Нийслэлийн Прокурорын газраас цаг үеийн асуудлаар мэдээлэл хийлээ. Нийслэлийн прокурорын газрын хэвлэлийн ажилтан Э.Эрдэнэсувд мэдээллийн эхэнд хэлэхдээ “Хэвлэл мэдээллийн хэрэгслээр нийтлэх боломжтой гэсэн зарим хэргүүдийн талаар мэдээлэл өгнө. Нэгдүгээрт Тавантолгойн нүүрсний ордын хөрөнгө оруулалтыг УИХ-аар батлуулах гэж байсан ажилд Ерөнхийлөгчийн зүгээс тодорхой баримтуудыг гаргаж өгөн, шалгуулахаар хүсэлт тавьсны дагуу Нийслэлийн прокурорын газраас хяналт тавин ажиллаж байна. Уг хэрэгт 2002 оны Эрүүгийн хуулиар зүйлчилж, албан тушаалын байдлаа урвуулан ашигласан гэсэн зүйл ангиар хэрэг бүртгэл нээн ажиллаж байгаа. Энэ асуудлыг энэ хэрэгтэй хамтад нь шалгуулахаар АТГ-т шилжүүлээд байна. Уг хэрэгт өнгөрсөн сарын 22-ны өдөр Ерөнхийлөгч асан Ц.Элбэгдоржийг гэрчээр байцааж асуусан. Мөрдөн шалгах ажиллагаа үргэлжилж байна” гэлээ.

-Ц.Элбэгдоржийн уран зургийг хураасан хэрэгт аль дүүргийн прокурор хяналт тавьж ажиллаж байгаа вэ. Хаанаас хурааж авсан юм бол?

-Хан-Уул дүүргийн прокуророос хяналт тавин ажилласан. Тэндээс тодруулах нь зүйтэй болов уу.

-Худалдаа хөгжлийн банкны удирдлагуудыг яллагдагчаар татах санал хүргүүлсэн гэсэн. Энэ талаар тодруулна уу?

-Эрдэнэтийн 49 хувийг ОХУ-аас 400 сая ам.доллараар худалдаж авсан хөрөнгийн эх үүсвэр тодорхойгүй хэргийг Эрүүгийн цагдаагийн алба, АТГ хамтарсан ажлын хэсэг мөрдөн шалгаж байна.

-С.Зориг агсны амь насыг хохироосон хэргийн талаар шинэ мэдээллүүд өнөөдрөөс шинээр гарч эхэллээ. Хэргийн талаар дэлгэрэнгүй мэдээлэл өгөх үү?  

-С.Зориг агсаны амь насыг хохироосон хэрэгтэй холбоотой хэрэг өмнөх шүүхийн шийдвэр хүчин төгөлдөр явж байгаа. Хэвлэл мэдээллийн хэрэгслээр гараад байгаа хоёр албан тушаалтныг хорьсон асуудал бий. Нууцын зэрэглэлтэй учраас хэвлэл мэдээллийн хэрэгслээр дэлгэрэнгүй мэдээлэл өгөх боломжгүй.

-Шүүгч нартай холбоотой хэрэг ямар шатанд явж байгаа.  Хэдэн шүүгчийг шалгаж байна вэ?

-Үндэслэлгүй хөрөнгөжсөн хэрэгт долоон шүүгчийг бүрэн эрхийг нь түдгэлзүүлэн, сэжиглэн шалгаж байна. Эрүүгийн хэрэг үүсгэсэн тохиолдол одоогоор байхгүй.

-ЖДҮ-гээс зээл авсан УИХ-ын гишүүдээс хэдэн гишүүнийг яллагдагчаар татсан бэ?

-Яллагдагчаар татсан таван гишүүн бий. Одоогоор шинээр нэмж яллагдагчаар татсан гишүүн байхгүй.