“МАНАН дэглэмийн эсрэг Монгол түмний нэгдэл" хөдөлгөөнийг дэмжигч иргэд болон бусад төрийн бус байгууллагууд Авилгатай тэмцэх газрын дарга Х.Энхжаргалыг огцрохыг тулган шаардсан бичгийг өнгөрөгч даваа гарагт өгсөн.

Тэд “АТГ-ын дарга Х.Энхжаргалыг гурван үндэслэлээр цаашид энэ албыг ажиллах ёс зүйн чадамжгүй гэж үзсэн. Мөн АТГ-ын даргын үүрэгт ажлаас сайн дураар 72 цагийн дотор огцрох”-ыг шаардсан билээ.

Тус шаардах бичгийн хариуг АТГ-аас өнөөдөр өгсөн тухай бид мэдээлсэн. Тодруулбал, “Х.Энхжаргалыг нэн даруй огцрохыг шаардсан нь хууль бус үйлдэл” хэмээн мэдэгдээд буй юм. Иймд “МАНАН дэглэмийн эсрэг Монгол түмний нэгдэл” хөдөлгөөний дэмжигч иргэд, төрийн бус байгууллагуудын эмэгтэйчүүд АТГ-ын гадаа эсэргүүцлийн хөдөлгөөн өрнүүлж, Х.Энхжаргалыг гарч ирэхийг шаардлаа.

Тэд байр сууриа илэрхийлэхдээ, “Та нарын шаардсан үндэслэл намайг огцруулж чадахгүй гэсэн утга бүхий бичгийг бидэнд өглөө. Өөрөө гарч ирж уулзсангүй. Соён гэгээрүүлэгчээ гаргаж, биднийг соён гэгээрүүлэх гээд байгаа эсэхийг нь ойлгосонгүй. Ийм хариу өгнө гэдгийг бид урьдчилан таамаглаж байсан. Иймд Монгол Улсын Ерөнхийлөгчид хууль өргөн барих эрхтэй субьектынх нь хувьд гурван шаардлага бүхий бичгийг хүргүүлэхээр бэлдсэн. Үүнийг одоо аваачиж өгнө. "Миний хуулийн хугацаа дуусахаар албан тушаалаа өгнө. Та нар наанаа байж бай" гэсэн хариу өгснийх нь төлөө бид нар маргаашнаас улс төрийн суулт зарлана. Цаашлаад эрүүл мэнд, амь насаа золиослож өлсгөлөн зарлаж Х.Энхжаргалыг өөрийн ёс зүй, ухамсраараа албан тушаалаа өгөх хүртэл тэмцлээ үргэлжүүлнэ” гэлээ.

Мөн тэд Монгол Улсын Ерөнхийлөгч Х.Баттулгад хандаж "Төрийн өндөр албан тушаалтан болон түүнтэй адилтгах төрийн тусгай албан тушаалтан Монгол Улсын ард түмний язгуур эрх ашиг үндэстний аюулгүй байдалд нөлөөлөхүйц хэмжээний асуудалд хойрго хандаж ёс зүйн алдаа гаргасан бол албан тушаалаас нь огцруулах зохицуулалттай хуулийн төслийг санаачлан өргөн барих. Түүнчлэн Монгол Улсын их хурлын ээлжит бус чуулганыг зарлан хуралдуулах"-ыг шаардсан бичиг хүргүүлэхээ мэдэгдлээ.