Ерөнхийлөгч Х.Баттулгын ивээл дор зохиогдож буй “Зүүн Хойд Азийн цахилгаан эрчим хүчний нэгдсэн сүлжээний стратеги” төслийн олон улсын чуулга уулзалт "Блю Скай” зочид буудлын хурлын танхимд болж байна. Манай улс Зүүн хойд Азийн цахилгаан эрчим хүчний зах зээлийн яг дунд нь оршдог.

Тус “Азийн супер сүлжээ” төсөл хэрэгжиж эхэлснээр манай улс Япон, Хятад, Орос, Солонгос зэрэг бүс нутгийн аварга зах зээлүүдэд нар, салхины эрчим хүчээ экспортолж, ам.доллар олох эдийн засгийн асар өндөр үр өгөөжтэй гэдгийг чуулганд оролцогчид онцолж байна.

Мөн АНУ-ын Сэргээгдэх эрчим хүчний лабораторийн судалгаагаар Манай улсыг асар их эрчим хүчний нөөцтэй буюу дэлхийн цахилгааны нийт хэрэглээний дөрөвний нэгийг дангаар Монголын эрчим хүч хангах боломжтой гэсэн судалгаа гарсан байдаг аж.

Уг олон улсын хурлыг хамтран зохион байгуулагчдын нэг нь Монголын бизнесийн зөвлөл юм.

Чуулга уулзалтын үеэр Монголын бизнесийн зөвлөлийн Удирдах зөвлөлийн дарга Б.Бямбасайхан хэлэхдээ, “Хамгийн шилдэг, сүүлийн үеийн дамжуулах сүлжээний, өндөр хүчдэлийн ухаалаг сүлжээний технологийг ашиглах бүрэн боломжтой нь тогтоогдсон. Эдгээр сүлжээг хооронд нь аль цэгээс аль цэгт нь яаж холбох вэ гэдэгт маш тодорхой зураг, схемүүд гарчихсан” гэлээ.

“Клийн Энержи Ази” компанийн Гүйцэтгэх захирал Э.Орчлон “Өнөөдрийн хуралд хүрэлцэн ирсэн оролцогч, сонирхогчдын тоог харахад сэргээгдэх эрчим хүчний боломжийг хэр сонирхож байгаа вэ гэдэг нь бэлхнээ харагдаж байна. Гадаад дотоодгүй сонирхоод эхэлчихсэн байна. Судалгааны урьдчилсан дүгнэлтийг харахад таатай мэдээллүүд ч олон бий. Технологийн хувьд асар их дэвшилт гарсан. Өндөр хүчдэлийн дамжуулах шугамуудыг хэрхэн бүтээх вэ, техникийн хувьд боломжтой юу гэдэг дүгнэлтүүд асар их боломж байгааг харуулдаг. 1958 онд анх Шведэд далай догуур өндөр хүчдэлийн шугам тавьж байсан. Энэхүү технологиийг эдийн засгийн хувьд хэрхэн хямдралтайгаар, эдийн засгийн үр өгөөжтэйгээр Азийн супер сүлжээ төслийн хэмжээнд ашиглах вэ гэдэг асуулт гарч байна.

Нөгөө талаар нөөцийг маш сайн судалсан. Манай улсыг нар салхины асар их нөөцтэй гэж өмнө нь ярьдаг байсан ч энэ удаагийн судалгаагаар илүү нарийвчлалтайгаар шалгаж тодорхойлсон. Үүний үр дүнд өмнө нь судалж байсан нөөцөөс хэд дахин их нөөц байгаа нь тогтоогдсон. Манай улс бусад орнуудтай харьцуулахад Азийн орнуудад сэргээгдэх эрчим хүч экспортлох боломжтой улс гэдэг нь батлагдсан. Эдийн засаг, техникийн хувьд өрсөлдөх боломжтой улсаар тодорхойлогдсон. Зарим хүмүүс энэ бол мөрөөдөл гэж шүүмжлэх хандлагатай байдаг. Азийн супер сүлжээ төслөөр дамжуулан Монгол улс эрчим хүч экспортлож чадах уу, үгүй юу гэдэг асуулт одоо хоцрогдчихоод байна. Харин хичнээн жилийн дараа вэ гэдэг цаг хугацаа хамгийн чухал. Япон, Солонгос улсуудаас эхлээд худалдан авалт хийх нь тодорхой болчихсон” гэлээ.

“Монхорус интернэшнл” ХХК-ийн Эрчим хүч, бизнес хөгжлийн газрын захирал Б.Батлхагва “Азийн супер сүлжээ” төслийн судалгааны эцсийн тайлан зургадугаар сард гарна. Азийн хөгжлийн банк зургадугаар сараас дахин сунгах байр суурьтай байгаа. Учир нь хоёр жилийн хугацаанд хийгдсэн судалгааны хариу гарсан ч дахин том том өөрчлөлтүүд орж байгаа тул нэмж судлах шаардлага үүссэн. Нөгөө талаар Монголын улс төрчдийн байр суурь, гадны орнуудын засгийн газрын байр сууринд өөрчлөлт орох магадлалтай тул харзнах байдал ч үүссэн. Иймд 2019 оныг дуустал судалгааны ажлаа үргэлжлүүлэх төлөвлөгөөг Азийн хөгжлийн банкнаас илэрхийлж байна. Монгол Улсын хувьд энэ төсөл хамгийн үр ашигтай. Дан ганц манай улсад гэлтгүй Зүүн хойд Азийн бүс нутгийн орнуудад эерэг нөлөөтэй. Тэгэхээр дэлхий нийтийн хөрөнгө оруулалтыг энэ сэргээгдэх эрчим хүчний зүг рүү татаж тэндээсээ бүх улс ашиг хүртээд суух боломжтой. Иймд ямар ч улс орны оролцогчид сөрөг байр суурийг илэрхийлэхгүй байгаа шүү” хэмээн байр сууриа илэрхийллээ.