Өнөөдөр АТҮТ-ийн гадаа Хөвсгөл-Улаанбаатар чиглэлд тээвэр эрхэлдэг жолооч нар жагсаал зохион байгууллаа.

Тодруулбал, Хөвсгөл-Улаанбаатар чиглэлд зорчигч тээврийн үйлчилгээ 08:00, 15:00, 18:00, 20:00 цагуудад явдаг ч АТҮТ-өөс өнгөрсөн долоо хоногт буюу энэ сарын 12-ноос эхлэн 19:00 цагийн шинэ давтамж нэмж, “Чингүн хурд” компанид өгөх шийдвэр гаргажээ. Ийм жолооч нар энэхүү шийдвэрийг эсэргүүцэж жагсаал зохин байгуулж байгаагаа мэдэгдсэн юм.

Улсаа аврах ард түмний үндэсний хөдөлгөөний ерөнхий зохицууагч Б.Жагар:

“Нөхөрлөл зам хоршоо”, “Мин транс” компани нь 19:00 цагт давтамж авах талаар удаа дараа хүсэлтийг АТҮТ-д өгсөн байсан. Гэтэл ямар ч сонгон шалгаруулалт зарлалгүйгээр “Чингүн Хурд Транс ” компанийг 19:00 цагийн давтамжид оруулсан байна" гэлээ.

Жолооч нар:

“Нөхөрлөл зам хоршоо”, “Мин транс” компаниуд нэг нь арав, нэг нь хорь гаруй жил үйл ажиллагаагаа ямар нэгэн эрсдэл сааталгүй эрхэлж ирсэн. Гэвч 19:00 цагийг хуувь бус компани булааж аваад байна. Үүнийг бид эсэргүүцэж байна. Ямар дарга нь гарын үсэг зурж, зөвшөөрөл хэрхэн олгосныг мэдэхгүй. Анх 2017 онд “Нөхөрлөл зам хоршоо”, “Мин транс” компаниудтай “Тахилт транс” гэх компани тохиролцоонд хүрч зөвшилцөөд Улаанбаатар-Мөрөн чиглэл тээвэр хийж байсан. Харамсалтай нь тухайн компанийн жолооч нар хоёр удаа ноцтой осол хийж, шаардлага хангахгүй байсаар хасагдсан. Одоо нэрээ “Чингүн Хурд Транс” болгон өөрчлөөд ороод ирсэн гэж бид хардаж байгаа” гэлээ.