Эрдэс баялгийн эдийн засагч, “Гложекс консалтинг” ХХК-ийн ерөнхий захирал Н.Наранбаатар сүүлийн үед Тавантолгойн хувьцаатай асуудлаар байр, сууриа идэвхтэй илэрхийлэх болсон. Гэхдээ түүний байр, суурь хоёр сар бүрт өөрчлөгдөх бөгөөд хамгийн сүүлд Тавантолгойн 1072 хувьцааг иргэдэд өгөх ёстой, ёсгүй гэж хэдэнтээ хувирчээ.

Саяхан иргэний хөдөлгөөнийхөн мэдээлэл хийж Л.Наранбаатарыг “Эрдэнэс-Тавантолгой” ХК-иас мөнгө “шантаажилж” авсан гэх баримтыг олон нийтэд дэлгэсэн.

Төрийн бус байгууллагуудын мэдээлснээр Л.Наранбаатар нь “Гложекс консалтинг” компаниараа дамжуулан 2018 оны долдугаар сарын 4-ний өдөр 352 сая төгрөгийн тендер авсан. Энэ нь цуцлагдсаны төлөө бидний хувьцааг нь эзэмшиж буй “Эрдэнэс Тавантолгой” ХК руу дайрч байна. Өмнө нь тэрбээр 1,072 хувьцаанд ногдох 28-30 мянган төгрөгийг иргэдэд өгөх ёстой гэж ярьдаг байсан ч сүүлийн үед өгөх ёсгүй гэж ярих болсон. Ийм л туйлбаргүй, үзэл бодолдоо үнэн ч биш хүн” гэж ярьсан билээ.

Мөн Л.Наранбаатар нь “Coal mongolia-2018” арга хэмжээг зохион байгуулахад “Гложекс консалтинг” ХХК-иар дамжуулж, “Эрдэнэс-Тавантолгой” ХК-иас 20 мянган ам.доллар авсан гэх баримт бий гэдэг.

Тэгвэл Л.Наранбаатар нь иргэнийг залилсантай холбоотой бас нэгэн баримтыг дэлгэж байна.

Тодруулбал, тэрбээр нэгэн иргэнээс /эх сурвалжийн хүссэнээр компанийн нэрий нууцлав/ худалдах, худалдан авах гэрээний дагуу компанийг нь авсан ч төлбөрийг нь төлөлгүй өнөөдрийг хүртэл луу унжиж байгаа аж. Хамгийн ноцтой нь тэрбээр аль хэдийн тус компанийг өндөр үнээр дамлан борлуулж, өөртөө ашигтай ажилласан байна. Тэгсэн атлаа бусдын мөнгийг өгөлгүй долоон жил болжээ.

Л.Наранбаатар дээрх нэр бүхий компанийг худалдан авсны урьдчилгаа болох хоёр зуун сая төгрөгийн /200.000.000/ оронд Ланд Круйзер 200 маркийн хоёр машиныг өгчээ. Гэтэл тэрбээр худалдсан Ланд 200 маркийн машинаа одоог хүртэл тухайн иргэний нэр дээр шилжүүлж өгөөгүйгээр барахгүй үл таних хоёр залуу явуулж тухайн машиныг унаж явсан эмэгтэйг нь айлган сүрдүүлж булааж авахыг завдсан нь доорх шүүхийн баримтаас харагдаж буй.

Энэ хууль бус үйлдэлд нь Л.Наранбаатарыг Цагдаагийн байгууллагаар шалгуулахаар гомдол гаргахад нь Л.Наранбаатар нь “Энэ машинаа одоо нэр дээрээ шилжүүлж ав, манайх нэрийг нь шилжүүлээд өгье” гэж мэдүүлэг өгч энэхүү хэргээ хаалгажээ.

Ингэж ярьж хэргээ хаалгасны дараа тэрбээр тун удалгүй дахин Иргэний хэргийн шүүхэд дээрх машинаа буцаан авах нэхэмжлэл гаргасан байдаг.

Харин Иргэний хэргийн анхан болон Давж заалдах шатны шүүх хянаж үзээд нэхэмжлэлийг хэрэгсэхгүй болгож иргэнд машиныг өгч шийдвэрлэсэн байна.

Ямартай ч ойлгомжгүй, туйлбаргүй зангаа тэрбээр энэ хэргийн маргаан дээр ч гаргасан бололтой.