Ерөнхийлөгч Х.Баттулга Захиргааны ерөнхий хуульд хориг тавьж магадгүй гэх мэдээлэл байна. Захиргааны ерөнхий хуулийн нэмэлт, өөрчлөлтийг өнгөрсөн баасан гаригийн чуулганы нэгдсэн хуралдаанаар хэлэлцэж баталсан.

Хуулийг хэлэлцэж батлахаас өмнө Ерөнхийлөгч саналаа хүргүүлсэн ч УИХ хүлээж аваагүй. Тиймээс тус хуулийн төсөлд Ерөнхийлөгч энэ долоо хоногт хориг тавьж магадгүй байгаа тухай мэдээлэл байна.

Ерөнхийлөгч чуулганы хуралдаантай өдрүүдэд хориг тавьбал 14 хоногийн дотор холбогдох байнгын хороо, чуулганаар хэлэлцэх учиртай.

Гишүүдийн 66.6 хувь нь буюу гуравны хоёр нь хүлээж авсан тохиолдолд хоригийг хүлээж авсанд тооцдог. Хэлэлцүүлгийн эдгээр өдрүүдэд УИХ-аас баталсан хууль, шийдвэрийн хэрэгжилт түр түдгэлздэг билээ.

Өнгөрсөн баасан гаригийн чуулганы хуралдаанаар Захиргааны ерөнхий хуульд өөрчлөлт оруулсан.

Тодруулбал, уг өөрчлөлтөөр Их хурлаас чиглэл өгсний дагуу улс төрийн шийдвэрийг хэрэгжүүлэх зорилгоор гаргасан Засгийн газрын шийдвэрийг Захиргааны шүүхэд хянахгүй болгосон юм.

Харин Ерөнхийлөгч Засгийн газрыг захиргааны шүүхийн хяналтаас гаргахыг дэмжээгүй бөгөөд “ Захиргааны ерөнхий хуулийн 3 дугаар зүйлийн 3.1.7 дахь заалтыг хөндөхгүйгээр “Үндсэн хуулийн цэцээр хянагдаж, эцэслэн шийдвэрлэгдсэн Монгол Улсын Засгийн газрын шийдвэр, түүнд хамаарах бусад үйл ажиллагаа” гэсэн 3.1.8 дахь заалт нэмэх” санал хүргүүлсэн юм.