Улаанбаатар хотын Гэрлэх ёслолын ордон “Одонтой ээжүүд” групптэй хамтран улсын хэмжээнд найман гэр бүлийн хуримыг хийж өгөхөөр болжээ. Тэдний хуримыг олон улсын эмэгтэйчүүдийн эрхийг хамгаалах өдрийг тохиолдуулан гуравдугаар сарын 09-ний идэрийн барилдлагатай сайн өдөр хийхээр тогтжээ.

Хосуудыг сонгохдоо гучин зургаа хүртэлх насны, алдарт эхийн нэг, хоёрдугаар одонтой найман эмэгтэйг шалгаруулахад Баянхонгор аймгийн Заг сумын иргэн Б.Баяржаргал сонгогдсон байна. Тэрбээр нутгийн залуу Н.Хүрэл-Эрдэнэтэй гэр бүл болон зургаан хүүгийн аав ээж болж, өнгөрсөн оны зургадугаар сард алдарт эхийн нэгдүгээр одонгоо зүүжээ. Дөрөв төрж, зургаан хүүтэй болсон Б.Баяржаргал өдгөө 32 настай бөгөөд 2012, 2014 онд ихэр хүү төрүүлж, тэднийгээ энх тунх өсгөж байна.