Өнөөдөр төрийн ордонд “Говийн хөгжил ба тулгамдсан асуудал” сэдэвт хэлэлцүүлгийг Ж.Батзандан, Л.Болд, Л.Энхболд тэргүүтэй гишүүд зохион байгууллаа. Хэлэлцүүлэгт говийн аймгуудын иргэдийн тѳлѳѳлѳл болон ТББ-уудын тѳлѳѳлѳл, тѳрийн агентлагуудын удирдлага болох 150 орчим хүн оролцсон байна.

Дорноговь аймгийн иргэн О.Баасанжав: “Бид шүтэх газаргүй, амьдрах газаргүй боллоо. Орон нутгийн удирдлага гэж байхгүй болсон. Ард иргэд газар нутаг шашин шүтлэгээ хамгаалж байгаа. Хэн яагаад тусгай зөвшөөрөлтэй газрыг олгодог юм бэ. Хамгийн наад захын жишээ Хамрын хийдийн асуудал байна. Иргэд эсэргүүцсэн, тэмцсэн. Хамрын хийдийг ухуулахгүй юм чинь одоо өөр газар олгоё гэж ярьж байна. Би залуу хүн, амьдрах 0,7 га газраа авч чадаагүй явж байхад, Хятадууд шашин шүтлэгийнх газрыг авчихсан байдаг. Хамрын хийдийн газрын асуудал дан ганц Дорноговьчуудын асуудал биш. Энэ бол дэлхий нийтийн асуудал” гэлээ.

АМГТГ-ын Кадастрын хэлтсийн дарга Д.Дашзэвэг, “Хамрын хийдийн газрын асуудал цахим орчинд багагүй тархсан. Онцгой анхаарал татсан. Уг тусгай зөвшөөрөл олгогдоод цуцлагдсан байх хугацаанд орон нутаг тусгай хэрэгцээнд авсан байсан. Тусгай хэрэгцээнд авсан байхад шүүхийн шийдвэрээр дахин сэргэсэн. Одоо “WSGL” болон “Олон ихт баян” гэсэн компаниудад хоёр тусгай зөвшөөрөл бий болчихсон хүчин төгөлдөр байгаа. Хамрын хийдээс Захиргааны хэргийн шүүхэд гомдол гаргасны дагуу шүүхийн шатанд хэлэлцэгдэж байгаа. Шүүхээс гарсан шийдвэрийн дагуу тусгай зөвшөөрөлтэй холбоотой зохицуулалт хийгдэнэ” гэсэн хариултыг өглөө.

Дундговь аймгийн Цагаандэлгэр сумын өндөр настан Ч.Мөнхнаст “Газар нутгийг малчдад нь яагаад эзэмшүүлж болдоггүй юм бэ. Нэг л өглөө сэрэхэд гадаад дотоодын хүмүүс өрөмдөөд ухчисан байх юм. Иймд эзэмшлийн тухай асуудлыг бодох цаг болсон. Зөвхөн Цагаандэлгэр суманд есөн лиценз олгосон байна. Энэ есөн лицензийг нэгээс гурван хүн дамжуулан худалдаалсан байна”

Өмнөговь аймгийн Цогтцэций сумын иргэн н.Буддорж: “УИХ-ын гишүүн Л.Энхболдоос хоёр асуулт асуумаар байна. Төрийн өмчит Эрдэнэс Тавантолгой компаниас орон нутгийн Тавантолгой компани 380 мянган тонн нүүрс хулгайд алдсан буюу Монголын ард түмний өмчийг хулгайлсан асуудлыг анх та дэлгэсэн. Энэ асуудал юу болж байгаа вэ. Өмнөговь аймгийн Цогтцэций суманд нүүрс угаах таван үйлдвэр байна. Эдгээр үйлдвэр юу болж байгаа вэ”