УИХ дахь МАН-ын бүлэг ээлжит бус хуралдаанаа хийлээ. Хуралдаанаар МАН-ын Хяналтын хорооноос гаргасан УИХ-ын гишүүн Д.Дамба-Очир, Ш.Раднааcэд хоёрт таван жилийн турш улс төрийн дэмжлэг үзүүлэхгүй байх шийдвэрийг хэлэлцэж, уг асуудлыг Удирдах зөвлөлөөр хэлэлцэж шийдвэр гаргах ёстой гэх байр, сууринд хүрсэн байна.

МАН-ын бүлгийн дарга Д.Тогтохсүрэн энэ талаар "Бүлгийн хуралдаанд намын дарга, Хяналтын хорооны дарга, Ёсзүйн хорооны дарга нарыг оролцуулсан. Намын дүрмийн дагуу энэ асуудлыг МАН-ын Удирдах зөвлөл хуралдаж шийдэх ёстой. Тодруулбал, Удирдах зөвлөл хуралдаад Хяналтын хорооны шийдвэрийг хэвээр үлдээх үү, хүчингүй болгох уу гэдгийг шийддэг. Харин бүлгээс сая намын даргад "Удирдах зөвлөл хуралдаад энэ асуудлыг шийдээч" гэсэн хүсэлт гаргасан.

УИХ-ын гишүүн Ш.Раднаасэдийг хөөн хэлэлцэх хугацаанд өөрчлөлт оруулсан хэмээн буруутгаж, Хяналтын хорооноос 5 жил улстөрийн дэмжлэг үзүүлэхгүй байх шийдвэр гаргасан байна лээ. Харин Ш.Раднаасэд гишүүн бүлгийн хуралдаанд "Хөөн хэлэлцэх хугацааг байхгүй болгох саналыг би албан ёсоор гаргаагүй. Ажлын хэсгээс энэ санал орж ирсэн. Энэ асуудлыг хэлэлцэн шийдвэрлэх үед гэр бүлийн хүний эрүүл мэндийн шалтгааны улмаас БНСУ-д байсан. Намайг байгаагүйд ийм шийдвэр гаргасан байна лээ" хэмээн тайлбарласан. Тиймээс бүлгийн зүгээс УИХ-ын гишүүн хуулинд заасан эрхийнхээ дагуу үг хэлж, байр сууриа илэрхийлж, санал гаргасныхаа төлөө хариуцлага хүлээхгүй гэсэн заалтыг зөрчиж, үндэслэлгүйгээр шийтгэл ногдуулсан гэж үзсэн.

Харин УИХ-ын гишүүн Д.Дамба-Очирын хувьд Оюутолгойд материал өгсөн гэсэн үндэслэлээр хариуцлага тооцохоор болсон байна лээ. Бүлгээс энэ хоёр гишүүний асуудлаар намын Удирдах зөвлөл хуралдах ёстой гэж шийдвэрлэсэн" гэлээ.

Ингээд сэтгүүлчдийн сонирхсон асуултад хариуллаа.

-МАН-ынхан тойргоо булаалцалдаад Д.Дамба-Очир, Ш.Раднаасэд нарын тойргыг булаахаар ийм шийдвэр гаргасан гэх мэдээлэл бий?

-Энэ бол хэвлэлийнхний хардах эрхийнхээ хүрээнд бичсэн мэдээллүүд гэж харж байгаа. Миний бодлоор арай ч ийм улайрчихсан юмнууд байхгүй байгаа болов уу гэж бодож байна. Хардахаар давхцлууд бол байсан байх. Нам дээр хэн хэн аль тойрогт нэр дэвших эсэх зэрэг асуудлууд яригдаж эхлээгүй байна. Сонгуулийн хуулиа ч яриагүй байна.

-УИХ-ын гишүүн Ш.Раднаасэдийг намаас гарах өргөдлөө өгсөн гэх мэдээлэл байсан?

-Тийм зүйл байхгүй.