2019 он гарснаас хойш багш нарын илүү цагийн мөнгийг Монгол Улсын Засгийн газраас олгохоо байжээ. СӨБ-ын багш нар өглөө 07:30 минутад ирээд, орой 18:00-19:00 цагт тардаг ч НЭГ цагийн илүү мөнгө л авдаг аж. Гэсэн ч цэцэрлэгийн багш нар хөдөлмөрийн хууль зөрчигдөж байна гэж гомдлолгүй ажилсаар л ирсэн гэж жагсаал, цуглаан зохион байгуулах үеэрээ хэлсээр байдаг. Нэгдүгээр сараас хойш илүү цагийн мөнгө аваагүй цэцэрлэгийн багш нар ажлын цаг дуусахаас нэг цагийн өмнө буюу 16:00-17:00 цагийн хооронд хүүхдүүддээ эцэг, эхэд нь хүлээлгэн өгөхөөс өөр сонголтгүй болжээ.

Нийслэлийн хэмжээнд үйл ажиллагаагаа явуулж буй нэлээд олон цэцэрлэг ийм шийдвэрийг гаргасан бөгөөд дунд нь хүүхдийн эрх ноцтой зөрчигдөж эхэлжээ. Мөн эцэг, эхчүүдэд ажлаа таслаад хүүхдээ цэцэрлэгээс нь авах уу эсвэл 18:00 цаг болтол "ширэн нүүрлэн" илүү цагийн мөнгө авдаггүй багшийг ажил дээр нь уях уу гэсэн сонголтын өмнө тулгарлаа. Эцэг, эхчүүдийн хэлж байгаагаар зарим цэцэрлэгүүд 15:30-16:30 минутын хооронд хүүхдүүддээ тарааж эхэлсэн гэх. Энэ цагаас хоцорвол илүү цаг тутамд 5000 төгрөг нэхдэг болсон талаар хэлж байв.

-ХҮҮХДИЙН ЭРХ ХАМГИЙН ИХ ЗӨРЧИГДӨЖ БАЙНА-

Илүү цагийн мөнгө олгогдохоо байснаас хойш цэцэрлэгийн багш нар болон эцэг эхчүүдэд ямар асуудал үүсч байгааг Хан-Уул дүүргийн улсын тэргүүний 71 дүгээр цэцэрлэгийн Боловсролын тэргүүний ажилтан, заах арга зүйч В.Ухаанбилэг багшаас тодруулсан юм.

Тэрбээр ярихдаа "Илүү цагийн мөнгийг олгохгүй байгаа учраас цэцэрлэгийн багш нар цагтаа тарахыг хүсч байгаа. Гэвч эцэг, эхчүүдэд маш хүндрэлтэй тусч ажил нь тараагүй учраас хүүхдээ цагтаа ирж авч чадахгүй байна. Цэцэрлэгийн багш нэгдүгээр сараас хойш НЭГ цаг цалингүй ажиллаж байна. "Багшийнх нь ажлын цаг дууссан, хүүхдээ өөрсдөө аргалаарай" гээд хаяад явчих ухамсар, ёс зүй байхгүй учраас эцэг, эхийг нь хүлээгээд л нэг цаг илүү ажилладаг. Цэцэрлэгийн багш нар өглөөний 08:00 цагаас оройны 17:30 минутад дундаа завсарлагагүй ажлын цаг дуусдаг. Цэцэрлэгийн үндсэн үйл ажиллагаа 16:40 минутад дуусч хүүхдүүдээ тарааж эхэлдэг боловч 50 минутад тарж амждаггүй.

Мөн хүүхдийн эрх, эрсдэл аюулгүй байдлыг хамгаалахын тулд "Гараас гарт" гээд гарын үсэг зуруулан эцэг, эхчүүдэд хүлээлгэн өгдөг учраас тухайн өдрийн жижүүр багш, үүдний жижүүр манаачид хүүхдийг үлдээх эрх багш нарт байдаггүй. Тиймээс бүлгийн багш нар хамгийн сүүлд гэртээ харих хүүхдийнхээ цагийг бүртгээд суухаас өөр аргаггүй. Цэцэрлэгийн багш нар бусад хүмүүстэй л адилхан үр хүүхэд, амьдралтай хүмүүс шүү дээ. Бид ч гэсэн хүүхдээ цэцэрлэг, сургуулиас нь авна гээд ажил байдаг. Ангийнхаа хүүхдүүдийг эцэг, эхчүүдэд нь хүлээлгэн өгөхийн тулд эрсдэл үүсгэж өөрийнхөө хүүхдийг цэцэрлэг, сургуулиас нь авалгүй оройтуулах үе бий. Өмнө нь илүү цагийн мөнгө авдаг байхад яаж ийж байгаад л хүн амьтнаас тусламж авч ар амьдралынхаа асуудлыг шийддэг байсан. Одоо илүү цагийн мөнгө авахгүй байгаа учраас хаа хаанаа маш их бухимдал үүсч байна.

Зарим эцэг эхчүүд цагтаа хүүхдээ авахын тулд сургуульд явдаг ах, эгч нарыг нь явуулчихаж байна. Тиймээс хүүхдийг эрсдэлд оруулахгүйн тулд эцэг, эхийг нь хүлээхээс өөр сонголт байдаггүй. Өмнө нь илүү цагийн мөнгө бодогддог байх үед жижүүр багш өглөөний 07:00 цагт ирээд эрт ирдэг хүүхдүүдээ хүлээж аваад бүлгийн багш нарыг нь иртэл халамжилдаг байсан. Харин одоо илүү цагийн мөнгө бодогдохгүй учраас бүх багш нар өглөөний 08:00 цагт ажил дээрээ ирэхэд 10 гаруй хүүхэд ирчихсэн анги ангидаа тоглож байхад зарим нь шатан дээгүүр гүйлдээд л байж байна. Хүүхдийн эрх хамгийн их зөрчигдөж байгаа. Тиймээс салбар яамнаас даруйхан арга хэмжээ аваасай гэж бодож байна" гэв.

-ЦЭЦЭРЛЭГИЙН БАГШ НАРТ ИЛҮҮ ЦАГИЙН МӨНГӨ ОЛГОГДОХ БОЛНО

Бид энэ асуудлаар БСШУСЯ-ны Сургуулийн өмнөх боловсролын бодлогын газрын дарга Г.Дуламжаваас тодруулахад "Хуучин цэцэрлэгийн багшид өдөр тутам хоёр цагийн илүү мөнгө олгогддог байсан. Энэ оны Төсвийн тухай хуульд багш нарын илүү цагийн мөнгө төсөвлөгдсөн. Тодорхой заалтад өөрчлөлт оруулах асуудлыг ойрын хугацаанд Засгийн газрын хуралдаанд оруулах болно. Тиймээс илүү цагийн мөнгө багш нарт олгогдох болно. Манай яамнаас Монгол Улсын Засгийн газрын 2018 оны 12 дугаар сард гарсан 382 дугаар тогтоолд нэмэлт өөрчлөлт оруулахын тулд яамдаас зөвшөөрөл авдаг. Өнөөдрийн байдлаар энэ үйл ажиллагаан дээрээ явж байгаа. Багш нарт өмнө нь олгодог байсан илүү цагийн мөнгийг олгож байгаач гэсэн сайдын гарын үсэгтэй албан тоотыг аймаг, нийслэлийн засаг дарга нарт хүргүүлсэн байгаа" гэв.