААН байна. Зээлээ төлөхгүй байсан ч Монголбанканд бүртгэгддэггүй учраас зээлийн эргэн төлөлт удааширч байсан байна. Төрийн сангуудад төлөгдөөгүй байгаа хугацаа хэтэрсэн 100 орчим тэрбум төгрөг байна. Зээл олгодог сангуудаа голлон шалгасан бөгөөд зарим санг татан буулгах саналаа Засгийн газрын хуралдаанд танилцуулсан. Ингээд Засгийн газрын гишүүд бүх мэдээлэлтэй танилцсаны дараа дараагийн хуралдаанаас тогтоол гаргахаар болж байгаа. Дараагийн долоо хоногийн хуралдаанаар шийдвэр гарсны дараа тодорхой мэдээлэл өгье” гэлээ.

Мөн энэ үеэр сэтгүүлчдийн асуултад хариулт өглөө.

-Урьдчилсан байдлаар ямар ямар тусгай сангуудыг татан буулгах санал боловсруулж оруулсан бэ?

-Зарим сангуудын татан буулгах саналаа өнөөдөр танилцуулсан. Дараагийн долоо хоногт засгийн газрын хуралдаанаар шийдвэрлэхээр нэр утстай нь зарлана.

-Хичнээн санд шалгалт хийсэн. Хэдэн төгрөгийн зээлийн зөрчил илэрсэн бэ?

-Засгийн газар зээл олгодог сангуудад голлож шалгасан. Бусад сангууд буюу тухайлбал Төрийн сангаас гүйлгээг нь аваад харах боломж бий. Иймд зээл олгодог сангуудаас гол зөрчлүүд илэрдэг.

-Гурван сангаас зэрэг зээл олгосон асуудалд хичнээн тэрбум төгрөгийн зөрчил илэрсэн бэ?

-Шийдвэр гарахаар хэлнэ. Олон жилийн турш хуримтлагдсан олон асуудал үүнд бий. Засгийн газрын хуралдаанаар нэг бүрчлэн нухацтай авч хэлэлцэж байж бид шийдвэр гаргах учиртай.

-ЖДҮХС-д улс төрчдийн оролцоо байсан нь ил болсон. Шалгалт хийсэн бусад сангуудад улс төрчдийн оролцоо байсан уу?

-Шалгалтын дүнг ил болгоно. Гэхдээ Засгийн газрын хуралдаанаар орсны дараа мэдээллийг ил тод болгоно.