Хэнтий аймгийн Баянмөнх, Дэлгэрхаан, Жаргалтхаан сумдын зарим айлын суурь хонинууд, хулгана барьж идсэн тохиолдлууд гарсаар байна. Энэ жил өвөл нь цас багатай, Хэнтий аймгийн ихэнх нутагт өвс гэх зүйл бараг байхгүй Малчид, мал бүхий иргэд малаа хариулах, идээшлүүлэхэд тун хүнд болоод байгаа юм. Хавар хуурайшилт ихтэй, борог өвс нь хүчтэй салхинд хийссэн, хаашаа л харна үлийн цагаан оготно, бэлчээрийг нь доройтуулсаар байгааг малчид дуу нэгтэй хэлж байна. Цэнхэрийн голоо дагаад голын наана цаана нь нутаглаж байгаа Баянмөнх, Дэлгэрхаан, Жаргалтхаан сумын малчдын хэсэг хонь сүүлийн үед хулгана идэх үзэгдэл ихээр гарч байгаад малын эмч нарын дуудлага, ачаалал ихэслээ. Урьд хожид ийм үзэгдэл болж байгаагүй учир дээр дооргүй гайхсан малчид, малын эмч, иргэд олон байна.

Учрыг судлахад: бэлчээрийн доройтол их, хамар хатгах өвсгүйдээ ядсан хээлтэй мал, төллөсөн хонь, ямаанууд уургийн дутагдалд орж хулганыг барьж идэх үзэгдэл ийнхүү гарсаар байгаа юм.

Улсад 40-н жил малын эмч хийж байгаа Б. Уранчимэг нь энэ төрлийн олон дуудлагад явж байгаа юм. Түүний хэлж буйгаар Эхний дуудлага 2019 оны 04-р сарын 16-ны өдөр иржээ. Дуудлагын дагуу эмч очиход хордлогод орсон зарим нэг нь хээлээ хаясан байна. Өнөөдрийн байдлаар Жаргалтхаан сумын 17 суурийн 47 хонь, 2 ямаа үхсэн байна. Хонинууд 2 ба түүнээс дээш тоогоор оготно идэж хордсон гэлээ. Улмаар үхсэн малыг задлахад ходоодонд хулгана олноороо байгаа дүр зураг энэ суманд их гарчээ. Иймээс мэргэжлийн малын эмч нарын зүгээс эдгээр газраас нутаглаж байгаа малчдыг яаралтай нутаг усаа сэлгэн буух, шим тэжээлтэй, ус ундтай газраар нутаглахыг анхааруулж байна.

Орон нутгийн сэтгүүлч Ө.Одмаа