Өнөөдөр Улсын Их Хурлын ээлжит бус чуулган 10 цаг 07 минутад гишүүдийн 73.3 хувийн ирцтэйгээр нээлтээ хийсэн.

Улсын Их Хурлын ээлжит бус чуулганаар хэлэлцэх асуудлын талаар эдийн засгийн өсөлтийг хангаж, хувийн хэвшлээ дэмжих, үндэсний үйлдвэрлэлээ дэмжиж ажилгүйдлийг бууруулах зорилготой багц хуулиудыг ээлжит бус чуулганаар хэлэлцэнэ гэдгийг Улсын Их Хурлын дарга Г.Занданшатар хэлсэн үгэндээ онцолсон билээ.

Улсын Их Хурлын ээлжит бус чуулганаар Татварын ерөнхий хууль, Аж ахуйн нэгжийн орлогын албан татварын тухай хууль, Хувь хүний орлогын албан татварын тухай хуулийн шинэчилсэн найруулгын төслүүд, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай, Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуульд өөрчлөлт оруулах тухай хуулийн төслийг хэлэлцэнэ.

Мөн Зэвсэгт хүчний Жанжин штабын даргыг томилох саналыг зөвшилцөх тухай, Улсын ерөнхий прокурорын орлогчийг зөвшилцөх тухай, Авлигатай тэмцэх газрын дарга, дэд даргыг томилох тухай асуудлыг тус тус хэлэлцэхээр тогтсон юм.

ГЭРЭЛ ЗУРГИЙГ: Г.БАЗАРРАГЧАА