-ХУУЛИЙНХАН НОТЛОХ БАРИМТ БИЙ ГЭСЭН МЭДЭЭЛЭЛ ӨГЧ ЭХЭЛЛЭЭ-

Хууль зүйн дотоод хэргийн яамны сайд Ц.Нямдорж С.Зоригийн хэргээр 23-24 жилийн ялын чанга дэглэмтэй хорих ангид эдлэж буй Б.Содномдаржаа, Т.Чимгээ нарын ар гэрийнхнээс уучлалт гуйснаар хэрэг явдал ар араасаа хөврөж эхлээд байна. С.Зоригийн хэргийг хууль хүчнийхэн шийдэхдээ мөрдөн байцаах шатнаас эхлээд эрүүдэн шүүж, сэтгэцэд нөлөөлөх эм бэлдмэл хэрэглүүлж байгаад ял тулгаж улмаар гурван шатны шүүхээр оруулан ял оноосон нь батлагдаж эхлээд буй. Энэ асуудал сөхөгдөж эхэлмэгч Ц.Амгаланбаатарын Т.Чимгээг хорих ангийн өрөөнд орж ирэн дарамталж байгаа бичлэг байгаа талаар олон нийтэд ил болж эхэллээ.

Үүний дараа Засгийн газар ээлжит бусаар хуралдаж, С.Зориг агсны хэргийн материалтай холбоотой асуудлыг нууцын зэрэглэлтэй хэлэлцсэн. Уг хуралдааны дараа Монгол улсын шадар сайд Ө.Энхтүвшин сэтгүүлчдэд хандан мэдээлэл хийх үеэрээ хэлэхээ: Б.Содномдаржаа, Т.Чимгээ нарыг эрүүдэн шүүсэн гэх бичлэгийг үзээгүй. Прокурорын байгууллагаас тухайн бичлэгийг үзүүлэхийг хориглосон. Гэхдээ УИХ-ын гишүүд болоод иргэдэд нээлттэй үзүүлэх ёстой гэж бодож байна. Эрүүдэн шүүж хэргийг хүчээр хүлээн зөвшөөрүүлж, хилсээр гүтгэсэн бол үнэхээр ноцтой асуудал юм. Иймд Засгийн газрын гишүүдийн зүгээс тухайн бичлэгийг ил болгох нь зүйтэй гэж үзсэн" гэсэн юм.

Мөн Үндэсний аюулгүй байдлын зөвлөл /ҮАБЗ/ өнгөрсөн баасан гаригт С.Зоригийг хөнөөсөн хэргийг зохиомлоор илрүүлсэн асуудлыг авч хэлэлцсэн.

Ингэхдээ хамгийн гол нь аллагын гүйцэтгэгч хэмээн хоёр иргэнд хууль бусаар хэрэг тулгаж, түүнийгээ хүлээн зөвшөөрүүлэхийн тулд эрүүдэн шүүсэн асуудлыг ярьж, бичлэгийг ил болгох талаар санал солилцсон ч шийдэлд хүрэлгүй таржээ.

АТГ-аас Б.Содномдаржаа, Т.Чимгээ нарын эрүүдэн шүүсэн талаарх нотлох баримтуудыг бэхжүүлэх ажлуудыг хийж байгаа талаараа хэвлэлийн бага хурлын үеэр өгсөн билээ.

-ЭРҮҮДЭН ШҮҮСЭН ГЭХ АСУУДЛЫГ ШҮҮХ ХУРЛЫН ӨМНӨ Ч ЯРЬЖ БАЙСАН-

Шүүх хурлын өмнө болон хойно Т.Чимгээгийн ах Т.Хүрэлбатын хэлж байснаар “Дүүгийн маань хоригдож байгаа камерт 3:00 цагт Ц.Амгаланбаатар орж ирээд шорон хэсэж явах сайхан байна уу, чи С.Зоригийг алсан хэргээ хүлээ” гэж дарамталдаг гэнэ лээ” хэмээн хэвлэлд ярьсан байдаг.

Харин Б.Содномдаржаагийн ээж Л.Жавзмаагийн “Тагнуулынхан миний хүүг анх баривчлахаар ирэхдээ дарамтлах хүн, өрөөг бэлдчихээд ирсэн юм билээ. Төв аймгийн Цагдан хорих төвд бэлдсэн өрөөнд миний хүүг оруулан нүдийг чинь сохолно шүү, чихийг чинь огтолно шүү. Чи энэ хэргийг хүлээ гээд зодож нүддэг байсан гэсэн. Мөн Ц.Амгаланбаатарыг өрөөнд нь оруулан зодуулж дарамтлуулж байсан” хэмээн ярьсан нь баримтаар тогтоогдож байгаа бололтой.

Эрүүдэн шүүсэн асуудал яригдаж, хэлсээр ял эдэлж буй Б.Содномдаржаа, Т.Чимгээ нарын ар гэрийнхэн хэвлэл мэдээлэл өмнө нь хэрхэн яаж дарамталж байсан талаар ярьж эхлээд буй. Мөн ар гэрийнхнийг нь тагнаж чагнадаг байсан тухай ярьж эхлээд байгаа юм.

Т.Чимгээгийн ах Т. Хүрэлбат хэлэхдээ: Мөрдөн байцаах шатанд маш их дарамталж байсан гэсэн. Миний дүүгийн нөрхийг нь бас 14 хоног хорьсон. Хорьж байхдаа “Т.Чимгээ та хоёр одоо нэг гэрт амьдарна гэж байхгүй. Хохино. Чамайг алаад байшингийн хундааманд хийгээд цутгана шүү” гэж хэлсэн байсан. “Мөн Т.Чимгээг байцаалт авахдаа пиво уухыг санал болгож байсан. Төв аймгийн мөрдөнд байхдаа Ц.Амгаланбаатар Т.Чимгээгийн камерт орж ирж дарамталсан, хорих ангиар сэлгүүцэж буй бичлэг байгаа асуудал яригдаж байгаа” гэв.

Ийнхүү хэрэг явдал өрнөж, ял авсан Б.Содномдаржаа, Т.Чимгээ нарын ар гэрийнхэн байр сууриа илэрхийлж эхлээд байгаа энэ үед олон нийт бичлэг нотлох баримтыг эцсийн байдлаар дэлгэхийг хүсэж эхлээд байна. Учир нь үнэхээр эрүүдэн шүүсэн асуудал байгаа бол энэ маш ноцтой асуудал тул хэргийг эцэслэн шийдэх хэрэгтэй хэмээн үзэж байгаа юм. Ямар ч байсан Засгийн газрын хэмжээнд хүртэл яригдаж эхлээд байгаа хууль хүчнийхний энэхүү эрүүдэн шүүсэн гэх асуудал тун удахгүй нэг тийш шийдэгдэх бололтой.