100 ГАРУЙ КАМЕРЫГ НЭГ ХҮН ХЯНАЖ БАЙНА 

ШШГЕГ-ын харьяа Урьдчилан хорих 461 дүгээр ангид түр саатуулагдаж байсан Монгол Улсын гавьяат хуульч Л.Бямбаа амь насаа алдсан хэрэг гарсан билээ. Үүнтэй холбогдуулан УИХ-ын гишүүн Л.Болд, Ж.Батзандан, Н.Оюундарь нар тус ангийн үйл ажиллагаатай өнөөдөр /2019.03.01/ танилцлаа. 

Тэд Хүний эрхийн дэд хорооны гишүүнийхээ хувиар Цагдан хорих 461 дүгээр ангийн үйл ажиллагаа, тус ангид хүний эрх зөрчигдөж байгаа эсэх, талийгаач Л.Бямбааг амиа алдсан шалтгаан, нөхцөлийг тодруулж олон нийтэд мэдээлэл өгөх зорилготой тус байгууллагад ажилласан юм. 

УИХ-ын гишүүд Урьдчилан хорих 461 дүгээр ангийн үйл ажиллагаатай танилцаж гарч ирээд сэтгүүлчдэд мэдээлэл өглөө.

УИХ-ын гишүүн Н.Оюундарь “Урьдчилан хорих 461 дүгээр ангид шүүгч Л.Бямбаа гуай амиа алдсан хэрэгт холбогдоотойгоор ШШГЕГ-аас хорих ангийн найман албан хаагчид хариуцлага тооцож ажлаас нь чөлөөлсөн байна. Хэргийн мөрдөн байцаах ажиллагаа явагдаж буй учир бидэнд ямар нэгэн мэдээлэл өгөөгүй. Өнөөдрийн байдлаар 900 хүн  түр хорих байранд байна. Нэг хүн 100 гаруй камерыг хянадаг. Энэ бол нэг хүнд хэтийдсэн ачаалал. Камерын байршил маш жижиг харагддаг. Камер хянагчийн ажлын ачаалал их гэсэн үг. ШШГЕГ-ын байгууллага бол тухайн хэргийг мэдэхгүй. Түр хорих л үүрэгтэй байгууллага. Шөнийн 03.00 цагт талийгаачийг энд авчирсан юм байна. Хорьсоны маргааш өглөө 11.00 цагийн үед байцаалт авахаар  гаргасан" гэлээ. 

УИХ-ын гишүүн Л.Болд "Хорих ангийн удирдлагуудтай уулзсан. Ажлын зохион байгуулалт ажилчдын ачааллыг зохицуулах шаардлага байна. Найман хүнд хариуцлага тооцоод өнгөрч болохгүй. Хүнийг хорьж, барьж залхаадаг тогтолцоог халах цаг нь болсон. Таван жилийн өмнө Д.Амарсайхан агсан шалгагдаж байгаад энд амиа алдсан. Түүнээс хойш хоёр ч хүн энд хоригдох үедээ эрүүл мэндийн шалтгаанаар амиа алдсан. Өнөөдөр жил зургаан сар шалгагдаад асуудал нь шийдэгдээгүй хүмүүс байна. Хорих байгууллагад хүний эрхийн нөхцөл байдлыг шинээр ярих зайлшгүй шаардлага байна. Хүний эрхийн хамгийн ноцтой зөрчил бол амиа алдах. Энэ бол маш том дохио. Мөсөн уулын орой цухуйж байна. Хуучин энд 500 хүн л байдаг байсан өнөөдөр 1000 хүн байна. Хүнийг олон хоногоор барьж, хорьдог залхаадаг хууль, хяналтын байгууллагын ажлын арга барил хуучин цаг үе рүү гээ орсон байна" гэв.