Хоёрдугаар сард Ханойд болсон дээд хэмжээний уулзалтын үеэр АНУ-ын Ерөнхийлөгч Дональд Трамп БНАСАУ-ын удирдагч Ким Жон Унд Хойд Солонгосын бүхий л цөмийн зэвсэг болон түлшийг АНУ-д өгөхийг шууд уриалсан баримт бичиг өгсөн хэмээн Ройтерс агентлаг мэдээллээ.

Эх сурвалжийн мэдээлснээр дээрх баримт бичиг нь солонгос болон англи хэл дээр бэлтгэгдсэн байсан бөгөөд хоёрдугаар сарын 28-ны өдөр Metropol зочид буудалд уг бичгийг хүлээлгэн өгсөн байна. Ройтерс агентлагт мэдээлэл өгсөн эх сурвалжийн мэдээлснээр энэ үйл явдал нь Трамп цөмийн зэвсэггүй болгох төлөвлөгөөтэй байгаа гэдгээ Ким Жон Унд өөрөө биечлэн тодорхой илэрхийлсэн анхны тохиолдол байсан гэнэ.

Энд дуулгахад, чухамхүү хоёрдугаар сарын 28-ны өдөр хоёр тэргүүний төлөвлөгөөт ажил хэрэгч оройн хоол цуцлагдан, тэд тус тусын буудал руугаа явцгаасан юм. Ийнхүү оройн хоол цуцлагдах болсон шалтгааны талаар аль ч тал ямар ч тайлбар хийгээгүй, харин Ройтерс агентлагийн мэдээлсэн тэрхүү баримт бичигт Ханойн дээд хэмжээний уулзалт бүтэлгүйтсэн шалтгааныг тайлах учиг байж мэдэхээр байна.

Ройтес агентлагийн олж авсан, англи хэл дээрх баримт бичигт БНАСАУ-ын цөмийн дэд бүтэц, биологийн болон химийн зэвсэг бүтээх хөтөлбөрүүдийг устгах, түүнчлэн бүхий л баллистик пуужин, хөөргөх төхөөрөмж болон тэдгээртэй холбоотой объектуудыг бүрэн буулгахыг уриалсан байжээ.

Түүнчлэн, Пхеньяныг цөмийн хөтөлбөрийнхөө тухай бүх талын тунхаг бичиг гаргах, цөмийн дэд бүтцийн аливаа объектуудын барилгыг зогсоох, мөн түүнчлэн Америк болон олон улсын шинжээчдийг нэвтрүүлэхийг АНУ шаардсан байна.

Ройтерсын онцолсноор, Трампын Үндэсний аюулгүй байдлын зөвлөх Жон Болтоны гаргасан, Хойд Солонгос нэг бус удаа хүлээж аваагүй, цөмийн зэвсэггүй болгох талаарх эртний, хэт хатуу “Ливийн загварчлал”-ыг агуулсан байх магадлалтай гэнэ. Энд дуулгахад, 2003 онд , олон улсын хориг арга хэмжээг цуцлуулахын тулд Ливи улс үй олноор хөнөөх зэвсэг боловсруулахаас татгалзан, улс руугаа олон улсын шинжээчдийг оруулж байв. Харин дараа нь энэ улсын хувь заяа хэрхснийг сайн мэдэж байгаа Ким Жон Ун Ливид тулгасан шиг тулган шаардалтыг хүлээн зөвшөөрөх нь юу л бол.

Өмнө нь Трамп олон нийтийн өмнө тайлбар хийхдээ Болтоны аргаас аль болох зайлсхийж, “Ливийн загварчлал”-ыг гагцхүү зөвшилцөлд хүрч чадахгүй нөхцөлд ашиглаж болохыг онцолж байсан. Гэсэн ч Ханойн дээд хэмжээний уулзалтаар хэт тулган шаардсан энэ баримт бичгийг гардуулсан нь Ким Жон Унд гутаан доромжилсон, өдөөн хатгасан мэт санагдсан байж мэдэх юм. Эргэн сануулахад, АНУ болон БНАСАУ-ын анхны дээд хэмжээний уулзалт 2018 оны зургадугаар сарын 12-нд Сингапурт болж байлаа. Энэ уулзалтын дүнгээр талууд хамтарсан баримт бичигт гарын үсэг зурж, Пхеньян Вашингтоны зүгээс аюулгүй байдлыг хангах баталгаа авсны хариуд Солонгосын хойгийг цөмийн зэвсэггүй болгох үүрэг хүлээсэн юм.

Харин хоёр дахь удаагийн дээд хэмжээний уулзалт өнгөрсөн хоёрдугаар сарын сүүлээр Вьетнамын нийслэлд болсон ч талууд ямар ч баримт бичигт гарын үсэг зуралгүй, хамтаран хэвлэлийн хурал хийлгүй, товчхондоо уулзалт бүтэлгүйтлээр өндөрлөж байв.

Б.АНАНД