Якутад, Дээд Лена голын ай савд байх хадны зурган дээрээс Зүүн Хойд Холбооны их сургуулийн бичиг үсгийн музейн мэргэжилтнүүд Чингисийн удмын дардас олсон талаар ОХУ-ын Регнум агентлаг мэдээллээ.

Эх сурвалжийн дамжуулснаар Большие голы суурингаас эхлээд Жигалов тосгон хүртэлх нутаг дэвсгэрт хадны зургууд бүхэл бүтэн цогц дүрслэлийг үүсгэсэн гэж мэргэжилтнүүд онцолсон байна. Гэхдээ дүрс зургуудын ихэнх нь якутуудын дээд өвгийн үлдээсэн ул мөр байсан тул энэ дундаас Чингисийн удмынхны дардасыг олсон нь ер бусын нээлт хэмээн шинжээчид онцолжээ.

“Дардсан дундаас бид сонирхолтой тэмдэг олж харсан. Ийм зургийг эзэн хаан, удирдагчид үлдээдэг байсан юм. Бид өмнө нь олдсон дардасуудтай харьцуулж үзэхэд Чингис хааны ач хүү болох Бат хааны үед хамаарах Алтан ордны төрийн сүлдтэй их адилхан харагдсан” хэмээн музейн мэргэжилтнүүд мэдэгджээ.

Түүнчлэн Чингис хааны удмын дардас мөн гэдгийг батлахын тулд нарийвчилсан судалгаа хийх хэрэгтэй гэдгийг мөн онцолсон байна.

Б.АНАНД