18 УЛСЫН ЭЛЧИН САЙД, БАЙНГЫН ТӨЛӨӨЛӨГЧИЙН ГАЗРЫН ДАРГЫГ ТОМИЛНО

Ирэх долоо хоногт Казакстан, Польш, Унгар, Египет, Тайланд, Сингапур, Лаос, Киргиз, Австрали, Канад, ОХУ, БНСУ зэрэг оронд суух Элчин сайдын нарын томилгоог УИХ-аар хэлэлцэнэ. Эдгээрээс гадна зургаан байнгын төлөөлөгчийн газрын даргыг сонгох юм.

Гадаад хэргийн сайд Д.Цогтбаатар энэ талаар “Н.Чимгүүндарь, Б.Хурц, Г.Тэнгэр нарыг Элчин сайдаас татаж оронд нь өөр хүмүүс томилохоор ярьж байна. 10 гаруй Элчин сайдын асуудал яригдана. Ажлаа хийх ур чадвар, төрд ажилласан туршлага, төрөөс өгсөн даалгаврыг шинэлгээр сэтгээд биелүүлж чадах ур чадвар шалгуураар хүмүүсээ оруулж ирнэ” гэх мэдээллийг өгсөн.

Н.Чимгүүндарийг Тайланд, Б.Хурцыг БНСУ-д, Г.Тэнгэрийг Австрали улсад суух Элчин сайдаар УИХ-аас дэмжсэн ч Ерөнхийлөгч хүлээн авахгүй гэдгээ мэдэгдсэнээр тэднийг буцаан татсан. Тэдний оронд хэн, хэн Элчин сайдаар томилогдох нь одоо олон нийтийн анхаарлыг татах мэдээж.

Хэн аль улсад Элчин сайдаар томилогдохыг одоогоор тас нууж буй ч зарим хүмүүсийн нэрс албаны хүрээнд түрүүчээсээ тодорч эхлээд байна.

Тодруулбал, Гадаад харилцааны яамны Ази Номхон далайн орнуудын газрын захирал Э.Сарантогос,

Европын газрын захирал М.Цэнгэг,

Гэрээ, эрхзүйн газрын захирал А.Төмөр,

мөн яамны Бодлого төлөвлөлтийн газрын захирал Ш.Одонбаатар,

Хөрш орнуудын газрын захирал Т.Жанабазар,

Гадаад худалдаа, эдийн засгийн хамтын ажиллагааны газрын захирал В.Энхболд,

Төрийн захиргаа, удирдлагын газрын захирал Н.Анхбаяр ,

Америк, Ойрхи Дорнод, Африкийн газрын захирал Д.Гансүх нарыг дээрх улсуудад суух Элчин сайдаар томилохоор ярьсан байна.

Ц.НЯМДОРЖ САЙДЫН ХҮҮ Н.АНХБАЯРЫГ АВСТРИ УЛСАД СУУХ ЭЛЧИН САЙДААР ТОМИЛОХ УУ

Энд нэр дурдагдаж байгаа Н.Анхбаяр нь Хууль зүй, дотоод хэргийн сайд Ц.Нямдоржийн хүү бөгөөд одоо Австри улсад Элчин сайдаар яригдаж байгаа ажээ. Тэрбээр Гадаад харилцааны яамны Төрийн захиргаа удирдлагын газрын захирлаар ажиллаж байна. Түүнийг Засгийн газрын тэтгэлгээр гадаадад сурсан ч мөнгөө буцааж төлөөгүй гэх мэдээлэл гарсан билээ.

Энэ удаад, Н.Чимгүүндарь, Г.Тэнгэр, Б.Хурц нар шиг хүмүүсийг Элчин сайдаар томилохгүй байхыг олон анхааруулж байна. Н.Чимгүүндарийн хувьд УИХ-ын гишүүн эгчтэй, 36 настай гадаад харилцааны салбарт ажиллаж байсан ч хангалттай туршлагагүй гэдэг шалтгаанаар олон нийтийн эсэргүүцэлтэй тулгарсан. Энэ нь аргагүй, Элчин сайд нь Монгол улсыг тухайн улсад төлөөлөх нүүр царай юм. Тиймээс дипломат харилцааны хангалттай туршлага, мэдлэгтэй хүн уг албан тушаалд томилогдох ёстой.

Харин Г.Тэнгэр, Хурц нарын хувьд мэргэжлийн бус гэдгээрээ гологдсон. Б.Хурцын хувьд Тагнуулын Ерөнхий газрын даргаар ажиллаж байсан бол Г.Тэнгэрийг бизнесмэн хүн гэх мэдээлэл байсан билээ. Элчин сайдын ажлыг гадаад харилцааны өргөн мэдлэг, өндөр боловсролтой хүн хийх ёстой. Харин тус хоёр хүн дээр Элчин сайдын ажлыг улс төрийн тохироонд дагалдах бэлэг болгон өгчихсөн шиг харагддаг.

Дашрамд дурдахад, Гадаад орнуудад суух Элчин сайд нарын хугацаа 3 жил байсныг өөрчилж 4 жил болгон нэмэгдүүлээд байгаа билээ.