Монгол Улсад 2020 оны сонгуулийн салхи аль хэдийн сэвэлзээд эхэлжээ. Хаврын чуулган нээлтээ хийснээс хойш “Твиттер, фэйсбүүкт олон дагагчтай твиттер аккаунт, пэйж хуудас үнэ тохирч хямдхан зарлаа” гэсэн мэдээлэл олонтоо харагдах боллоо. 2016 оны сонгуулийн үеэр 20 мянган дагагчтай твиттер хаяг “Приус-20” хүрч хүмүүсийн шуналыг хөдөлгөсөн. Нэг ёсондоо дөрвөн жилийн өмнөөс Монгол Улсад сошиал сүлжээний аккаунт наймаалцах шинэ төрлийн бизнес сууриа тавьсан. Өнөөдөр энэ бизнес аль хэдийн цэцэглэж тогтсон үнэ ханштай болсноос гадна эмэгтэйчүүд, улс төр, бизнес, +18 гээд маш олон төрлөөр цахим хаягаа хөгжүүлснийхээ дараа өндөр үнээр дамлан зардаг нь нууц биш болсон.

Ихэнх жиргээч нар 10 мянган дагагчтай болохоороо хаягаа зарах сонирхолтой болдог. Яг өнөөдрийн байдлаар ТАВАН мянгаас дээш дагагчтай твиттер хаягийн зах зээлийн ханш 500 мянган төгрөгөөс эхэлж байна.

Тухайлбал, твиттерийн ертөнцөд олон танигдаагүй урсгалаараа явж байгаад 5000-7000 дагагчтай болсон аккаунт 250-500 мянган төгрөг, 10 мянган дагагчтай нь нэг сая төгрөг, өөрийн гэсэн өнгө төрхтэй, өвөрмөц, сонин содон жиргээгээрээ твиттерийн ертөнцөд танигдсан 20-25 мянган дагагчтай хаяг 2.5-3 сая төгрөгийн хооронд, 30 мянгаас дээш дагагчтай хаягууд мэдээж олны танил, урлагийнхан, улс төрийн бүлгэмийнхэн багтдаг. Тэд танилын хүрээгээ ашиглан хаягаа таван сая хүргэх нь энүүхэнд.

Ирэх жилийн өдийд дээрх үнэ ханш нэг дахин өснө. 2016 оны сонгуулийн үеэр твиттер хаягаа хэдэн бор төгрөг болгосон туршлагатай жиргээчид бусад нь аккаунтаа зарна гэхээр "2020 оны сонгууль болоход ганцхан жил дутуу байна. Үлдсэн хугацаандаа дагагчдаа өсгөж байгаад сонгуулийн үеэр овоо хэдэн төгрөг болгочих" гэсэн зөвлөгөөг өгч байх юм.

Олон дагагчтай хаягийг ямар хүмүүс худалдаж авдагийг сонирхож үзтэл багахан хувь нь шинэхэн жиргээчид. Тэд өөрсдийн гэсэн бичил бизнестэй эсвэл нийгэм рүү чиглэсэн сайн дурын ажил хийдэг. Үүгээрээ олонд амархан танигдаж, нийгэмд байр сууриа олох чин хүсэлтэй. Мөн шинээр байгуулагдсан бизнесийн байгууллагууд болон хэвлэл мэдээллийн ертөнцөд шинээр мэндэлж буй цахим сайтууд олон лайктай пэйж хуудас, твиттер аккаунт худалдаж авдаг. Үлдсэн хэсэг нь сонгуулийн үеэр өрсөлдөгчөө намнах гэсэн ард түмний тархийг угаах зорилготойгоор твиттер хаяг худалдаж авдаг.

Улс төрийн намууд өмнө нь иргэдийг эх орны хишиг, хүүхдийн мөнгө зэргээр хуурч сонгуульд ялалт байгуулдаг байсан. Сүүлийн хэдхэн жилийн дотор монголчууд олон нийтийн сүлжээ ашиглаж буй идэвхтэй хүмүүсийн тоогоороо Ази тивдээ толгой цохидог. Хууль, шүүхийн байгууллага нь хүртэл фэйсбүүк, твиттерээр гарсан мэдээллийн мөрөөр ажлаа хийдэг болсон энэ цаг үед сошиал сүлжээгээр дамжуулж сонгогчдынхоо тархийг угааж, итгэл үнэмшил төрүүлэх явдал 2020 онд дахин давтагдана. Үүнд жиргээчдийн оруулж буй хувь нэмэр асар их.