Монгол Улсын Засгийн газраас 2-12 хүртэлх насны хүүхдүүдийн шүдийг эрүүлжүүлэх зорилгоор “Эрүүл шүд-Эрүүл хүүхэд” үндэсний хөтөлбөрийг 2019 оноос эхлэн 5 жилийн хугацаанд хэрэгжүүлэхээр төлөвлөсөн. Энэ хөтөлбөрт Улсын хэмжээнд 725 мянга, Ховд аймгаас нийт 21808 хүүхэд хамрагдаж, тус бүр Эрүүл мэндийн даатгалаас олгох 60 мянган төгрөгөөр амны хөндийн эрүүл ахуйн урьдчилан сэргийлэх үзлэг, эмчлэн эрүүлжүүлэх тусламж, үйлчилгээ авах ажээ. Ховд аймгийн эрүүл мэндийн даатгалын байгууллагатай гэрээ байгуулсан эхний удаа 2019 онд 2-6 хүртэлх насны хүүхдүүдийг түлхүү хамруулахаар зорьж ажиллаж байгаа талаар салбарын мэргэжилтнүүд хэллээ. Мөн Хаш сондор шүдний эмнэлэг Жаргалант сумын Буянт, Жаргалан өрхийн эрүүл мэндийн төвд харьяалагддаг өрхийн хүүхдүүд болон Алтай, Буянт, Зэрэг, Мянгад, Цэцэг сумын хүүхдүүдэд үйлчилгээ үзүүлнэ гэлээ. Харин Сувдан шигтгээ шүдний эмнэлгээр Бугат, Баатархайрхан ӨЭМТ-үүдэд харьяалагддаг өрхийн хүүхдүүд, Булган, Дарви, Мөст, Үенч, Ховд, Чандмань сумын хүүхдүүд үйлчлүүлэх юм. Содон сондор эмнэлэгт Жаргалант сумын Рашаант ӨЭМТ-ийн харьяаллын болон Дөргөн, Дуут, Манхан, Мөнххайрхан, Эрдэнэбүрэн сумын хүүхдүүд амны хөндийн эрүүл мэндийн тусламж, үйлчилгээг авахаар хуваарилсан байна.