Монголын боловсрол, шинжлэх ухааны үйлдвэрчний эвлэлийн холбооноос өнөөдөр мэдээлэл хийлээ. Тодруулбал, Төрийн албаны тухай хуульд нэмэлт, өөрчлөлт орсонтой холбоотойгоор 2018 оны эцэс, 2019 оны эхэнд гаргасан Засгийн газрын тогтоол шийдвэрүүд нь амьдралд нийцэхгүй, холбогдох хууль зөрчсөн, хүрсэн түвшнүүдийг дордуулсан байна гэж тэд мэдэгдсэн юм.

Монгол Улсын Засгийн газраас 2018 оны 12 сарын 19-ний өдөр 382 дугаар тогтоол гаргаж илүү цагаар ажиллуулахыг хориглосон байдаг Хэрэв илүү цагаар ажилласан бол хөлсийг олгохгүй байхаар тусгасан юм. Үүнээс болоод илүү цагаар ажилласан багш, ажилчдын цалин хөлс буурч байгааг багш нар эсэргүүцэж байна. Төрийн үйлчилгээний байгууллагууд болох сургууль, цэцэрлэгийн багш нар ажлын онцлогоос шалтгаалан байнга илүү цагаар ажилладаг. Жишээлбэл, Ердийн цэцэрлэгийн багш нарын нэг өдрийн албан ажил 10 цаг үргэлжилдэг. Цэцэрлэгийн багш өдөр тутам хоёр цаг илүү цагаар ажилладаг гэсэн үг. Бага насны хүүхдийн амь нас, эрүүл мэндийг хариуцан тасралтгүй хараа хяналтдаа байлгадаг багш нарын илүү цагаар ажиллах хөлсийг бүр мөсөн хассан бөгөөд үүнийг зохицуулах тодорхой шийдвэр алга байна. Энэ асуудлыг яаралтай шийдвэрлэхгүй бол тэмцлийн дараагийн хэлбэрт шилжихэд бэлэн байна хэмээн тус холбооны тэргүүн ярьсан.

Монголын боловсрол, шинжлэх ухааны үйлдвэрчний эвлэлийн холбооны дарга Ж.Батзориг: “Боловсролын салбарт ажиллаж буй мэргэжилтэнүүд ажлын онцлогоосоо шалтгаалан илүү цагаар ажилладаг. Энэ хөлсийг нь Засгийн газрын 382 дугаар тогтоолоор хязгаарлаад байна. Жишээлбэл, ердийн цэцэрлэгийн багш нар өдөрт 10 цаг ажиллах ёстой байдаг. Цэцэрлэгийн багш нар илүү цагаар ажиллах зайлшгүй шаардлага гардаг. Өнөөдөр багш нарын илүү цагийн 300 орчим мянган төгрөг цалингаас нь хасагдаж байна. Засгийн газар яаралтай үйлдвэрчний эвлэлийн байгууллагатай зөвшилцөж, өөрчлөлт оруулах шаардлага байна. Багш нарын хувьд Засгийн газраас цалин нэмсэн болдог ч буцаад нэмэгдэл урамшуулал, илүү цагийн мөнгийг нь хасчихдаг. Ингэхээр эргээд гар дээрээ бага цалингаа авч байна” гэв.