Николас Мадуро Үндэсний засгийн газартаа бүтцийн өөрчлөлт хийхийн тулд сайд нараа огцрохыг уриалсан гэж дэд ерөнхийлөгч Делси Родригес мэдэгджээ. “Ерөнхийлөгч Николас Мадуро Боливарын засгийн газрын үйл ажиллагааг бүхэлд нь өөрчлөн шинэчлэх зорилгоор гүйцэтгэх засаглалыг огцрохыг хүссэн" хэмээн тэрбээр мэдэгдсэн байна. Ийнхүү бүтцийн өөрчлөлт хийх болсон нь “Симон Боливар болон Уго Чавесын эх орныг аливаа аюул заналаас хамгаалах зорилготой” гэж дэд ерөнхийлөгч онцолжээ.

Эргэн сануулахад, Венесуэл улсад энэ оны эхнээс улс төрийн хямрал нүүрлэсэн. Нэгдүгээр сарын 23-ны өдөр Венесуэлийн сөрөг хүчний тэргүүн Хуан Гуайдо өөрийгөө ерөнхийлөгчийн үүрэг гүйцэтгэгч хэмээн зарласан бол мөн өдөр нь АНУ тэргүүтэй бусад барууны улс орнууд түүнийг түр ерөнхийлөгч гэж хүлээн зөвшөөрсөн юм.

Энэ үйл явдлыг Венесуэлийн Ерөнхийлөгч Николас Мадуро төрийн эргэлт хийх гэсэн оролдлого гэж нэрлээд АНУ-тай дипломат харилцаагаа тасалж байгаагаа мэдэгдсэн. Мадурог Орос, Белорусс, Боливи, Иран, Хятад, Куба, Никарагуа, Сальвадор,Сири, Турк улсууд дэмжиж байгаа юм.

Б.АНАНД