Дорноговь аймгийн Даланжаргалан сумын Цомог багийн нутагт жонш баяжуулах үйлдвэрийн хаягдлын далан сэтэрсэн гэсэн мэдээллийн дагуу аймгийн Засаг даргын орлогч Г.Эрдэнэцэцэг, АИТХ-ын төлөөлөгч Х.Дэлгэрцэцэг, Даланжаргалан сумын Засаг дарга С.Уранцэцэг болон холбогдох мэргэжлийн байгууллагуудын төлөөлөл газар дээр нь очиж ажилсан юм. Жонш баяжуулах үйлдвэрийн эзэмшигч “Кевин инвест” ХХК үйлдвэрийн барилгыг 2008 онд ашиглалтад оруулан үйл ажиллагаа явуулж байгаад 2014 онд үйлдвэрийн ажил зогссон. Тус үйлдвэрийг “Эко хэлхээ” ХХК-д 2018.01.02-ны өдрөөс хоёр жилийн хугацаатай түрээсэлж 2018 оны тавдугаар сард үйл ажиллагаа эхлүүлсэн. Уг компанид орон нутгийн 54 иргэн, Хятад 25 мэргэжилтэн ажилладаг. Хаягдлын сан нь жонш баяжуулах үйлдвэрээс 350 м зайд байрладаг бөгөөд 170 мянган м3 багтаамжтай, далан байгуулагдсанаас хойш засвар, нөхөн сэргээлтийн ажил хийгдээгүй. Мөн ажилчдад хөдөлмөрийн аюулгүй ажиллагааны зааварчилга өгөөгүй улмаас 2019 оны 04 дүгээр сарын 14-ний өдөр хаягдлын далангийн хуримтлагдсан лагийг авах явцад далан нимгэрч хөрсөнд нэвчилт өгссөнөөр 1,7 км газарт урсаж тогтоц газар 110 см, уурсац газар 60 см нэвчсэн байна гэж албаны хүмүүс хэллээ. Даланжаргалан сумын холбогдох мэргэжилтнүүд газар дээр нь ажиллаж үйл ажиллагааг түр зогсоох, ус урссан талбайн гадуур хамгаалалтын хашаа татаж хяналт тавьж чиглэлийг өгч, бохирдуулах нөлөөллийг тодорхойлохоор “Эко үнэлгээ” ХХК-тай гэрээ байгуулан ус хөрснөөс дээж авчээ. Аймгийн Мэргэжлийн хяналтын газрын улсын байцаагчид тус компанийн үйл ажиллагааг зогсоосон. Ажлын хэсэг “Эко хэлхээ” ХХК-ийн захирал Б.Энхбат, үйлдвэрийн дарга Ц.Бат-Ирээдүй нартай уулзаж тус компанийн Хөдөлмөрийн аюулгүй байдал, үйлдвэрийн үйл ажиллагааны төлөвлөгөө, байгаль орчинд нөлөөлөх байдлын нарийвчилсан үнэлгээ, гарсан эрсдэлийн дараа яаралтай авч хэрэгжүүлж байгаа байдалд хяналт шалгалт хийж Даланжаргалан сумын онцгой комиссыг хуралдуулж дараах чиглэлийг өглөө. Үүнд: бохирдсон газарт экологийн хохирол тооцуулах ажлыг яаравчлах хөрс суулгалт, нөхөн сэргээх эрүүлжүүлэх ажлыг мэргэжлийн байгууллагын зөвлөмжийн дагуу богино хугацаанд хийж дуусгах байгаль орчинд учруулсан хохирлыг тус компаниар бүрэн барагдуулах гэх зэрэг арга хэмжээ авна гэлээ.