Монгол Улсын Гавьяат тамирчин, дугуйн спортын нэрт тамирчин Жамсрангийн Өлзий-Орших зуурдаар таалал төгсч, Монголын их спортод хүнд гарч тохиолоо. Монголын дугуйн спортыг хөгжүүлэхэд үнэтэй хувь нэмэр оруулсан, энэ спортыг хөгжүүлэхэд сэтгэл зүрхээ зориулж явсан тэрээр 1997 оны дугуйн Дэлхийн аварга шалгаруулах тэмцээнээс Монголын дугуйчдын анхны хүрэл медаль, 2002 оны Дэлхийн аварга шалгаруулах тэмцээнээс мөнгөн медаль хүртэж байсан юм.

Түүний спортын төлөө гэсэн чин сэтгэл, тамирчны өндөр ур чадвар, залуу хойч үеэ бэлтгэн дасгалжуулсан хөдөлмөр зүтгэл, хувь хүнийх нь зан чанарыг спортынхон төдийгүй спорт сонирхогчид, Монголын ард түмэн хүндлэн хайрлаж ирсэн билээ. Тэрбээр 2008 оноос тамирчны хувиар зодог тайлж, дасгалжуулагчийн албанд шилжсэн байна. Түүний амжилтуудыг дурдвал:

1984-2008 он хүртэлх хугацаанд өсвөр, залуучууд, насанд хүрэгчдийн Улсын аварга шалгаруулах тэмцээнд 10 гаруй удаа, мөн Бүх ард түмний спартакиадад олон удаа аварга болж байсан. түрүүлсэн. Монгол Улсын рекорд амжилтыг нийт 8 удаа шинэчлэн тогтоосон.

1997 онд Малайзад болсон B зэрэглэлийн Дэлхийн аварга шалгаруулах тэмцээнээс хүрэл медаль, 2001 онд БНХАУ-д болсон мөн Дэлхийн аварга шалгаруулах тэмцээнээс мөнгөн медаль хүртсэн.

1999 онд Японд болсон Дэлхийн аварга шалгаруулах тэмцээний багийн 100 км-ын уралдаанд Монгол Улсын рекорд амжилтыг шинэчлэн тогтоосон.

“Барселон-1992” олимпийн наадамд амжилттай оролцсон.

1985-1988 онд Эрхүү-Улаанбаатарын чиглэлд болдог Найрамдлын уралдаанд багийн дүнгээр II, хувийн дүнгээр III байрт шалгарч байсан.

Азийн аварга шалгаруулах тэмцээнд 10-аад удаа, Азийн спортын их наадамд зургаан удаа, бусад олон услын чанартай уралдаануудад нийт 30-аад удаа эх орноо төлөөлөн уралдаж, алт, мөнгө, хүрэл медалийг хүртэж байв. МҮОХ-ны “Бөртэ чоно” шагналыг хоёр удаа хүртэж байсан.